અમદાવાદઃ હવામાન વિભાગે 16થી 17 સપ્ટેમ્બર દરમિયાન રાજ્યમાં ભારેથી અતિ ભારે વરસાદની આગાહી કરી છે. વિભાગ દ્વારા દક્ષિણ ગુજરાતમાં ભારે વરસાદની આગાહી કરવામાં આવી છે. IMDએ સોશિયલ મિડિયા પોસ્ટમાં લખ્યું છે કે પશ્ચિમ મધ્ય પ્રદેશ રેડ એલર્ટ પર છે, કારણ કે 17 સપ્ટેમ્બર સુધી અલગ-અલગ સ્થળોએ ભારેથી અતિ ભારે વરસાદની સંભાવના છે.
હવામાન વિભાગ મુજબ 16થી 18 સપ્ટેમ્બર સુધી રાજ્યમાં મધ્યમ, ભારે તેમ જ અતિ ભારે વરસાદ પડવાની સંભાવના છે. નર્મદા, છોટા ઉદેપુર, સુરત, ડાંગ, નવસારી, વલસાડ, તાપી, દમણ અને દાદરા અને નગર-હવેલીમાં ભારે વરસાદ પડવાની શક્યતા છે.
બીજી તરફ, દક્ષિણ ગુજરાતની જેમ અમદાવાદ, વડોદરા, આણંદ, મહીસાગર, મહેસાણા, સાબરકાંઠા, બનાસકાંઠા અને અરવલ્લીમાં ભારે વરસાદ પડવાની આગાહી વ્યક્ત કરવામાં આવી છે. આ સાથે સૌરાષ્ટ્રના અમરેલી, ગીર સોમનાથ, ભાવનગર, બોટાદ, મોરબી સહિત કચ્છમાં ભારે વરસાદ પડવાની સંભાવના છે.
નર્મદા ડેમની સપાટી 136 મીટરેએ પહોંચી
નર્મદા ડેમની સપાટીમાં વધારો થયો છે અને ડેમની સપાટી 135.82 મીટરે પહોંચી છે. પાણીની વિપુલ આવક સામે ડેમમાં પાણીની સપાટી જળવાઈ રહે અને પૂરની વધારે અસર ખાળવા સતત નર્મદા નિગમ દ્વારા સાવચેતીપૂર્વક પ્રયાસ કરવામાં આવી રહ્યા છે. હાલ ડેમમાં 10 દરવાજા 1.40 મીટર સુધી ખોલી તેમજ રિવરબેડ પાવરહાઉસમાંથી કુલ 1,45,000 ક્યૂસેક પાણી નદીમાં છોડવામાં આવી રહ્યું છે. હાલમાં પાણીની સપાટી 136.11 મીટર છે. આ સાથે વડોદરા જિલ્લાનાં 25 ગામને એલર્ટ આપવામાં આવ્યું છે. વડોદરાના ડભોઇ તાલુકાના ત્રણ, શિનોર અને કરજણ તાલુકાનાં કુલ 22 ગામોના નાગરિકોને નદીના પટમાં ન જવા અપીલ કરવામાં આવી છે.
નર્મદા ડેમની મહત્તમ સપાટી 138.68 મીટર છે, એટલે કે સંપૂર્ણ ડેમ ભરાવામાં 3.26 મીટરનું છેટું છે. પાણીની ધરખમ આવકથી ડેમ છલોછલ થાય તોપણ નવાઈ નહીં. બીજી તરફ, ઇન્દિરાસાગર ડેમના 12 દરવાજા 10 મીટર ખોલવામાં આવ્યા છે તેમ જ પાવરહાઉસના 8 યુનિટમાંથી કુલ 9.89 લાખ ક્યૂસેક પાણી છોડવાનું શરૂ થતાં નર્મદા ડેમમાં આવક વધી રહી છે.
