અમદાવાદઃરાજ્યમાં કોરોના વાઇરસના કેસમાં સતત વધારો થઈ રહ્યો છે, જેમાં રાજ્યમાં કેસ વધીને કુલ 122 થયા છે અને અત્યાર સુધીમાં કુલ 10 લોકોનાં મોત થયાં છે. અમદાવાદમાં કોરોના કેસ વધીને 53 થયા છે. રાજ્યમાં છેલ્લા એક જ દિવસમાં 14 કેસ નવા નોંધાયા છે.
દેશમાં કોરોના સામે લડવા માટે 21 દિવસનું લોકડાઉન કરવામાં આવ્યું છે, પણ આ લોકડાઉનને કારણે ગરીબ, નિમ્ન લોકો અને દૈનિક ધોરણે કામ કરતા શ્રમિક વર્ગને ભારે મુસીબતોનો સામનો કરવો પડ્યો છે. કોરાના સામેના જંગમાં ગરીબો લોકોને મદદ કરવા માટે અમદાવાદ સ્થિત પ્રતિષ્ઠિત શૈક્ષણિક સંસ્થા માઇકા (MICA)એ રાજ્ય સરકાર અને અમદાવાદ મ્યુનિસિપલ કોર્પોરેશન સાથે હાથ મિલાવ્યા છે.
માઇકાએ ગરીબ અને ભૂખ્યા લોકો માટે કેમ્પસમાં રસોડું શરૂ કર્યું છે, જેમાં દરરોજ 1000 જરૂરિયાતમંદોને ફૂડ પેકેટ આપવામાં આવે છે. આ ઉપરાંત આશરે 3000 પરિવારોને અનાજનું વિતરણ કર્યું છે. માઇકાના જ કેમ્પસમાં રસોડું શરૂ કરવામાં આવ્યું છે.
લોકડાઉનના ગાળામાં ઘણા લોકોના જીવનને અસર થઈ છે. ખાસ કરીને દેશભરના સમાજના નબળા અને વંચિત વર્ગને ભોગવવું પડ્યું છે. તેમના હાલત કફોડી થઈ ગઈ છે. તેમની આવકમાં ભારે નુકસાનનો સામનો કરવો પડ્યો છે.
આ ઉપરાંત, ગરીબ કુટુંબોને જે કમાણીમાં નુકસાન થઈ રહ્યું છે તેમને રેશન કિટ પણ આપવામાં આવી રહી છે. માઇકાના પ્રમુખ અને ડિરેક્ટર ડો. શૈલેન્દ્રરાજ મહેતાએ કહ્યું હતું કે લોકડાઉન ચાલુ રહેશે ત્યાં સુધી આ ફૂડ પેકેટનું વિતરણ પણ ચાલુ રાખવામાં આવશે. ફૂડ પાર્સલની વહેંચણી કરનારા અમારા કાર્યકરોને પણ ચહેરા પર માસ્ક લગાવવા અને ગ્લવ્ઝ પહેરવા માટે આપીએ છીએ.
