નવી દિલ્હી: મહેસૂલ સચિવ અજયભૂષણ પાંડેએ જણાવ્યું છે કે, “બજેટમાં સુપર રિચ લોકો પર પેટ્રોલ-ડીઝલ પર વધારાની ડ્યૂટી લાગુ કરવાથી સરકારને ચાલુ નાણાકીય વર્ષમાં વધારાની 30,000 કરોડની આવક થશે.” પેટ્રોલ અને ડીઝલ પર વધારાની એક્સાઇઝ ડ્યૂટી અને રોડ સેસમાં વધારો કરવાથી વાર્ષિક 30,000 કરોડની આવક થશે.
વર્ષે હવે નવ જ મહિના બાકી રહ્યા હોવાથી તેનાથી સરકારને 22,000 કરોડની આવક થશે. આ ઉપરાંત સુપર રિચ પર ટેક્સ વધારવાથી વધુ 12,000-13,000 કરોડની આવક થશે તેવો અંદાજ છે. ગોલ્ડ અને કીમતી ધાતુઓ પરની કસ્ટમ્સ ડ્યૂટી 10 ટકાથી વધારીને 12.5 ટકા કરી દેવાઈ છે, જેનાથી સરકારને વધારાની 3,000-4,000 કરોડની આવક થવાનો અંદાજ છે. જોકે અન્ય કેટલીક વસ્તુઓ પરની કસ્ટમ્સ ડ્યૂટીમાં ઘટાડો કરાયો હોવાથી આ મામલે બધું સરભર થઈ જશે. આથી સરકારને ટેક્સની દરખાસ્તોથી ચાલુ વર્ષે 30,000 કરોડની ચોખ્ખી આવક થવાનો અંદાજ છે તેમ પાંડેયે જણાવ્યું છે.
તેમણે કહ્યું હતું કે પેટ્રોલ અને ડીઝલ પર વધારાની સેસ લાગુ કરવાથી અને સોના પરની કસ્ટમ્સ ડ્યૂટી વધારવાથી અને સુપર રિચ પર વધુ ટેક્સ લાગુ કરવાથી આવકના સ્ત્રોત વધશે અને સરકારની તિજોરીમાં વધુ નાણાં આવશે.
જોકે બીજી તરફ સરકારે કોર્પોરેટ્સને રાહત આપવાથી આવકમાં નુકસાન પણ થશે. બજેટમાં 400 કરોડ સુધીનું ટર્નઓવર ધરાવતી કંપનીઓ માટે કોર્પોરેટ ટેક્સ ઘટાડીને 25 ટકા કરી દેવાયો છે, જેનાથી સરકારની આવક ઘટશે. અગાઉ 250 કરોડનું ટર્નઓવર ધરાવતી કંપનીઓ આ બ્રેકેટમાં હતી.
