અમદાવાદ: પ્લાસ્ટિક પ્રતિબંધિન લઈ શહેર મહાનગર પાલિકા કાર્યરત છે. અને પ્લાસ્ટિકનો ઉપયોગ ન કરવા માટે કામ કરતુ રહે છે. પરંતુ કેટલાક એકમો પ્રતિબંધ હોવા છતા પ્લાસ્ટિકનો ઉપયોગ કરે છે. જેને લઈ હવે મ્યુનિસિપલ કોર્પોરેશનના સોલિડ વેસ્ટ વિભાગ એક્શન મોડમાં આવ્યું છે. સોલિડ વેસ્ટ વિભાગ દ્વારા ઉત્તર અને દક્ષિણ ઝોનમાં પ્રતિબંધિત પ્લાસ્ટિક, પેપર કપનો ઉપયોગ કરનારા અને ગંદકી ફેલાવનારા એકમો સામે કાર્યવાહી કરવામાં આવી છે.
સૂત્રો પાસેથી મળતી માહિતી અનુસાર ઉત્તર ઝોનમાં પ્રતિબંધિત પ્લાસ્ટિકનો ઉપયોગ કરનારા, પેપર કપ વાપરતા તેમજ ગંદકી કરનારા કુલ 305 એકમોને નોટિસ આપી કુલ 92,500 રૂપિયાનો દંડ વસૂલ કરવામાં આવ્યો છે. જ્યારે જ્યારે દક્ષિણ ઝોનમાં આ પ્રકારનું કૃત્ય કરનારા 199 કોમર્શિયલ અને 6 રહેણાંક મળી કુલ 205 એકમોને નોટિસ આપી 8.25 કિગ્રા પ્લાસ્ટિકનો જથ્થો જપ્ત કરી 1,18,400 રૂપિયાનો દંડ વસૂલ કરાયો છે. તેમજ સોલિડ વેસ્ટના નિયમોના ઉલ્લંઘન બદલ બહેરામપુરમાં 6, વટવામાં 3, લાંભામાં 3 અને ખોખરામાં 1 મળી કુલ 13 એકમો સીલ કરાયા છે. મ્યુનિ.ના અધિકારીઓએ જણાવ્યું કે, આગામી દિવસોમાં પણ પ્લાસ્ટિક, પેપર કપ અને ગંદકી મામલે કાર્યવાહી ચાલુ રહેશે.
