નવા ખ્રિસ્તી વર્ષ 2020ને મુંબઈગરાંઓએ 31 ડિસેંબર, મંગળવારે રાતે ઉમંગ, ઉલ્લાસ અને આનંદ સાથે આવકાર્યું છે. નવા વર્ષના સ્વાગત માટે દક્ષિણ મુંબઈના ગેટવે ઓફ ઈન્ડિયા ખાતે લોકો મોડી સાંજથી જ મોટી સંખ્યામાં ઉપસ્થિત થયા હતાં અને મધરાતે 12 વાગ્યાના ટકોરા થતાં જ ત્યાં હાજર મેદનીએ હર્ષનાદો કરીને અને આનંદની ચિચિયારીઓ પાડીને નવા વર્ષને વધાવી લીધું હતું. આ પ્રસંગે ગેટવે ઓફ ઈન્ડિયા સ્મારકને રંગબેરંગી લાઈટ્સથી સુશોભિત કરવામાં આવ્યું હતું.
દર વર્ષની જેમ આ વર્ષે પણ 1 જાન્યુઆરીના 12ના ટકોરાં પડતાં મુંબઈમાં ઠેરઠેર આતશબાજી કરવામાં આવી હતી અને ફટાકડા ફોડીને નવા વર્ષનું સ્વાગત કરવામાં આવ્યું હતું.
