નવી દિલ્હીઃ જથ્થાબંધ મોંઘવારી દર એપ્રિલમાં નકારાત્મક ગ્રોથ જોવા મળ્યો છે. એપ્રિલમાં જથ્થાબંધ મોંઘવારી દર (-) 0.92 ટકા રહ્યો હતો. માર્ચમાં મોંઘવારી દર (WPI) 1.34 ટકા રહ્યો હતો. આ પ્રકારે એપ્રિલમાં સતત 11મા મહિને જથ્થાબંધ મોંઘવારી દરમાં ઘટાડો જોવા મળ્યો હતો. ક્રૂડ ઓઇલની કિંમતોમાં ઘટાડો, વીજની કિંમતોમાં ઘટાડો અને નોન ફૂડ અને ફૂડ આર્ટિકલની કિંમતોમાં ઘટાડાને કારણે મોંઘવારી દરમાં ઘટાડો જોવા મળ્યો હતો.
માસિક ધોરણે એપ્રિલમાં પ્રાઇમરી આર્ટિકલ WPI 2.40 ટકાથી ઘટીને 1.60 ટકા પર આવ્યો હતો. ફ્યુઅલ એન્ડ પાવર WPI માર્ચના 8.96 ટકાથી ઘટીને 0.93 ટકા પર રહ્યો છે. એપ્રિલમાં ઉત્પાદિત ઉત્પાદનોનો મોંઘવારી દર (-)0.77 ટકાથી ઘટીને (-) 2.4 ટકા રહ્યો હતો.
34 મહિનાના નીચલા સ્તરે
એપ્રિલમાં જથ્થાબંધ મોંઘવારી દર 34 મહિનાના નીચલા સ્તરે પહોંચ્યો છે. માસિક ધોરણે એપ્રિલમાં બટાટાનો જ્થ્થાબંધ બજારમાં ભાવ (-) 23.67 ટકાથી વધીને (-) 18.66 ટકા રહ્યો હતો. એ જ રીતે ડુંગળીની જથ્થાબંધ કિંમતોનો મોંઘવારી દર માર્ચના (-)36.83 ટકાથી વધીને (-) 18.41 ટકા રહ્યો હતો. જ્યારે ઇંડાં, માંચનો જથ્થાબંધ મોંધવારી માર્ચના 1.36 ટકાથી ઘટી 0.77 ટકા થયો હતો.
દેશમાં રિટેલ મોંઘવારી ઘટીને 4.7 ટકા પર આવી ગયો છે. એ 18 મહિનાના નીચલા સ્તરે છે. જે ગયા મહિને વધીને 5.7 ટકાએ હતો. મોંઘવારી દરમાં ઘટાડાની અસર RBIની આગામી બેઠકમાં ધિરાણ નીતિની સમીક્ષા કરતી વખતે વ્યાજદરો અંગે નિર્ણય લેતી વખતે પડશે.
