નિર્દેશક મેહુલકુમારમાં એવી ખાસિયત હતી કે લેટલતીફ કલાકારો સમયસર સેટ પર આવી જતાં હતા. શત્રુધ્ન સિંહા 
અને ગોવિંદા સેટ પર મોડા આવવા બાબતે બદનામ રહ્યા છે. મેહુલકુમાર એમને પોતાની રીતે સમજાવવામાં સફળ રહ્યા હતા એના કિસ્સા એક મુલાકાતમાં કહ્યા છે. શત્રુધ્ન સાથે એક જ ફિલ્મ ‘નાઇન્સાફ’ (1989) કરી હતી. જ્યારે એમણે શત્રુધ્નને સેટ પર સમયસર આવવા બાબતે વાત કરી ત્યારે એમણે કહ્યું કે સેટ પર કોઈને કોઈ મોડું આવે છે અને શુટિંગ જલદી શરૂ થતું નથી તેથી તે સમય પર આવતા નથી.
મેહુલકુમારે કહ્યું કે આપણે આવતીકાલે એ રેકોર્ડ તોડી નાખીએ. સવારે દસ વાગે શુટિંગ શરૂ થઈ જશે અને પહેલો આપનો જ શૉટ લેવામાં આવશે. શત્રુધ્નએ હા પાડી અને મેહુલકુમારે યુનિટને કહ્યું ત્યારે બધા હસવા લાગ્યા હતા. કોઈ એ માની શકતું ન હતું કે શત્રુધ્ન સવારે દસ વાગે સમયસર આવી શકે. બધાના આશ્ચર્ય વચ્ચે શત્રુધ્ન પોણા દસ વાગે જ હાજર થઈ ગયા અને બધાને ખોટા પાડ્યા. જોકે, શત્રુધ્નએ એ દિવસનું શુટિંગ પૂરું થયા પછી કહ્યું હતું કે હવે ફરી આમ સમયસર આવી શકાશે નહીં! પણ ગોવિંદા એમની ફિલ્મના સેટ પર સમયસર આવતો થઈ ગયો હતો.
ફિલ્મ ‘આસમાન સે ઊંચા’ (1989) નું કાશ્મીરમાં શુટિંગ ચાલી રહ્યું હતું ત્યારે બરફમાં ફાઇટના દ્રશ્યો હતા. સોનમને એક ગુંડો છેડે છે ત્યારે ત્યાં ગોવિંદા આવે છે અને એને બચાવવા ફાઇટ કરે છે. બરફને કારણે એક દિવસ માટે શુટિંગ અટકાવવું પડ્યું હતું. ગોવિંદાને બીજી જગ્યાએ જવાનું હતું. મેહુલકુમારે કહ્યું કે તું એક દિવસ રોકાઈ જા. ફરીથી યુનિટ લઈને આવવાનું મુશ્કેલ બનશે. ગોવિંદાએ વાત માની નહીં અને કહ્યું કે મારે જવું પડે એમ છે. મેહુલકુમારે કહ્યું કે હું તારા વગર શુટિંગ કરી લઇશ.
ગોવિંદાને નવાઈ લાગી હતી કે એના વગર કેવી રીતે કામ થઈ શકે? અને મેહુલકુમારે ઉસ્માન નામના ડુપ્લિકેટને આંખો પર મોટા કાળા ચશ્મા પહેરાવી ફાઇટના દ્રશ્યોનું શુટિંગ કરી લીધું હતું અને ગોવિંદાના ક્લોઝઅપ મુંબઈમાં લીધા હતા. કાશ્મીરમાં બરફમાં ફિલ્માવવામાં આવેલા એ લાંબા ફાઇટ દ્રશ્યોમાં ગોવિંદા શરૂઆતમાં ચશ્મા ઉતારીને પોતાનો ચહેરો બતાવતો દેખાય છે. ત્યારે ગોવિંદાએ સ્વીકાર્યું હતું કે તમારી સાથે મારે શિસ્તમાં કામ કરવું પડશે. નહીંતર તમે ગમે ત્યાં મારો ડુપ્લિકેટ ઉપયોગમાં લઈને દ્રશ્ય પૂરું કરી દેશો!
