રાજકોટ: પ્રજાસતક પર્વના એક દિવસ પૂર્વે રાજકોટ ગ્રામ્ય SOGએ બાંગ્લાદેશી ઘુસણખોરોને ઝડપી પાડ્યા છે. રાજકોટ ગ્રામ્ય SOG ટિમ પેટ્રોલિંગમાં હતી દરમિયાન રંગપર ગામના પાટિયા નજીક મારુતિ સોસાયટીમાં રહેતા બે બાંગ્લાદેશી ઘુસણખોરોને ઝડપી પાડવામાં આવ્યા છે. પોલીસે આ બન્ને શખ્સોની પુછપરછ કરી ક્યાં કારણોસર કેવી રીતે ક્યાં ઈરાદાથી અહીં આવ્યા છે તે અંગે પુછપરછ હાથ ધરી તેના પર નજર રાખવામાં આવી રહી છે. ઉલ્લેખનીય છે કે પકડાયેલ બન્ને બાંગ્લાદેશી શખ્સો કોઈ પણ પ્રકારના આધારપુરાવા વગર ભારતમાં ગુજરાતની અંદર ઘુસી રાજકોટ જિલ્લામાં રહેતા હોવાનું પ્રાથમિક તપાસમાં સામે આવ્યું છે.
સૂત્રો પાસેથી મળતી માહિતી પ્રમાણે પોલીસને બાતમી મળી હતી કે રંગપર પાટીયા નજીક બે બાંગ્લાદેશીઓ ગેરકાયદેસર રીતે વસવાટ કરી રહ્યાં છે. પોલીસે આ બન્ને આરોપીઓની અટકાયત કરી પૂછપરછ કરી પરંતુ તેઓ સંતોષકારક જવાબ આપી શકયા ન હતા જેના કારણે પોલીસે તેમની ધરપકડ કરી છે. રંગપર પાટીયા નજીકથી બન્ને બાંગ્લાદેશીને ઝડપી પાડયા છે અને તેઓ રંગપર નજીક આવેલી મારૂતિ સોસાયટીના બ્લોક નંબર-૩માં રહેતા હતા અને અહીયાં છૂટક મજૂરી કરીને ગુજરાન ચલાવતા હતા. સમગ્ર ઘટનામાં પોલીસે તપાસ હાથધરી છે. જે ઘરમાં રહેતા હતા તે ઘરના માલિકની પણ પૂછપરછ કરવામાં આવી રહી છે. આરોપીઓ કઈ બોર્ડરથી અને કયા એજન્ટો મારફતે તેઓ ભારતની બોર્ડર સુધી પ્રવેશ્યા તેને લઈ તપાસ કરવામાં આવી રહી છે. ઉલ્લેખનીય છે કે SOGએ આરોપી સોહિલ હુસેન અને રીપોન હુસેનને ઝડપી પાડયા છે. આ અગાઉ સુરતમાં હિંદુ નામ ધારણ કરીને અને ખોટા ડોકયુમેન્ટ બનાવીને રહેતો બાંગ્લાદેશી આરોપી સુરત એસઓજીએ ઝડપી પાડયો છે,આરોપી મુસીબુલ ઉર્ફે રાજ ઉર્ફે પ્રદિપ મકબુલ શેખની ધરપકડ કરી પોલીસે વધુ તપાસ હાથધરી છે,આરોપી પાસેથી બે અલગ અલગ નામવાળા ભારતીય આધાર કાર્ડ મળ્યા છે જેના આધારે પોલીસે તપાસ હાથધરી છે.
