અમદાવાદઃ શહેરમાં આશરે 50 જેટલી ગેરકાયદે જ્ઞાન શાળાઓ ચાલી રહી હોવાનો ખુલાસો ડીઈઓ દ્વારા દ્વારા કરવામાં આવ્યો છે. સમગ્ર મુદ્દે ડીઈઓ દ્વારા એક પરિપત્ર પણ જાહેર કરવામાં આવ્યો છે જેમાં આ પ્રકારની શાળાઓમાં વાલીઓ પોતાના સંતાનને ન ભણવા મોકલે તે વાતનો ઉલ્લેખ કરવામાં આવ્યો છે.
ડીઈઓ દ્વારા જાહેર કરાયેલા પરિપત્ર અનુસાર શહેરના સ્લમ વિસ્તારોમાં 50 જેટલી ગેરકાયદે જ્ઞાન શાળાઓ આવેલી છે. પરિપત્રમાં વાલીઓ પોતાના બાળકોને આ પ્રકારની શાળાઓમાં પ્રવેશ ન અપાવે તેવું જણાવાયું છે. તો આ સાથે જ જે શાળાઓ ગેરકાયદેસર રીતે ચાલી રહી છે તે શાળાઓ વિરૂદ્ધ હવે કાયદેસરની કાર્યવાહી કરવામાં આવશે. પ્રાપ્ત માહિતી અનુસાર આ શાળાઓ 2006થી સ્લમ વિસ્તારોમાં ચાલી રહી હોવાની વિગતો સામે આવી છે.
પરિપત્રમાં જણાવ્યા અનુસાર જ્ઞાન શાળા એ કોઈ શાળા નથી તેમજ સરકારે તેને મંજૂરી પણ આપી નથી. ડીઈઓને આ અંગે ફરિયાદ મળ્યા બાદ સંબંધિત તમામ વિભાગને જાણ કરી તપાસના આદેશ આપવામાં આવ્યા છે.
