Home Blog Page 900

પતંજલિએ માત્ર રૂ. 14,000માં લોન્ચ કર્યું ઇલેક્ટ્રિક સ્કૂટર?

નવી દિલ્હીઃ છેલ્લા કેટલાક દિવસોથી અલગ-અલગ વેબસાઇટ્સ પર એવી માહિતી ફેલાઈ રહી છે કે પતંજલિ કંપની પોતાનું ઇલેક્ટ્રિક ટૂ-વ્હીલર લોન્ચ કરી રહી છે. પતંજલિ બ્રાન્ડ સામાન્ય રીતે ઔષધિઓ, સાબુ અને અન્ય દૈનિક વપરાશનાં ઉત્પાદનો માટે જાણીતી છે, પરંતુ શું પતંજલિ ખરેખર ઇલેક્ટ્રિક સ્કૂટર લઇને આવી રહી છે? ચાલો જાણીએ…

ઇલેક્ટ્રિક ટૂ-વ્હીલર માર્કેટનું ભવિષ્ય બહુ ઊજળું માનવામાં આવે છે, જોકે હાલમાં બજારમાં તેની ખપત 10 ટકાથી પણ ઓછી છે. છતાં, લોકોને વધતી રુચિને ધ્યાનમાં રાખી ઘણા નવા સ્ટાર્ટઅપ્સ ઊભા થયાં છે.

એ જોવું રસપ્રદ રહેશે કે શું યોગ ગુરુ બાબા રામદેવ, જે પતંજલિનો મુખ્ય ચહેરો છે, ટેલિવિઝન સ્ક્રીન પર ઇલેક્ટ્રિક સ્કૂટર ચલાવતા જોવા મળે અને તેની વિશેષતાઓ જણાવી રહ્યા હોય.

આ મહિનાની શરૂઆતમાં કેટલીક વેબસાઇટ્સ, જેમ કે EVMechanica, એ પતંજલિના ઇલેક્ટ્રિક સ્કૂટર વિશે નીચેની વિગતો આપી છે:

– મહત્તમ રેન્જ – 440 કિલોમીટર
– બેટરી પ્રકાર – લિથિયમ આયન (ડિટેચેબલ)
– ચાર્જિંગ સમય – 4-5 કલાક
– મહત્તમ સ્પીડ – 60 કિમી પ્રતિ કલાક
– કિંમત – રૂ. 14,000 (પ્રારંભિક ઓફર)
– વજન – 75-80 કિલોગ્રામ
– બ્રેકિંગ સિસ્ટમ – ડ્રમ (ફ્રન્ટ અને રિયર)
– રંગ – સફેદ, બ્લુ, ગ્રે, કાળો

આ સ્પેસિફિકેશન્સ જોઈને કોઈ પણ ઓટોમોબાઇલ જ્ઞાન ધરાવતી વ્યક્તિ કહી શકે કે આ માહિતી ઘણા હદ સુધી અસંભવ જેવી લાગે છે. એક વાર ચાર્જિંગ પર 440 કિમી રેન્જનો દાવો બહુ મોટો છે.

અંતે કહી શકાય કે પતંજલિ તરફથી આવતી સ્કૂટરની વાતો હાલમાં ખોટી જણાઈ રહી છે અને તેની પુષ્ટિ માટે કોઈ સત્તાવાર જાહેરાત નથી કરવામાં આવી.

શિવસેના (UBT) સાથેના ગઠબંધન પર રાજ ઠાકરેએ આપ્યું નિવેદન

મહારાષ્ટ્રના રાજકારણમાં અટકળોનો તબક્કો ચાલુ છે. મહારાષ્ટ્રમાં મ્યુનિસિપલ ચૂંટણી પહેલા ઉદ્ધવ ઠાકરેની શિવસેના (UBT) અને રાજ ઠાકરેની MNS વચ્ચે ગઠબંધન થવાની શક્યતાઓ છે. હવે આ બધી અટકળો પર રાજ ઠાકરેની પાર્ટી મનસે તરફથી એક નિવેદન બહાર આવ્યું છે. મનસેના વરિષ્ઠ નેતા સંદીપ દેશપાંડેએ કહ્યું છે કે મનસેના વડા રાજ ઠાકરે ઉદ્ધવની શિવસેના (UBT) સાથે ગઠબંધન પર ત્યારે જ વિચાર કરશે જો તેમની તરફથી કોઈ નક્કર દરખાસ્ત આવશે.

અમને ફક્ત દગો મળ્યો છે: મનસે

મહારાષ્ટ્ર નવનિર્માણ સેના (MNS) ના નેતા સંદીપ દેશપાંડેએ શિવસેના (UBT) સાથેના જોડાણ અંગે પત્રકારો સાથે વાત કરતા એક નક્કર પ્રસ્તાવની માંગ કરી. તેમણે કહ્યું કે અમે અગાઉ પણ ગઠબંધન માટે પ્રસ્તાવ મોકલ્યા હતા, પરંતુ અમને ફક્ત વિશ્વાસઘાત જ મળ્યો. દેશપાંડેએ કહ્યું કે જો તેઓ ઇચ્છતા હોય કે આપણે સાથે આવીએ તો તેમણે રાજ ઠાકરેને અવિશ્વાસ પ્રસ્તાવ મોકલવો જોઈએ. રાજ ઠાકરે આ અંગે યોગ્ય નિર્ણય લેશે.

રાજ ઠાકરેએ આપ્યો હતો મોટો સંકેત

રાજ ઠાકરેએ તાજેતરમાં એક ઇન્ટરવ્યુ દરમિયાન સંકેત આપ્યો હતો કે શિવસેના (UBT) સાથે જોડાણ માટે વાતચીતનો વિકલ્પ ખુલ્લો છે. જોકે, મનસે નેતા સંદીપ દેશપાંડેએ સ્પષ્ટતા કરી છે કે રાજ ઠાકરેએ ક્યાંય ઉદ્ધવની પાર્ટી સાથે સીધા જોડાણની વાત કરી નથી. તેમના મતે, રાજ ઠાકરેએ કહ્યું હતું કે જો શિવસેના (UBT) ગઠબંધનમાં રસ ધરાવે છે તો તે તેના પર વિચાર કરશે. એકનાથ શિંદેના નેતૃત્વ હેઠળની શિવસેના પણ MNS સાથે ગઠબંધન કરવાનો પ્રયાસ કરી રહી છે કે કેમ તે પ્રશ્નના જવાબમાં દેશપાંડેએ કહ્યું કે હજુ સુધી એકનાથ શિંદે તરફથી કોઈ સત્તાવાર સંદેશ આવ્યો નથી.

રાજ અને ઉદ્ધવ પિતરાઈ ભાઈ-બહેન છે

તમને જણાવી દઈએ કે રાજ ઠાકરે અને ઉદ્ધવ ઠાકરે પિતરાઈ ભાઈ-બહેન છે. રાજ ઠાકરે એક સમયે અવિભાજિત શિવસેનાનો મોટો ચહેરો હતા. જોકે, મતભેદોને કારણે, તેમણે 2005 માં શિવસેનાથી અલગ થઈ ગયા. આ પછી રાજ ઠાકરેએ 2006 માં તેમની પાર્ટી મહારાષ્ટ્ર નવનિર્માણ સેના (MNS) ની સ્થાપના કરી. છેલ્લા કેટલાક સમયથી રાજ ઠાકરે અને ઉદ્ધવ ઠાકરેના નિવેદનોથી એવી અટકળો શરૂ થઈ છે કે લગભગ બે દાયકા પછી બંને નેતાઓ તેમના મતભેદોને બાજુ પર રાખીને ફરીથી સાથે આવી શકે છે.

સેનાપ્રમુખ સાથે મતભેદને કારણે શું મોહમ્મદ યુનૂસ રાજીનામું આપશે?

નવી દિલ્હીઃ શેખ હસીનાની સરકાર પતન પછી એક વાર ફરીથી બાંગ્લાદેશના રાજકારણમાં ભૂકંપ આવવાની શક્યતા છે. ઘણા સમયથી સરકાર અને સેના વચ્ચે ચાલી રહેલી તણાવભર્યા સંબંધોના પગલે બાંગ્લાદેશની અંતરિમ સરકારના પ્રમુખ મોહમ્મદ યુનુસના રાજીનામાના અહેવાલો છે, જેના કારણે બાંગ્લાદેશનું રાજકારણ ગંભીર સંકટમાં મુકાય એવી શક્યતા છે.

બાંગ્લાદેશમાં મોહમ્મદ યુનુસ માટે અસરકારક રીતે કામ કરવું સતત મુશ્કેલ બની રહ્યું છે. જેને કારણે તેઓ રાજીનામું આપવાની વિચારણા કરી રહ્યા છે. ગુરુવાર સાંજે નેશનલ સિટિઝન પાર્ટી (NCP)ના સંયોજક નાહિદ ઇસ્લામે મહમ્મદ યુનૂસ સાથે મુલાકાત કરી.

મુલાકાત પછી નાહિદે જણાવ્યું હતું કે યુનુસસાહેબે મને કહ્યું હતું કે મને બંધક બનાવવામાં આવ્યો છે, હું આ રીતે કામ નથી કરી શકતો. શું તમામ રાજકીય પક્ષો એકમત થઈ શકતા નથી?

યુનુસના નેતૃત્વ હેઠળ રચાયેલી અંતરિમ સરકારને રાજકીય પક્ષોનો પૂરતો ટેકો નથી મળતો. પક્ષો વચ્ચેના સંઘર્ષ અને અસહમતીઓને કારણે સરકારના નિર્ણયો અસરકારક રીતે અમલમાં આવી શકતા નથી. પરિણામે, શાસન કાર્યમાં વિઘ્નો ઊભાં થઈ રહ્યાં છે અને યુનુસ માટે શાસન કરવું મુશ્કેલ બન્યું છે.

વચગાળાની સરકાર રચાયા બાદથી બાંગ્લાદેશમાં અલ્પસંખ્યકો, ખાસ કરીને હિંદુ સમુદાય પર હુમલાઓ વધી ગયા છે. યુનુસે વારંવાર ચેતવણી આપી છે કે જો આ હિંસા નહીં અટકે તો તેઓ રાજીનામું આપી દેશે. તેમનું માનવું છે કે શાંતિપૂર્ણ અને સમાવિષ્ટ સમાજની સ્થાપના વિના શાસન કરવું શક્ય નથી.

બાંગ્લાદેશની સેના અને અંતરિમ સરકાર વચ્ચે મતભેદ વધી રહ્યા છે. સેના પ્રમુખ જનરલ વકાર-ઉઝ-ઝમાને ડિસેમ્બરમાં ચૂંટણી કરવાની માગ કરી છે, જ્યારે સરકાર તારીખ નક્કી કરવામાં નિષ્ફળ રહી છે. આ ઉપરાંત સેનાએ મ્યાનમાર સાથે જોડાયેલી ‘રખાઇન કોરિડોર’ યોજના સામે વિરોધ વ્યક્ત કર્યો છે, જેના કારણે સરકાર અને સેના વચ્ચેનો તણાવ વધુ ઘેરો થયો છે.

સલમાનના ફ્લેટમાં ઘુસેલી ઈશા છાબરિયા કોણ છે? પૂછપરછ દરમિયાન થયો મોટો ખુલાસો

બોલિવૂડના ભાઈજાન સલમાન ખાનના ઘરમાં ઘૂસીને તેમના ફ્લેટ સુધી પહોંચવાના કેસમાં ધરપકડ કરાયેલી મહિલાની ઓળખ હવે ઈશા છાબરિયા તરીકે થઈ છે. તે મહિલા સલમાનના ફ્લેટ પર પહોંચી હતી અને તેનો દરવાજો પણ ખટખટાવ્યો હતો. હવે પૂછપરછ દરમિયાન મહિલાએ કહ્યું કે સલમાન ખાને પોતે તેને ફોન કર્યો હતો. જે બાદ પોલીસે આ મામલે તપાસ તેજ કરી દીધી છે. ચાલો જાણીએ કે મહિલાએ પોલીસ સમક્ષ બીજું શું ખુલાસો કર્યો.

મહિલાનો દાવો- સલમાને તેને ફોન કર્યો હતો

ઈન્ડિયા ટુડેના અહેવાલ મુજબ, ધરપકડ કરાયેલી મહિલા ઈશા છાબરિયાએ પૂછપરછ દરમિયાન પોલીસને જણાવ્યું હતું કે તે એક મોડેલ છે, જે છ મહિના પહેલા એક પાર્ટીમાં સલમાન ખાનને મળી હતી. ત્યારે સલમાન ખાને તેને પોતાના ઘરે આમંત્રણ આપ્યું હતું. ખારની રહેવાસી ઈશાએ જણાવ્યું કે બિલ્ડિંગ પરિસરમાં પ્રવેશ્યા પછી, જ્યારે તેણે ફ્લેટનો દરવાજો ખખડાવ્યો, ત્યારે સલમાનના પરિવારના એક સભ્યએ દરવાજો ખોલ્યો. જોકે, જ્યારે તેઓએ તેને ઓળખવાનો ઇનકાર કર્યો, ત્યારે બિલ્ડિંગ સ્ટાફે તરત જ તેને પોલીસને સોંપી દીધી.

ઈશાના દાવાઓનો કોઈ પુરાવો નથી

જોકે, અત્યાર સુધી ઈશાના આ દાવાઓના કોઈ પુરાવા મળ્યા નથી. તેથી તેમના પર વિશ્વાસ કરી શકાય નહીં. કેટલાક અહેવાલોમાં એવો પણ દાવો કરવામાં આવ્યો છે કે ઈશા ફિલ્મમાં ભૂમિકા માટે સલમાનને મળવા માંગતી હતી. સલમાને તેમને આ બાબતે વાત કરવા માટે એપોઇન્ટમેન્ટ પણ આપી હતી.

Y+ શ્રેણીની સુરક્ષા હોવા છતાં, ભૂલ થઈ

સલમાન ખાનને મહારાષ્ટ્ર સરકાર તરફથી Y+ શ્રેણીની સુરક્ષા મળી છે. પરંતુ હજુ પણ તેમની સુરક્ષામાં ભૂલનો એક કિસ્સો પ્રકાશમાં આવ્યો છે, જે પ્રશ્નો ઉભા કરે છે. ઈશા પહેલા મંગળવારે જિતેન્દ્ર કુમાર સિંહ નામનો એક યુવક પણ સલમાનના એપાર્ટમેન્ટ કોમ્પ્લેક્સમાં ઘૂસી ગયો હતો.

કોંગ્રેસને બાંગ્લાદેશી, પાકિસ્તાનીઓના જોઈએ છે મતઃ નિશિકાંત દુબે

નવી દિલ્હીઃ ઓપરેશન સિંદૂરની માહિતી પાકિસ્તાનને આપવાને મામલે કોંગ્રેસ સાંસદ રાહુલ ગાંધી સતત મોદી સરકાર અને વિદેશમંત્રી એસ. જયશંકરને ઘેરી રહ્યા છે. એ દરમ્યાન લોકસભા સાંસદ નિશિકાંત દુબેએ 1991ના ભારત-પાકિસ્તાન સમજૂતીને લઈને કોંગ્રેસ પર જ હુમલો કર્યો છે. તેમણે સવાલ કર્યો છે કે ભારતીય સેનાના મુવમેન્ટ્સ અને યુદ્ધાભ્યાસની માહિતી પાકિસ્તાનને આપવાની સમજૂતો કેમ કરવામાં આવી હતી?

વાસ્તવમાં, કોંગ્રેસે વિદેશમંત્રી એસ. જયશંકરને નિશાન બનાવતાં કહ્યું હતું કે પાકિસ્તાનને પહેલેથી જ હુમલાની જાણકારી કેમ આપી? આ મુદ્દે નિશિકાંત દુબેએ એક દસ્તાવેજ રજૂ કર્યો છે. તેમણે X (હવે ટ્વિટર) પર આ દસ્તાવેજ શેર કર્યો છે. ભારત અને પાકિસ્તાન વચ્ચે 1991માં થયેલી સમજૂતી અનુસાર બંને દેશો સૈન્યાભ્યાસ અંગે પહેલેથી જ એકબીજાને જાણ કરશે. બંને દેશો સેનાનાr મgવમેન્ટ અંગે પણ માહિતી શેર કરશે.

નિશિકાંત દુબેએ સવાલ કર્યો હતો કે  શું આ સમજૂતી દેશદ્રોહ છે?
ભાજપ નેતા નિશિકાંત દુબેએ X પર પોસ્ટ કરીને કોંગ્રેસને નિશાન બનાવ્યું છે. તેમણે લખ્યું હતું કે રાહુલ ગાંધીજી, આ તો તમારી જ સરકારના સમયમાં કરાયેલ સમજૂતી છે. 1991માં તમારી પાર્ટી સમર્થિત સરકારે આ સમજૂતી કરી હતી કે કોઈ પણ હુમલા અથવા સેનાની હલચલની જાણકારી ભારત અને પાકિસ્તાન એકબીજાને આપશે. શું આ સમજૂતી દેશદ્રોહ છે? કોંગ્રેસનો હાથ પાકિસ્તાની મતબેંક સાથે છે.

ભાજપ સાંસદ નિશિકાંત દુબે કહે છે કે “અમે 1947થી જ પાકિસ્તાનને આતંકવાદી દેશ માનતા આવ્યા છીએ. અમે 78 વર્ષથી કાશ્મીરના મુદ્દા પર લડી રહ્યા છીએ અને અમારી ધરતી પર પાકિસ્તાને કબજો કર્યો છે. છતાં પણ કોંગ્રેસે તેમને રાહતો આપી છે – પછી તે 1950ની નેહરુ-લિયાકત સમજૂતી હોય, સિંધુ જળ સંધિ હોય કે 1975ની શિમલા સમજૂતી હોય.

ભાજપ સાંસદે કહ્યું કે અમે સંસદમાં કદી પણ આ અંગે ચર્ચા કરતા નથી કે કોઈ દેશની રક્ષણ વ્યવસ્થા કેવી રીતે કાર્ય કરે છે. પરંતુ 1991માં જ્યારે ચંદ્રશેખરના નેતૃત્વવાળી સરકારને તમે સમર્થન આપી રહ્યા હતા અને 1994માં જયારે પી.વી. નરસિંહ રાવની સરકાર હતી ત્યારે આ સમજૂતી અમલમાં મૂકી હતી અને તેમાં લખ્યું હતું કે સેના, નૌસેના ક્યાં તૈનાત રહેશે અને વાયુસેના કેવી રીતે કાર્ય કરશે. શું આ બધી વાતો દેશદ્રોહ નથી?

નીતા મુકેશ અંબાણી કલ્ચરલ સેન્ટર ન્યૂ યોર્કમાં 3 દિવસીય કાર્યક્રમનું આયોજન કરશે

નીતા મુકેશ અંબાણી કલ્ચરલ સેન્ટરે જાહેરાત કરી છે કે તે આ વર્ષે સપ્ટેમ્બરમાં અમેરિકાના ન્યુ યોર્કમાં ‘નીતા મુકેશ અંબાણી કલ્ચરલ સેન્ટર ઇન્ડિયા વીકેન્ડ’નું પ્રથમ સંસ્કરણ યોજશે. આ કાર્યક્રમ 12 થી 14 સપ્ટેમ્બર, 2025 દરમિયાન ડેવિડ એચ. કોચ થિયેટરમાં યોજાશે.

આપણે ભારત વિશે દુનિયાને કંઈક બતાવવું પડશે: નીતા અંબાણી

આ અંગે બોલતા, NMACC ના સ્થાપક અને અધ્યક્ષા નીતા અંબાણીએ જણાવ્યું હતું કે ભારતમાં વિશ્વની શ્રેષ્ઠતા દર્શાવવી અને ભારતની શ્રેષ્ઠતા વિશ્વ સમક્ષ લાવવાનું તેમનું હંમેશા લક્ષ્ય રહ્યું છે. અમે નીતા મુકેશ અંબાણી કલ્ચરલ સેન્ટર ઇન્ડિયા વીકેન્ડને પહેલી વાર ન્યૂ યોર્ક શહેરમાં લાવવા માટે ઉત્સાહિત છીએ! તે ભારતના સાંસ્કૃતિક વારસા – આપણી કલા, હસ્તકલા, સંગીત, નૃત્ય, ફેશન અને ખોરાકના વૈશ્વિક ઉજવણી તરીકે રચાયેલ છે.

આ ખાસ શો સાથે કાર્યક્રમની શરૂઆત થશે

નીતા અંબાણીએ જણાવ્યું હતું કે આ મહોત્સવની શરૂઆત ભારતના સૌથી ભવ્ય નાટ્ય નિર્માણ ‘ધ ગ્રેટ ઇન્ડિયન મ્યુઝિકલ: સિવિલાઇઝેશન ટુ નેશન’ના યુએસ પ્રીમિયરથી થશે. જેનું દિગ્દર્શન ફિરોઝ અબ્બાસ ખાન દ્વારા કરવામાં આવ્યું છે. આ શોમાં 5000 ઈ.સ. પૂર્વેથી 1947માં સ્વતંત્રતા સુધીની ભારતની સફર દર્શાવવામાં આવી છે. નૃત્ય, કલા, ફેશન અને સંગીતનું અદ્ભુત પ્રદર્શન હશે.

ઉદ્ઘાટન સમારોહમાં ‘સ્વદેશ ફેશન શો’ યોજાશે

કાર્યક્રમનો ઉદ્ઘાટન સમારોહ 12 સપ્ટેમ્બરના રોજ યોજાશે. જેમાં ‘સ્વદેશ ફેશન શો’ હશે. તેનું સંચાલન પ્રખ્યાત ડિઝાઇનર મનીષ મલ્હોત્રા કરશે. તે ભારતના પ્રખ્યાત પરંપરાગત વણકર અને કુશળ કારીગરોનું પ્રદર્શન કરશે. ત્યારબાદ સાંજે પ્રાચીન ભારતથી લઈને આધુનિક ભારત સુધીની વાનગીઓ અને સ્વાદોની ખાસ રજૂઆત થશે. આ મિશેલિન-સ્ટાર શેફ વિકાસ ખન્ના દ્વારા કરવામાં આવશે.

આ બોલિવૂડ ગાયકો પોતાનો જાદુ બતાવશે

બોલીવુડ ગાયકો શંકર મહાદેવન, શ્રેયા ઘોષાલ અને શાસ્ત્રીય સંગીતકાર ઋષભ શર્માના સંગીત સમારોહ ઉપરાંત, આ કાર્યક્રમમાં લિંકન સેન્ટર ખાતે ધ ગ્રેટ ઇન્ડિયન મ્યુઝિકલ: સિવિલાઇઝેશન ટુ નેશનના પાંચ પ્રદર્શન પણ રજૂ કરવામાં આવશે.

રાજ્યમાં વાવાઝોડાની આગાહી વચ્ચે ભારે વરસાદની શક્યતા

અમદાવાદઃ હવામાન વિભાગની આગાહી અનુસાર રાજ્યમાં કમોસમી વરસાદ પડી શકે છે. દક્ષિણ ગુજરાત અને સૌરાષ્ટ્રમાં આગામી કેટલાક દિવસ ભારે વરસાદ વરસી શકે છે. અરબી સમુદ્રમાં સર્જાયેલું લો પ્રેશરને કારણે વરસાદ ખાબકવાની શક્યતા છે. રાજ્યના સુરત, વલસાડ, નવસારી, તાપી, દાદરાનગર હવેલી, દમણ, ગીર સોમનાથ, અમરેલી, ભાવનગર, દીવ, રાજકોટ અને જામનગર સહિતના જિલ્લાઓમાં વરસાદ પડી શકે છે.

આ સાથે ઉત્તર-પૂર્વ રાજસ્થાન પર અપર એર સાયક્લોનિક સર્કયુલેશન સક્રિય થયું છે. આ એર સાયક્લોનિક સર્ક્યુલેશનને કારણે નૈઋત્યના ચોમાસાના આગમન પહેલાં જ રાજ્યમાં વરસાદી માહોલ જોવા મળી રહ્યો છે. અરબ સાગરમાં સર્જાયેલું લો પ્રેશર આજે મોડી સાંજ સુધીમાં ડિપ્રેશનમાં ફેરવાઈ શકે છે. અરબી સમુદ્રમાં ગોવા, કોંકણ પાસે સિસ્ટમ સર્જાઈ છે. આ સિસ્ટમ આગળ વધે તો ગુજરાતના વિસ્તારોમાં પણ અસર વર્તાઈ શકે છે.

સાયક્લોનિક સર્ક્યુલેશનને પગલે ગુજરાતમાં આજથી સાત દિવસ 12થી વધુ જિલ્લામાં ભારે વરસાદની હવામાન વિભાગ દ્વારા આગાહી કરવામાં આવી છે. ભારે વરસાદને પગલે અનેક જિલ્લાઓમાં ઓરેન્જ ઍલર્ટ પણ આપવામાં આવ્યું છે. આ ઉપરાંત સરકારે કન્ટ્રોલ રૂમ શરૂ કરવા પણ સૂચના આપી દીધી છે.

રાજ્યના ઘણા વિસ્તારોમાં ગુરુવારે મિની વાવાઝોડું ફૂંકાયું હતું. રાજકોટ, અમરેલી અને સુરેન્દ્રનગર જિલ્લામાં તોફાની પવન સાથે વરસાદ વરસ્યો હતો. રાજકોટ શહેર અને ગોંડલ પંથકમાં ફૂંકાયેલા ભારે પવનને કારણે અનેક વૃક્ષો, હોર્ડિગ્ઝ ધરાશાયી થયાં હતાં. ભારે પવનના કારણે ઈમારતોની બારીના કાચ તૂટી ગયા હતા.

હવામાન વિભાગે સૌરાષ્ટ્ર અને દક્ષિણ ગુજરાતના વિસ્તારોમાં 50-70 કિ.મી.ની ઝડપે પવન ફૂંકાવાની અને ગાજવીજ સાથે ભારે વરસાદને પગલે યલો એલર્ટ જાહેર કરવામાં આવ્યું છે. તેવામાં રાજ્યના CMએ એલર્ટવાળા જિલ્લાના વહીવટીતંત્રને સતર્કતા રાખવાની સૂચના આપી છે.

હવામાન વિભાગના મતે ગુજરાત નજીક અરબ સાગરમાં સર્જાયેલું લો પ્રેશર આગામી એક-બે દિવસમાં ડિપ્રેશનમાં ફેરવાય તેવી શક્યતા છે. જેને પગલે રાજ્યમાં ભારેથી અતિ ભારે વરસાદની આગાહી કરવામાં આવી છે. 23 થી 25 તારીખ દરમિયાન વિવિધ જિલ્લામાં વરસાદનું ઓરેન્જ અને યલો એલર્ટ જાહેર કરવામાં આવ્યું છે.

હવામાન નિષ્ણાંત અંબાલાલ પટેલની આગાહી કરી છે કે મુંબઈ-ગોવા પર બનેલી સિસ્ટમ ચક્રવાતમાં બદલાશે. 22 મી મે સુધીમાં લો-પ્રેશર સિસ્ટમ ચક્રવાતમાં ફેરવાશે. વાવાઝોડું 24થી 28 મે વચ્ચે ગુજરાત પહોંચી જશે. મહારાષ્ટ્રના ભાગોમાં 15થી 20 ઈંચ વરસાદ ખાબકશે. ગુજરાતના ખેડૂતો પર માવઠાના માર બાદ હવે વાવાઝોડાનું સંકટ તોળાઈ રહ્યું છે. અંબાલાલ પટેલનો દાવો છે કે ગુજરાતના માથે વાવાઝોડાનું સંકટ તોળાઈ રહ્યું છે. જેમાં અનરાધાર વરસાદ તો થશે જ, સાથે જ 100 કિમી પ્રતિ કલાકની ઝડપથી તોફાની પવન પણ ફૂંકાશે. દક્ષિણ ગુજરાતમાં ભયાનક પૂરની સ્થિતિ આવી શકે છે. ડાંગ, આહવા, વલસાડમાં 10થી 12 ઈંચ વરસાદ થશે. કચ્છ, સૌરાષ્ટ્ર સહિત ગુજરાતભરમાં ભારે વરસાદ થશે.

 

હાર્વર્ડ યુનિવર્સિટીમાં વિદેશી વિદ્યાર્થીઓના એડમિશન પર પ્રતિબંધ

વોશિંગ્ટનઃ ટ્રમ્પ વહીવટી તંત્રએ હાર્વર્ડ યુનિવર્સિટીમાં હવે વિદેશી વિદ્યાર્થીઓના એડમિશન પર પ્રતિબંધ મૂકી દીધો છે.  ટ્રમ્પ વહીવટી તંત્રના હોમલેન્ડ સિક્યુરિટી વિભાગ  દ્વારા ગુરુવારે આ સંબંધિત આદેશ જાહેર કરવામાં આવ્યો હતો. આ આદેશનો સીધો અર્થ એ થાય છે કે હવે હાર્વર્ડ યુનિવર્સિટી નવા આંતરરાષ્ટ્રીય વિદ્યાર્થીઓને પ્રવેશ આપી શકશે નહીં અને હાલ જે વિદ્યાર્થીઓ ત્યાં અભ્યાસ કરી રહ્યા છે તેમના માટે ટ્રાન્સફર લેવાનો કે કાયદેસર ઈમિગ્રેશન સ્ટેટસ ગુમાવવાનો ખતરો ઊભો થવાની શક્યતા છે.

આ પગલાથી સ્પષ્ટ છે કે ટ્રમ્પ વહીવટી તંત્ર અને હાર્વવર્ડ યુનિવર્સિટી વચ્ચે ચાલતો વિવાદ વધુ ઉગ્ર બની શકે છે.

હાર્વર્ડ યુનિવર્સિટી અમેરિકાની સૌથી પ્રતિષ્ઠિત શૈક્ષણિક સંસ્થાઓમાંની એક છે અને તેમાં દુનિયાભરના વિદ્યાર્થીઓ અભ્યાસ કરવા માટે આવે છે. હાર્વર્ડ યુનિવર્સિટી અને ટ્રમ્પ વહીવટી તંત્ર વચ્ચે લાંબા સમયથી વિવાદ ચાલી રહ્યો છે. હાર્વર્ડ યુનિવર્સિટીએ ટ્રમ્પ વહીવટી તંત્ર સામે ફેડરલ કોર્ટમાં કેસ પણ દાખલ કર્યો હતો અને સ્પષ્ટપણે જણાવ્યું હતું કે તે ટ્રમ્પ સરકારની માગણીઓને સ્વીકારીશ નહીં.

હાર્વર્ડે જણાવ્યું છે કે ટ્રમ્પ વહીવટી તંત્રનું આ પગલું સંપૂર્ણપણે ગેરકાયદે છે. આ નિર્ણયનો હાર્વર્ડ યુનિવર્સિટી પર મોટો પ્રભાવ પડશે, કારણ કે અહીં 27 ટકા વિદ્યાર્થીઓ અમેરિકા બહારના છે.

શું છે સમગ્ર મામલો?

ટ્રમ્પ વહીવટી તંત્રએ યુનિવર્સિટી પર આરોપ મૂક્યો હતો કે તેણે એવા વિદેશી વિદ્યાર્થીઓને પ્રવેશ આપ્યો છે જેમનો કેમ્પસમાં વ્યવહાર અમેરિકા વિરુદ્ધ અને આતંકવાદીઓને ટેકો આપનાર પ્રકારનો છે.

હોમલેન્ડ સિક્યોરિટી સેક્રેટરી ક્રિસ્ટી એલ. નોએમે એક નિવેદન બહાર પાડીને જણાવ્યું હતું કે હાર્વર્ડ યુનિવર્સિટીએ કેન્દ્ર સરકારની તે વિનંતીને અવગણી હતી, જેમાં કહ્યું હતું કે છેલ્લાં પાંચ વર્ષમાં હિંસક પ્રદર્શન અથવા ગેરકાયદે પ્રવૃત્તિઓમાં સામેલ વિદ્યાર્થીઓનો રેકોર્ડ આપવામાં આવે. તેમણે આ પણ કહ્યું હતું કે હાર્વર્ડે ચીનની પેરામિલિટરી ફોર્સના સભ્યોને આમંત્રિત કર્યા હતા અને તેમને તાલીમ આપી હતી.

વાસ્તુ: નૈરુત્ય અને અગ્નિનો દોષ

માણસ એક સામાજિક પ્રાણી છે. એટલે એને અમુક પ્રાણીઓ ગમવાના. કોઈને તો વળી અજગર અને વાઘ પાળવાના પણ શોખ હોય છે. પછી એક દિવસ ખબર પડે કે એ પાળેલો અજગર જ માલિકને ગળી ગયો. આજના ભૌતિકતાના યુગમાં તો પાળેલો માણસ પણ માલિકના ધંધાને ગળી જાય છે. સહુથી અવિશ્વાસુ પ્રાણી માણસ છે. એ ક્યારે શું કરશે એને કળવું અઘરું છે. કદાચ એટલે જ માણસથી બચવા લોકો જાનવરો પાળતા હશે. પણ ધીમે ધીમે માણસના સહવાસમાં જાનવરો પણ એમના જેવા થઇ જશે તો? કોઈની અદેખાઈ કરવી, સ્વાર્થ માટે કોઈને રંજાડવા, ભ્રષ્ટાચાર ખુલ્લો ના પડી જાય એ ભયથી માણસનું ખૂન કરી નાખવું જેવી ઘણી બધી બાબતો જો પ્રાણીઓ શીખી જશે તો માણસ પોતાના જ પાળેલા પ્રાણીઓનો ભોગ બની જશે. કદાચ એને જ કર્મનો સિદ્ધાંત કહેતા હશે.

મિત્રો, આ વિભાગ આપનો જ છે. આપને પણ કોઈ સમસ્યા કે સવાલ હોય તો આપ ચોક્કસ નીચે જણાવેલા ઈમેઈલ પર પૂછી શકો છો.

સવાલ: કુતરાઓની સોસાયટી હોય ખરી? અમારી સોસાયટીમાં કુતરાઓ બિન્ધાસ્ત ફરે છે. એના માલિકો પાસે સમય નથી એટલે એમણે માણસો રાખ્યા છે. માણસો પોતાના મોબાઈલમાં બીઝી હોય એટલે કુતરાઓ એની મેળે ફર્યા કરે છે. એક સાતમાં માળ વાળા અંકલ કુતરાને સાચવી નથી શકતા એટલે કુતરાને સોસાયટીની લીફ્ટમાં કે બગીચામાં ટોઇલેટ કરાવી દે છે. એવું એક નવા પાડોસી પણ કરે છે. એમનો તો છોકરો પણ લીફ્ટમાં પેસાબ કરી જાય છે. મેં એમને ટોક્યા તો કહે છે કે મારો છોકરો પણ મારા માટે તો મારા કુતરા જેવો જ છે! મોઢા પર કશું બાંધ્યા વિના કુતરાને છોડી દે એવું થોડું ચાલે. પેલા અંકલ કહે છે કે આંટીના ગયા પછી મારા માટે તો આ લુસી જ તારી આંટી છે. એને હું દુખી નહિ જોઈ શકું.

થોડા સમય પહેલા અન્ય એક જગ્યાએ  એક પાળેલા કુતરાએ ચાર લોકોને ફાડી ખાધા. મેં સોસાયટીમાં રજૂઆત કરી તો ત્યાં બેઠેલા એક જાડિયા બહેન મને બટકું ભરીને કહે આને વ્હાલ કહેવાય. ફાડી ખાધું ન કહેવાય. વ્હાલમાં કોઈ બટકા થોડું ભરે? બીજા એક નવમાં માળ વાળા બહેન કુતરાને અમારા દાદરા પર પોટ્ટી કરાવતા હતા મેં એમને રોક્યા તો કહે મારા વરને મારા માટે ટાઈમ નથી એટલે કુતરા પાળવા પડે છે. બાકી મને કુતરા પાળવાનો શોખ નથી. સોસાયટી એ જાહેર જગ્યા છે. એમાં કુતરાને ગમે તેમ ન ફરવા દેવાય. પણ આ વાત કોઈ સમજતું નથી. કોઈ કુતરો કોઈકના નાના બાળકને ફાડી ખાય એની રાહ થોડી જોવાય? વળી પેલા અંકલનો કુતરો તો બે ત્રણ નાના બાળકોને કરડી ગયો છે.

અમારી સોસાયટીમાં કુલ બત્રીસ કુતરાઓ છે. અને એમાંથી બધા જ મોઢા પર બાંધ્યા વિના ફરે છે. મ્યુંનીસીપાલીટીમાં રજીસ્ટર કરવાની વાતો કાગળ પર છે. આમેય આપણે ત્યાં હોનારત થયા પછી જ બધા એકશનમાં આવે છે. વળી પાછા એક કુતરા પ્રેમી આંટી મને સમજાવતા હતા કે મને મારા વિકાસ કરતા પણ સોસાયટીના કુતરા પર વધારે લાગણી છે. ગયા જનમમાં આ બધા મારા છોકરા હશે. સ્થૂળ કાયાનો વિકાસ ખરેખર ભયાનક છે. પણ એના માટે કુતરાને છુટ્ટા થોડા મુકાય? કોઈ વાસ્તુ દોષ હોય તો આવું થાય?

જવાબ: માણસને માણસ કરતા કુતરા સાથે વધારે પ્રેમ છે એ વાત સારી લાગે પણ માણસો એવા તે કેવા છે કે આવી સ્થિતિ ઉદ્ભવી? પ્રાણીઓને પણ અનુશાશન શીખવાડવું જોઈએ. પોતાના બાળકોને ન શીખવાડનાર મમ્મીઓને એ ન આવડે એ સ્વાભાવિક છે. પણ કુતરા પાળવા માટેના કેટલાક નિયમોને સમજવા જરૂરી છે. બાકી વ્હાલા લાગતા એ જીવ ઘાતક બની શકે છે. તમે કુતરાને દુર રાખવા માટેનું સ્પ્રે સાથે રાખો. કોઈને રંજાડવા માટે નહિ પણ સુરક્ષા માટે એ જરૂરી છે. આજકાલ સોસાયટી વિષે ઘણા સવાલો જોવા મળે છે. દરેક વ્યક્તિ સામુહિક વિચારના બદલે સ્વાર્થી વિચાર ધરાવે એવું વધી રહ્યું છે. આવા સમય આત્મસુરક્ષા એ જ ઉપાય છે.

વાસ્તુ પ્રમાણે જે જગ્યાએ નૈરુત્ય અને અગ્નિનો દોષ હોય તો આવું થઇ શકે. પણ તમારી સોસાયટીમાં તમે કશું નહિ કરી શકો. જે પ્રકારનું વાતાવરણ છે એ પ્રમાણે માત્ર પોતાને સુખી કરવાનો વિચાર કરો. કુતરા ન પાળવા એવું ન કહેવાય. પણ એને વેક્સીન અને ટ્રેઈનીંગ આપવા જરૂરી છે.

સુચન: જો કોઈ કમિટી મેમ્બર અગ્નિમાં રહેતા હોય તો સોસાયટીમાં ભૌતિકતાની અસર દેખાય.

(આપના સવાલ મોકલી આપો Email: vastunirmaan@gmail.com)

ધનવાન લોકો સાદા કપડાં કેમ પસંદ કરે છે?

ઘણી વખત આપણે અમીર લોકોને તેમનામાં પૈસા અને માભાથી ઓળખીએ છીએ. તેમના બ્રાન્ડેડ કપડાં અને એસેસરીઝ આપણી લાઈફસ્ટાઇલ પર ખૂબ મોટો પ્રભાવ પાડે છે. પરંતુ હકીકત માત્ર થોડા લોકો માટે જ સિમિત રહેતી હોય છે. આપણે ફેશન માટે હંમેશા સેલીબ્રિટીસને ફોલો કરતાં હોય છે જે માત્ર એમનો પીઆર સ્ટન્ટના ભાગ રૂપે હોય છે જે એમના કામનો હિસ્સો બને છે જયારે હકીકત સાવ વિપરીત છે. તેમની પાસે અપાર પૈસા હોય છે, તેઓ કદી ચમકતા કપડાં પહેરતાં નથી. તમે જો બિલ ગેટ્સ, માર્ક ઝુકરબર્ગ કે રતન ટાટા જેવા ધનિકોને જુઓ તો એક વસ્તુ તમારું ધ્યાન ખેંચશે. તેમના કપડાં સામાન્ય, સાદા અને એક સરખા હોય છે.

સાદગી એક સ્ટેટમેન્ટ

સાદા કપડાં પહેરવાં, એ કોઈ પસંદગી નથી. પણ ઘણી વખત તે એક વિચારધારા હોય છે. ધનિકો માટે, તેમના કપડાં માત્ર આવરણ છે, દેખાવ નહીં. તેઓ પોતાને કપડાંથી નહીં, પણ પોતાના વિચારો, કાર્યો અને સિદ્ધિઓથી ઓળખાવા માંગે છે. જ્યાં સામાન્ય લોકો પોતાના કપડાંથી પોતાને ખાસ દેખાડવાનો પ્રયાસ કરે છે, ત્યાં અમીર લોકોની ઓળખ માટે કપડાંની જરૂર નથી હોતી.

માર્ક ઝુકરબર્ગ કાયમી એક જેવા ગ્રે ટી-શર્ટ અને જીન્સ પહેરે છે. જ્યારે તેને આ વિશે પૂછવામાં આવ્યું, ત્યારે તેનો જવાબ હતો “હું મારું સમય અને ઊર્જા એ નક્કી કરવા માટે વેડફતો નથી કે આજે શું પહેરું.” એટલે, તેઓ ‘decision fatigue’ થી બચીને એનો ટાઈમ બચાવે છે. જયારે વિવિધ કપડાં અને સ્ટાઇલ એમની પર્સનાલિટી અને ઇમોશન બતાવે ત્યારે ઘણી વાર એ લોકો પ્રિડિક્ટિબીલિટી એટલે કે અનુમાનોથી બચવા આ સ્ટેપ લેતાં હોય છે.

બ્રાન્ડ નહીં, પણ વ્યક્તિત્વનું મહત્વ

સાદા કપડાં બતાવે છે કે વ્યક્તિ પોતાનાં વ્યક્તિત્વથી જુદી પડીને કંઈ સાબિત કરવા માંગતો નથી. ધનિકો જાણે છે કે સાચી કિંમત બ્રાન્ડમાં નહીં, પણ વ્યક્તિના કામ અને વિચારશૈલીમાં છે. તેઓ લોકોના ધ્યાનમાં રહેવા માટે ચમકદાર કપડાં નહિ પહેરે, પણ પોતાના વિચારોથી છાપ છોડે છે.

પૈસાદાર લોકોને લોકો સામે કશું સાબિત કરવાની જરૂર હોતી નથી બલ્કે એમનું ફોક્સ દેખાડામાં નહીં પણ કામ પર વધુ હોય છે, જેની અસર તેમની પર્સનાલિટી પર પડે છે. કેટલાય દિગ્ગજોની સાદગી એમના બ્રાન્ડનો ભાગ બની ગઈ છે. પ્લેઈન કપડા પહેરીને પણ લોકો એમના વિચારો, કાર્યો અને લીડરશિપ માટે એમને યાદ રાખે છે. સ્ટીવ જોબ્સનું કાળો ટર્ટલનેક અને બ્લુ જીન્સનો કોમ્બિનેશન એટલો ફેમસ હતો કે લોકો તેને uniforms તરીકે ઓળખતા હતાં.

સાદગી ફક્ત કપડાં પૂરતી જ હોતી નથી પણ તે જીવનની ગતિ, વિચારની ઊંડાઈ અને કાર્યની સ્પષ્ટતામાં પ્રતિબિંબિત થાય છે. Minimalism એ ફક્ત ફેશન ટ્રેન્ડ નથી, એ એક લાઈફસ્ટાઈલ છે,જે અમીર લોકો પોતાના અનુભવથી પોતે સ્વીકારી ચૂક્યા છે.

(નવસારીસ્થિત જીજ્ઞા જોગીયા વિજ્ઞાનના સ્નાતક છે. મેડિકલ ક્ષેત્રે નવી જાણકારીઓ-સંશોધનમાં રસ ધરાવવાની સાથે સાથે એ આરોગ્ય, ફેશન, વ્યક્તિતિવ વિકાસ, મહિલાઓના પ્રશ્નો જેવા વિષયો પણ લખતાં રહે છે.)

1...899900901...5,183Page 900 of 5,183