ખાટ્ટો લોટ વાનગી ઝટપટ બની જતી પૌષ્ટિક, સ્વાદિષ્ટ, વિસરાતી જતી ગુજરાતી પારંપરિક વાનગી છે. જેનો સ્વાદ ખીચું જેવો જ લાગે છે! પૂરી રસોઈ બનાવવાનો જો કોઈવાર કંટાળો આવ્યો હોય તો આ એક વાનગી પૂરી રસોઈનો સ્વાદ આપી દે તેમજ પૌષ્ટિક પણ છે. વળી, તેના માટે ઘરમાં ઉપલબ્ધ ચોખા, ઘઉં, ચણા, જુવાર, મગ કે મકાઈનો એમ કોઈપણ લોટ તમે વાપરી શકો છો!
સામગ્રીઃ
- ઘઉં અથવા ચણાનો લોટ 1 કપ
- જીરુ 1 ટી.સ્પૂન
- આદુ-મરચાં-લસણની પેસ્ટ 1 ટે.સ્પૂન
- કળીપત્તાના પાન 8-10
- શીંગતેલ વઘાર માટે 1 ટે.સ્પૂન તેમજ વાનગી સાથે પીરસવા માટે
- ખાટી છાશ 2 કપ
- હળદર પાઉડર ¼ ટી.સ્પૂન
- હીંગ ¼ ટી.સ્પૂન
- કોથમીર સમારેલી 1 ટે.સ્પૂન
- ખાંડ 1 ટી.સ્પૂન (optional)
- મેથિયો સંભારો 1 ટે.સ્પૂન
રીતઃ એક કઢાઈમાં તેલ ગરમ કરી તેમાં જીરુ તતડાવી લીધા બાદ તેમાં હીંગ તેમજ કળી પત્તાના પાન ઉમેરીને આદુ-મરચાંની પેસ્ટ 1 મિનિટ માટે સાંતળીને અડધો કપ પાણી રેડી દો. ત્યારબાદ તેમાં છાશ ઉમેરીને 1 મિનિટ ગરમ કરીને તેમાં તરત થોડો થોડો લોટ ઉમેરીને તવેથા વડે મિક્સ કરતા રહો. લોટ ઉમેરાય જાય પછી પણ તવેથા વડે એકસરખું મિશ્રણ હલાવતા રહેવું. જ્યાં સુધી તે ઘટ્ટ ન થાય.
મિશ્રણ ઘટ્ટ થયા બાદ ગેસ બંધ કરીને ઉતારી લો.
પ્લેટમાં 1-2 ચમચા જેટલું મિશ્રણ રેડી તેની ઉપર 1 ટે.સ્પૂન શીંગ તેલ રેડી, મેથિયો મસાલો ભભરાવીને ઉપર સમારેલી કોથમીર ભભરાવી દો. ગરમાગરમ ખાટો લોટ જમવામાં પીરસો.
![](https://chitralekha.com/chitralemag/wp-content/themes/Newspaper/images/whatsapp-channel-follow.png)