આઇસી15 ઇન્ડેક્સ 11 ટકા ઉછળ્યો

મુંબઈઃ અમેરિકાએ રશિયા સાથે લશ્કરી ઘર્ષણ ટાળવાનો સંકેત આપ્યો તેને પગલે ઈક્વિટી માર્કેટની સાથે સાથે ક્રીપ્ટોકરન્સી માર્કેટમાં પણ તાત્કાલિક સુધારો જોવા મળ્યો હતો. બિટકોઇન ફરી એક વાર 38,000 ડૉલરની સપાટી વટાવી ગયો હતો.

રશિયાએ યુક્રેનમાં સૈન્ય મોકલ્યા બાદ અમેરિકન પ્રમુખ જો બાઇડને કહ્યું હતું કે નાટો સમૂહની હદમાં ક્યાંય કોઈ નુકસાન થવા નહીં દેવાય. આમ છતાં, અમેરિકન સૈન્યને મોકલવામાં નહીં આવે એવું કહ્યું હતું.

રશિયાએ યુક્રેન પર આક્રમણ શરૂ કરતાં જ સમગ્ર વિશ્વમાં ઈક્વિટી માર્કેટનો અને સાથે સાથે ક્રીપ્ટોકરન્સી માર્કેટનો રકાસ થયો હતો અને પ્રથમ પંક્તિની ક્રીપ્ટોકરન્સી – બિટકોઇનનો ભાવ 34,500 સુધી ઘટી ગયો હતો.

દરમિયાન, ક્રીપ્ટોવાયરે લોન્ચ કરેલો વિશ્વનો સર્વપ્રથમ ક્રીપ્ટો ઇન્ડેક્સ – આઇસી15 શુક્રવારે બપોરે ચાર વાગ્યે પૂરા થયેલા ચોવીસ કલાકમાં 11.04 ટકા (5,480 પોઇન્ટ) વધીને 55,122 પોઇન્ટ બંધ રહ્યો હતો. આ ઇન્ડેક્સ 49,642 ખૂલીને 55,702 સુધીની ઉંચી અને 49,474 પોઇન્ટની નીચલી સપાટીએ ગયો હતો.