અમદાવાદઃ ધ્રાંગધ્રા મિલિટરી સ્ટેશન ખાતે 25 જૂને “ગોલ્ડન કટાર ગનર” દ્વારા એક્સ-સર્વિસમેન રેલીનું આયોજન કરવામા આવ્યું હતું, જેમાં સુરેન્દ્રનગર, મોરબી અને પાટણ જિલ્લાના 1000 સેવાનિવૃત્ત સૈનિકો, વીર નારીઓ અને શહીદ જવાનોની વિધવાઓએ રાષ્ટ્ર પ્રત્યે એકતાના તેમના દ્રઢ સંકલ્પ સાથે ભાગ લીધો હતો. આ રેલીને સૈન્ય અને નાગરિક પ્રશાસનના કેટલાક ઉચ્ચ રેન્કિંગ અધિકારીઓએ સંબોધિત કરી હતી. સેવાનિવૃત્તિ સૈનિકો અને વીર નારીઓને ફરી ખાતરી આપવામાં આવી હતી કે તેઓ હંમેશાં સશસ્ત્ર દળોના સભ્યો માટે પ્રેરણાસ્રોત રહેશે અને તેમના કલ્યાણ તેમ જ સુખાકારી માટે સૈન્ય હંમેશાં પ્રતિબદ્ધ છે. આ રેલીનું આયોજન જિલ્લા બોર્ડ, નાગરિક પ્રશાસન અને જિલ્લાઓની વિવિધ નાગરિક એજન્સીઓના સહયોગથી કરવામાં આવ્યું હતું.
સેવાનિવૃત્ત જવાનો સાથે સંકળાયેલી વિવિધ બાબતો પર ધ્યાન આપવા માટે અહીં સંખ્યાબંધ સ્ટોલ ઊભા કરવામાં આવ્યા હતા, જેમાં એક્સ-સર્વિસમેન કોન્ટ્રિબ્યુટરી હેલ્થ સ્કીમ, પુનર્સ્થાપન, સૈનિક બોર્ડ, હેલ્પલાઇન રેકોર્ડ ઓફિસ, સૈન્ય ભરતી સંગઠન, સુવિજ્ઞા અને સ્પર્શ સેલ પણ સામેલ હતા. મુલાકાતીઓના મેડિકલ ચેકઅપ માટે આર્યુર્વેદિક ક્લિનિકની સાથે સાથે સંપૂર્ણ આધુનિક સાધન-સામગ્રીથી સજ્જ મેડિકલ ટીમ પણ તૈનાત કરવામાં આવી હતી, જ્યાં પ્રાથમિક તપાસ અને દવાઓનું વિતરણ કરવામાં આવ્યું હતું. આનાથી સેવા નિવૃત્ત સૈનિકોને સીધા જ અધિકારીઓ સમક્ષ તેમની ચિંતા વ્યક્ત કરવાનો મંચ પ્રાપ્ત થયો હતો.
તમામ સેવાનિવૃત્ત સેનિકો અને વીર નારીઓએ ગોલ્ડન કટાર ગનર દ્વારા હાથ ધરવામાં આવેલી આ પહેલની પ્રશંસા કરી હતી અને તેમની ફરિયાદોનું નિવારણ કરવા બદલ તેમના પ્રત્યે કૃતજ્ઞતા વ્યક્ત કરી હતી.
