બાળકોને ભાવતું ડેઝર્ટ ડોનટ્સ!
ઓછી સામગ્રીમાં બની જાય છે અને બનાવવાનું પણ સહેલું છે! તો બનાવી લો ડોનટ્સ અને ખુશ કરી દો બાળકોને, આ લૉકડાઉનમાં!
સામગ્રી:
- મેંદો ૧ કપ,
- દળેલી સાકર 1/4 કપ,
- બેકિંગ પાવડર 3/4 ટી.સ્પૂન,
- ખાવાનો સોડા 3/4 ટી.સ્પૂન,
- હુંફાળું દૂધ 1/2 કપ,
- લીંબુનો રસ 2 ટેબલ સ્પૂન,
- મીઠું 2 ચપટી,
- માખણ 2 ટી.સ્પૂન,
- તળવા માટે તેલ
ચોકલેટ ગાર્નીશિંગ માટે:
- લિક્વિડ કોકો,
- ચોકલેટ સ્પ્રિંકલ અથવા કલરિંગ સ્પ્રિંકલ અથવા વરિયાળી પીપર
રીતઃ
સૌપ્રથમ લોટ બાંધવાના વાસણમાં મેંદો લો. તેમાં બેકીંગ પાવડર, ખાવાનો સોડા, દળેલી સાકર તેમજ મીઠું મિક્સ કરો. હવે મેંદામાં લીંબુનો રસ તેમજ હુંફાળું દૂધ ઉમેરીને લોટ બાંધો.
લોટ બંધાઈ જાય એટલે લોટમાં માખણ લગાડીને લોટને કુણી લો. લોટને ઢાંકીને એક કલાક માટે રહેવા દો.
એક કલાક બાદ લોટ લો. લોટના બે ભાગ કરો. એમાંથી એક ભાગ લઇ લુવો બનાવીને જાડો રોટલો વણો. હવે પુરી જેટલા આકારની એક વાટકી લો. એ વાટકીની મદદથી ડોનેટ કટ કરો. કટ કરેલા ડોનેટની વચ્ચેનો ભાગ કોઈ બોટલના નાના ઢાંકણ વડે કટ કરો.
એક કઢાઈમાં તેલ ગરમ કરો. તેલ ગરમ થાય એટલે ગેસની આંચ ધીમી મધ્યમ કરી દો. હળવેથી એક ડોનટ ઉંચકો અને હળવેથી તેલમાં તળવા માટે નાખો. બધા ડોનટ્સને ગુલાબી રંગના તળી લો. ડોનટ્સને એક ઝારા વડે બહાર કાઢી પ્લેટમાં ગોઠવી દો અને ઠંડા થવા દો.
એક બાઉલમાં લિક્વીડ ચોકલેટ લો. ડોનટની એક સાઈડ ચોકલેટ લીક્વીડમાં ડીપ કરો અને બહાર કાઢીને ચોકલેટની લેયર ઉપર રહે એમ પ્લેટમાં ગોઠવી દો. બધા ડોનટ્સ પર ચોકલેટની લેયર કર્યા બાદ ડોનેટના ચોકલેટ વાળા ભાગ પર સુગર સ્પ્રિંકલ અથવા ચોકલેટ સ્પ્રિંકલ અથવા વરીયાળી પીપરનો છંટકાવ કરી દો.
બાળકો માટે ડેઝર્ટ તૈયાર છે!
