નવા કરવેરા વિનાનું નાણાપ્રધાન કનુભાઈ દેસાઇનું આત્મનિર્ભર બજેટ

ગાંધીનગરઃ ગુજરાત વિધાનસભાની ચૂંટણીમાં પ્રચંડ જીત પછી ભૂપેન્દ્ર પટેલ સરકારનું આ પહેલું બજેટ છે. રાજ્યના નાણાપ્રધાન કનુ દેસાઈએ વિધાનસભામાં બીજી વાર બજેટ રજૂ કર્યું હતું. તેમણે આ બજેટમાં કોઈ નવા કરવેરા નાખ્યા નહોતા. આ વર્ષના બજેનું કદટ 3.01 લાખ કરોડ હતું. રાજ્ય સરકારનું આ બજેટ પુરાંતવાળું રજૂ કર્યું હતું. નાણાપ્રધાને તેમનું બજેટ આત્મનિર્ભર થીમ પર રજૂ કર્યું હતું. ગયા વર્ષના રૂ. 2.43 કરોડની તુલનાએ આ વખતે બજેટના કદમાં 20 ટકાનો વધારો થયો હતો.  

નાણાપ્રધાને બજેટમાં લોકો વિકાસમાં સહભાગી થાય તેવી ઇચ્છા રાખી હતી. તેમણે કહ્યું હતું કે બજેટનું વિઝન પાંચ વર્ષનું છે. અન્ય રાષ્ટ્રોની તુલનાએ ભારતમાં વધુ યુવાધન છે. નાણાં પ્રધાને જણાવ્યું હતું કે ઓનલાઇન શિક્ષણ માટે મફત લાયબ્રેરી બનાવવામાં આવશે. મુખ્ય મંત્રી શ્રમિક બસેરા યોજનાની જાહેરાત કરી છે. અન્ન પુરવઠા વિભાગ માટે રૂ. 2165 કરોડની જોગવાઈ કરી છે. પંચાયત વિભાગ માટે રૂ. 10,743 કરોડની જોગવાઈ કરી છે. રાજ્યમાં રમત-ગમત માટે રૂ. 568 કરોડની જોગવાઈ કરી છે.

નાણાપ્રધાને આ વખતે બજેટમાં રૂ. 72,509 કરોડ વધુ મૂડીખર્ચ કરવામાં આવવાની જાહેરાત કરી છે, જે ગયા બજેટની તુલનાએ 72 ટકા વધુ મૂડી ખર્ચ કરાશે. આ ઉપરાંત સ્ટેચ્યુ ઓફ યુનિટી, સફેદ રણ, અંબાજી, ધરોઈ ડેમ, ગીર અભયારણ્ય, દ્વારકા શિવરાજપુર બીચ એમ પાંચ પ્રવાસન સ્થળોને વિકસાવવા પાંચ વર્ષમાં રૂ. 8000 કરોડનો ખર્ચ કરવામાં આવશે.