બટેટાનો પણ ઓળો (બટેટાનું ભરતું) બની શકે છે! જે બહુ જ સ્વાદિષ્ટ બને છે!
સામગ્રીઃ
- બાફેલા બટેટા 6
- કસૂરી મેથી 1 ટે.સ્પૂન
- લીલા કાંદાની 1 ઝુડી
- ટામેટાં 2
- લીલા વટાણા ½ કપ
- કળી પત્તાના પાન 6-7
- ધાણાજીરૂ પાઉડર 2 ટી.સ્પૂન
- ગરમ મસાલો ½ ટી.સ્પૂન
- ચાટ મસાલો 1½ ટી.સ્પૂન
- સમારેલી કોથમીર 1 કપ
- લીંબુનો રસ 1 ટે.સ્પૂન
- તેલ વઘાર માટે 3 ટે.સ્પૂન
- જીરૂ 1 ટી.સ્પૂન
- હીંગ ¼ ટી.સ્પૂન
- મરચાંનો પાઉડર ½ ટી.સ્પૂન
વાટેલા મસાલા માટેઃ
- જીરૂ 2 ટી.સ્પૂન
- આદુનો ટુકડો 1 ઈંચ
- લસણની કળી 10-12
- લીલા મરચાં 3-4
- કળી પત્તાના પાન 10-15
- સમારેલી કોથમીર ½ કપ
રીતઃ મિક્સીમાં જીરૂ, આદુના ટુકડા, લસણની કળી, લીલા મરચાં, સમારેલી કોથમીર તેમજ કળી પત્તાના પાન ઉમેરીને અધકચરો મસાલો વાટી લેવો.
બાફેલા બટેટાનો હાથેથી ચૂરો કરી લેવો. લીલા કાંદાના પાન અલગ સુધારી રાખવા. આખા કાંદાને ઝીણાં સમારી લેવા
એક કઢાઈમાં તેલ ગરમ કરી તેમાં જીરૂ તેમજ હીંગનો વઘાર કરી કળી પત્તાના પાનનો વઘાર કરી દો. હવે તેમાં લીલા વટાણા ઉમેરી, સમારેલો કાંદો પણ મેળવી તે સોનેરી રંગનો સંતળાય એટલે વાટેલો મસાલો મેળવીને એકાદ મિનિટ બાદ કસૂરી મેથી મેળવીને ટામેટાં સમારીને મેળવી દો. ટામેટાં નરમ થઈ ઓગળી જાય એટલે તેમાં લીલા કાંદાના સમારેલાં પાન તેમજ બાકીનો સૂકો મસાલો પણ મેળવી દો. જેમાં ગરમ મસાલો, ધાણાજીરૂ પાઉડર, ચાટ મસાલો, મરચાંનો પાઉડર ઉમેરી દીધા બાદ બાફેલા બટેટાનો ચૂરો મેળવી દો.
કઢાઈ ઢાંકીને થોડીવાર માટે ગેસની ધીમી આંચે શાકમાં મસાલો પચવા દો. દસેક મિનિટ બાદ શાકમાં લીંબુનો રસ તેમજ સમારેલી કોથમીર મેળવીને 2 મિનિટ ગરમ કર્યા બાદ ગેસ બંધ કરીને ગરમાગરમ શાક રોટલી સાથે પીરસો.
