Cooking Tips

ઉપમા, બટેટા પૌંઆ

0

નાસ્તો હેલ્ધી રહે એ માટે, બટેટા પૌંઆ બનાવતી વખતે વઘારમાં લીલાં વટાણાં તેમજ ઉપમા બનાવો ત્યારે વઘારમાં લીલાં વટાણાં તેમજ ગાજરનાં ટુકડાં સમારીને નાંખો તો નાસ્તામાં રંગત આવી જશે.

રવા ઈડલી

0

રવાની ઈડલી સોફ્ટ બનાવવા માટે, અળદની દાળ ચાર-પાંચ કલાક પલાળીને વાટી નાંખવી અને એમાં ઈડલીનો રવો મિક્સ કરો. તેમજ થોડા પલાળેલા પૌંઆ મિક્સીમાં પિસીને એને પણ મિક્સ કરો. (પૌંઆને બદલે રાંધેલાં ભાત પણ મિક્સીમાં ક્રશ કરીને ઉમેરી શકો છો). આ મિશ્રણ 7-8 કલાક માટે પલાળી રાખો.

(નોંધઃ રવાની ઈડલી માટે ચોખાનો રવો મળે છે. પણ તમે ઘઉંનો રવો પણ વાપરી શકો છો, આ ઈડલી પણ બહુ જ સ્વાદિષ્ટ બને છે. એમાં તમે ભાવતાં વેજિટેબલ્સ ઉમેરી શકો છો.

ફરાળી રાજગરાની પુરી

0

ફરાળી રાજગરાની પુરી નરમ બને એ માટે, લોટ બાંધતી વખતે એમાં એક બાફેલું બટેટુ ઉમેરો. અથવા પાકું કેળું પણ ઉમેરી શકો.

 

શિયાળો આવ્યો, તંદુરસ્તી લાવ્યો…

0

શિયાળો આવી ગયો છે, હેલ્ધી ખાવાનું શું ખાશો?

  • લીલું લસણ ધોઈને ઝીણું સમારીને દેશી ઘીમાં થોડા પ્રમાણમાં સાંતળીને બાજરાના લોટમાં ઉમેરો, તેમજ સ્વાદ માટે આદુ-મરચાંની પેસ્ટ તેમજ કોથમીર સમારીને નાંખો અને રોટલાનો લોટ બાંધો.
  • બાજરીના વડાનો નાસ્તો ચા સાથે જામશે.
  • મેથીની ભાજીના મૂઠીયા અથવા થેપલા બનાવો એમાં તલ ઉમેરો.
  • લીલીછમ્મ પોંકમાં લીંબુ નીચોવી મરીની સેવ સાથે ખાઓ અથવા પોંકના ભજીયા બનાવો.
  • લીલાં તુવેર તથા વટાણાની લીલવા કચોરી બહુ જ ટેસ્ટી લાગે છે.
  • અડદિયું, મેથીપાક તો પૌષ્ટિક છે જ પણ ખજૂરમાં સૂકો મેવો ક્રશ કરીને તેમજ સૂકું કોપરું ઉમેરીને બનાવેલા લાડવા પણ બહુ જ પૌષ્ટિક છે.
  • ઉંધિયું તેમજ ગાજરનો હલવો તો શિયાળુ વાનગી છે જ.

દાળ

0

તુવેર દાળ બાફતી વખતે એમાં થોડાં શિંગદાણા અને સુરણના થોડાં કટકા ઉમેરો અને જો સ્વાદ પસંદ હોય તો 1-2 સરગવાની શિંગ છોલીને કટકા કરીને ઉમેરશો તો દાળના સબડકા કંઈક જુદા જ લાગશે.

 

શાકભાજીને લીલાં કેમ રાખશો?

0

શાકભાજીનો રંગ રાંધ્યા પછી પણ લીલો કેવી રીતે જાળવશો?

  • પાલખ-પુલાવનો લીલો રંગ જળવાઈ રહે તે માટે પુલાવ બનાવતા પહેલાં, પાલખને ઊકળતા પાણીમાં નાખીને તુરંત કાઢી લીધા બાદ બરફવાળા ઠંડા પાણીમાં થોડીવાર રાખી મૂકવી અથવા ફ્રીજમાં પણ મૂકી શકો છો. ત્યારબાદ પાલખની ગ્રેવી બનાવવી.
  • શાકભાજીનો રંગ જળવાઈ રહે તે માટે શાકભાજી બાફતી વખતે પાણીમાં થોડુંક મીઠું (નમક) ઉમેરવું. શાક બફાઈ ગયા બાદ એને તુરંત બરફના ટુકડા નાખેલા ઠંડા પાણીમાં નાખવા.
  • ફ્લાવરનો રંગ સફેદ જળવાઈ રહે તે માટે ફ્લાવરને બાફતી વખતે પાણીમાં થોડુંક મીઠું(નમક) તેમજ દૂધ ઉમેરવું.

ઉપરની પ્રક્રિયા કરવાનો સમય ના હોય તો શાક સુધારીને તુરંત વઘાર કરતી વખતે તેલમાં થોડીક હળદર ઉમેરો. અથવા શાકનો વઘાર કર્યા પછી એમાં સાકરના થોડાંક દાણાં ઉમેરો. અને ઢાંકણ ઢાંક્યા વગર શાક રાંધો.

છોલે

0

છોલે બાફતી વખતે થોડીક (1 ચમચા જેટલી) ચાની ભૂકી બારીક મલમલના કાપડમાં બાંધીને એની પોટલી છોલેની સાથે પાણીમાં મૂકવી. છોલેનો રંગ અને સ્વાદ વધી જશે. છોલે (કાબૂલી ચણાં) બાફતાં પહેલાં 8-10 કલાક પાણીમાં પલાળેલા હોવા જોઈએ. ચણા બફાઈ ગયા બાદ કાંદા અને કોપરાંની ગ્રેવી કરો એમાં થોડો ફુદીનો પણ ઉમેરો. છોલે વધુ સ્વાદિષ્ટ થશે.

ચટાકેદાર પાઉંભાજી

0

પાઉંભાજીની ભાજીમાં આખા કાશ્મીરી મરચાં થોડાંક કલાક માટે હુંફાળા પાણીમાં પલાળ્યા બાદ મિક્સીમાં પીસીને થોડું તેલ ગરમ કરીને એમાં સાંતડ્યા બાદ, સાંતડેલા કાંદા-ટમેટાંમાં ઉમેરવાથી ભાજીમાં અનેરો સ્વાદ અને રંગ આવી જશે.

ગુલાબજાંબુ

0

ગુલાબજાંબુમાં સ્વાદ વધારવા માવાના ગોળા વાળતી વખતે તેમાં એક એલચીનો દાણો ઉમેરવો તથા ગુલાબજાંબુ ધીમી આંચે તળવા. ચાસણીમાં એલચીનો પાવડર તથા ગુલાબની પાંખડીઓ ઉમેરો. 

બ્રેડ પિઝ્ઝા

0

પિઝ્ઝા બનાવવામાં મેંદાના તૈયાર રોટલાને બદલે તમે ઘઉંની બ્રેડનો ઉપયોગ કરી શકો છો.

પિઝ્ઝાને વધુ હેલ્ધી બનાવવા માટે તમે ટોપિંગ્સમાં તાજી મકાઈના દાણા બાફીને તેમજ પનીર તથા ઓલિવ નાખી શકો છો (સ્વાદ પસંદ હોય તો પાલખ સુધારીને સાંતડીને ઉમેરી શકો છો.)

પિઝ્ઝા ધીમી આંચે શેકવા તેમજ પૅન અથવા તવાનું બોટમ જાડું ને મજબૂત હોવું જરૂરી છે.