વડોદરા: કલા અને સંસ્કૃતિને લોકભોગ્ય બનાવવા માટેનો લોકપ્રિય મંચ એટલે ‘અભિવ્યક્તિ – ધ સિટી આર્ટ્સ’ પ્રોજેક્ટ. જેની આગામી આવૃત્તિ વડોદરા શહેરમાં યોજાવાની છે. આ આર્ટ ફેસ્ટિવલમાં નૃત્ય, સંગીત અને નાટ્યની કેટલીક પ્રસ્તૃતિઓ વડોદારાના આંગણે રજૂ કરવામાં આવશે. ટોરેન્ટ ગ્રૂપના મહેતા પરિવાર પ્રેરિત યુ.એન.એમ. ફાઉન્ડેશનની પહેલ એવા ‘અભિવ્યક્તિ– ધ સિટી આર્ટસ’ પ્રોજેક્ટ અંતર્ગત વડોદરામાં ૧૭ થી ૧૯ જાન્યુઆરી, ૨૦૨૫ દરમિયાન કુલ છ પ્રસ્તૃતિઓ રજૂ કરવામાં આવશે. 
વડોદરા શહેરની ત્રીજી આવૃત્તિ દરમિયાન પ્રથમ દિવસે એટલે કે ૧૭મી જાન્યુઆરીના રોજ, નીલકાંતન આઈ કૃષ્ણન દ્વારા કર્ણાટિક સંગીતમય ફ્યુઝન “સ્વયમ્: ધ વોઈસ વિધીન” રજૂ કરવામાં આવશે, તેમજ તુષાર શર્મા દ્વારા “99 ડેઝ” નામની હાસ્ય નાટ્ય પ્રસ્તૃતિ રજૂ કરવામાં આવશે.
બીજા દિવસે, એટલે કે 18મી જાન્યુઆરીના રોજ મિશાલ ભાટિયાનું ભારતીય સંગીતમય પરફોર્મન્સ “પુરુષાર્થમ” રજૂ કરવામાં આવશે. તેમજ ગોપાલ અગ્રવાલ અને આકાશ વણઝારા દ્વારા “ટેરિટોરિયલ” નામનું માર્શલ આર્ટ્સ સાથેનું સમકાલીન નૃત્ય રજૂ કરવામાં આવશે.
આવૃત્તિના છેલ્લા દિવસે, એટલે કે 19મી જાન્યુઆરીના રોજ અનન્યા વૈદ્ય પોતાની પ્રાયોગિક–આધુનિક લોક નાટ્ય પ્રસ્તૃતિ “વહી કહાની, ફિર” રજૂ કરશે. ત્યારબાદ સાર્થક દુબે સ્ટ્રીટ ડાન્સ અને હિપ–હોપ શ્રેણીનું પર્ફોર્મન્સ “બસ્કનેશન” રજૂ કરશે. તમામ કાર્યક્રમો વડોદરાના એલેમ્બિક આર્ટ ડિસ્ટ્રિક્ટ ખાતે યોજાશે અને પ્રવેશ તમામ લોકો માટે નિઃશુલ્ક છે.
આ તમામ રજૂઆતોની થીમ “સ્ટોરીઝ ફ્રોમ ધ સોલ“ રાખવામાં આવી છે અને તમામ પ્રસ્તુતિઓને પ્રખ્યાત કલા ક્યુરેટર્સ દ્વારા ક્યુરેટ કરવામાં આવી છે. સંગીતમાં કે. સુમંત, રંગભૂમિમાં ચિરાગ મોદી અને નૃત્યમાં માનસી મોદીના ક્યુરેશનમાં આ રજૂઆતો તૈયાર કરવામાં આવી છે. જયારે આ માટે કલા ક્ષેત્રના પ્રખ્યાત નિષ્ણાંતોનું માર્ગદર્શન મેળવવામાં આવ્યું છે જેમાં – રજત ધોળકિયા (સંગીત), સૌમ્ય જોશી (થિયેટર) અને કૃતિ મહેશ (નૃત્ય)નો સમાવેશ થાય છે.
