હૈદરાબાદઃ EDએ રિયલ એસ્ટેટ કંપનીઓમાં ચાલી રહેલી મની લોન્ડરિંગ તપાસના સિલસિલામાં તેલુગુ સુપરસ્ટાર મહેશ બાબુને નોટિસ જારી કરી છે. ટોલિવૂડ એક્ટર મહેશ બાબુને 27 એપ્રિલે પૂછપરછ માટે બોલાવ્યા છે. . હૈદરાબાદ સ્થિત રિયલ એસ્ટેટ કંપનીઓ સાંઈ સૂર્યા ડેવલપર્સ અને સુરાના ગ્રુપ દ્વારા છેતરપિંડી અને મોટા પાયે નાણાકીય ગેરરીતિઓને મામલે મહેશ બાબુની પૂછપરછ કરવામાં આવશે.
મહેશ બાબુની પૂછપરછ કેમ?
પ્રાથમિક જાણકારી અનુસાર મહેશ બાબુ આ કંપનીઓ દ્વારા ચલાવવામાં આવી રહેલા પ્રોજેક્ટ્સનો બ્રાન્ડ એમ્બેસેડર છે અને કંપની માટે વિજ્ઞાપનમાં કામ પણ કર્યું હતું. સ્થાનિક મિડિયા અહેવાલો અનુસાર આ કંપનીઓએ મહેશ બાબુને બેન્ક ખાતા સિવાય રોકડા 5.9 કરોડ રૂપિયા પણ આપ્યા હતા. આરોપ છે કે કંપનીઓએ મહેશ બાબુને 3.4 કરોડ રૂપિયા ચેકના માધ્યમથી અને 2.5 કરોડ રૂપિયા રોકડા આપ્યા હતા. હવે રોકડ ચુકવણી તપાસના દાયરામાં છે. એવામાં EDના અધિકારીઓને આશંકા છે કે રિયલ એસ્ટેટ કંપનીએ કરેલી છેતરપિંડી અને આ રોકડ રકમનું કનેક્શન હોઈ શકે છે.
આ કેસમાં થોડા દિવસ પહેલાં જ EDએ બંને રિયલ એસ્ટેટ કંપનીઓનાં સ્થાનો પર દરોડા પાડ્યા હતા. જુબલી હિલ્સ, બોવેનપલ્લી અને સિકંદરાબદમાં પણ દરોડા પડ્યા હતા. સાંઈ સૂર્યા ડેવલપર્સનો માલિક સતીશ ચંદ્ર ગુપ્તા પર ગ્રીન મિડોઝ નામના પ્રોજેક્ટમાં ચૂક થવાનો આરોપ છે, જેમાં મહેશ બાબુ બ્રાન્ડ એમ્બેસેડર હતો.
