વરસાદમાં તો પકોડા ખાવા ગમે જ! જો કોઈક વાર ચણાનો લોટ ઘરમાં ન હોય તો, ઘઉંના લોટના પકોડા પણ સરસ બને છે! જે બહારથી ઘણાં જ ક્રિસ્પી રહે છે!
સામગ્રીઃ
- ઘઉંનો લોટ 1 કપ
- બટેટા 2
- કળી પત્તાના પાન 7-8
- લીલા મરચાં 4
- કાંદા 2
- જીરૂ 1 ટી.સ્પૂન
- અજમો ½ ટી.સ્પૂન
- કાળા મરીનો અધકચરો ભૂકો ½ ટી.સ્પૂન
- મરચાં પાઉડર ½ ટી.સ્પૂન
- હળદર ½ ટી.સ્પૂન
- મીઠું સ્વાદ પ્રમાણે
- સમારેલી કોથમીર 1 કપ
- ચોખાનો લોટ 2 ટે.સ્પૂન
- રવો 2 ટે.સ્પૂન
- બેકીંગ સોડા ½ ટી.સ્પૂન
રીતઃ બટેટાને ખમણી લો. કાંદા ઝીણાં સમારી લો. કળી પત્તાના પાન પણ સમારીને ઉમેરી દો. લીલા મરચાં ઝીણાં સમારીને ઉમેરી દો. ઘઉંનો લોટ, જીરૂ, અજમો, કાળા મરીનો ભૂકો, હળદર, મરચાં પાઉડર, મીઠું સ્વાદ મુજબ, સમારેલી કોથમીર મેળવીને આ મિશ્રણ હાથ વડે ભેગું કરીને પાંચેક મિનિટ માટે રહેવા દો. જેથી તેમાં રહેલું પાણી છૂટે. ત્યારબાદ થોડું થોડું પાણી મેળવીને સહેજ જ ઢીલું એટલે કે એકદમ ઘટ્ટ ખીરું બનાવી લો.
આ ખીરું એક ચમચી વડે 2 મિનિટ માટે ફેંટી લો. હવે પકોડા તળવા માટે કઢાઈમાં તેલ ગરમ કરવા મૂકો. તેલ કઢાઈ ભરીને નહીં પરંતુ નાની સાઈઝના પકોડા ડૂબે તેટલું જ લેવું.
પકોડા તળવા પહેલાં તેમાં રવો તેમજ ચોખાનો લોટ મેળવી દીધા બાદ બેકીંગ સોડા મેળવો. ત્યારબાદ નાની સાઈઝના પકોડા તળો. ખીરું ઘટ્ટ હોવાથી પકોડા તેલમાં નાખતી વખતે સાચવીને હળવેથી નાખવા. થોડીવાર માટે ગેસની આંચ મધ્યમ કરીને પકોડા હલાવ્યા વિના થવા દો. નીચેથી ગોલ્ડન થવા આવે ત્યારે ઝારા વડે ફેરવી દો.
પકોડા ગોલ્ડન રંગના તળાઈ જાય એટલે ગેસની આંચ તેજ-મધ્યમ કરીને પકોડા ઝારા વડે કાઢી લો.
પકોડામાં રવો તેમજ ચોખાનો લોટ ઉમેર્યા હોવાથી તે બહારથી ઘણાં જ ક્રિસ્પી બને છે!
આ પકોડા ગળી તેમજ તીખી ચટણી સાથે સારાં લાગશે અથવા ટોમેટો કેચ-અપ સાથે પણ ચાલશે!
