બિહારના ભોજપુર જિલ્લાના બહુચર્ચિત ભરત તિવારી એન્કાઉન્ટર કેસમાં રાજ્ય સરકારે એક મોટો અને મહત્વપૂર્ણ નિર્ણય લીધો છે. મુખ્યમંત્રી સમ્રાટ ચૌધરીએ જાહેરાત કરી છે કે ન્યાયિક તપાસ પંચના વચગાળાના અહેવાલ (અંતરિમ રિપોર્ટ) ના આધારે દિવંગત ભરત તિવારીના પરિવારને આર્થિક સહાય આપવામાં આવશે. આ સાથે જ પરિવારના એક આશ્રિત સભ્યને સરકારી નોકરી પણ પ્રદાન કરવામાં આવશે. મુખ્યમંત્રીએ સ્પષ્ટ કર્યું હતું કે પરિવારની આર્થિક સ્થિતિ અને જીવનનિર્વાહને ધ્યાનમાં રાખીને આ નિર્ણય લેવાયો છે. નાણાકીય સહાયની રકમ ટૂંક સમયમાં જ પરિજનોના ખાતામાં ટ્રાન્સફર કરવામાં આવશે, તેમજ સરકારી નોકરી આપવાની વહીવટી પ્રક્રિયા પણ ઝડપથી શરૂ કરી દેવામાં આવશે. સરકારના આ નિર્ણયથી પીડિત પરિવારને મોટી રાહત મળી છે.
શું હતો સમગ્ર મામલો?
ઉલ્લેખનીય છે કે ભોજપુર જિલ્લાના શાહપુર પોલીસ સ્ટેશન વિસ્તાર હેઠળ આવતા બિલોટી ગામમાં પોલીસ એન્કાઉન્ટર દરમિયાન ભરત તિવારીનું મૃત્યુ થયું હતું. આ ઘટના બાદ પરિજનો અને સ્થાનિક રહીશોએ નિષ્પક્ષ તપાસની માંગ સાથે ભારે વિરોધ પ્રદર્શન કર્યું હતું. મામલાની ગંભીરતાને જોઈને રાજ્ય સરકારે ઉચ્ચ સ્તરીય ન્યાયિક તપાસ પંચની રચના કરી હતી. પંચ દ્વારા સોંપાયેલા વચગાળાના રિપોર્ટના આધારે જ મુખ્યમંત્રીએ ભરત તિવારીને દિવંગત સ્વીકારીને આ રાહત પગલું ભર્યું છે.
વળતરની જાહેરાત બાદ RJD નો બિહાર સરકાર પર તીખો હુમલો
બીજી તરફ, ભરત તિવારી એન્કાઉન્ટર કેસમાં ન્યાયિક તપાસ પંચના રિપોર્ટ બાદ સરકાર દ્વારા વળતર અને નોકરીની જાહેરાત થતા જ રાજ્યમાં રાજકારણ ગરમાયું છે. રાષ્ટ્રીય જનતા દળ (RJD) એ આ નિર્ણયને લઈને સરકારને આડે હાથ લીધી છે. RJD ના મુખ્ય પ્રવક્તા શક્તિ સિંહ યાદવે મુખ્યમંત્રી સમ્રાટ ચૌધરીને સવાલ કર્યો છે કે, “એન્કાઉન્ટરનો આદેશ આપનારા અને તેમાં સામેલ અધિકારીઓ સામે ગુનો નોંધીને તેમની ધરપકડ કરવામાં આવશે કે નહીં?” તેમણે વધુમાં ઉમેર્યું કે વળતર આપીને સરકારે પોતે જ માની લીધું છે કે આ એન્કાઉન્ટર નહીં પરંતુ હત્યા હતી, તેથી મુખ્યમંત્રી સમ્રાટ ચૌધરીએ બિહારની જનતાની માફી માંગવી જોઈએ.
