Home Blog Page 6

અમદાવાદ પછી સુરતમાં સોનાના દાગીનાની લૂંટ

સુરતઃ શહેરમાં ભાગલ ચાર રસ્તા નજીક જ 64 ગ્રામ સોનાના દાગીનાની લૂંટ થઈ છે. બંગાળી કારીગર દાગીના લઈને જઈ રહ્યો હતો, તે સમયે ત્રણ વ્યક્તિએ કારીગર પાસેથી દાગીના લૂંટી લીધા હતા. હાલમાં પોલીસ કાફલો ઘટના સ્થળે પહોંચ્યો છે અને CCTVના આધારે તપાસ શરૂ કરવામાં આવી છે. આ દાગીનાની કિંમત રૂ. છ લાખની આસપાસ હતી.

હજી થોડા દિવસ પહેલાં જ અમદાવાદના બોપલ વિસ્તારમાંથી એક જવેલર્સની દુકાનમાંથી રૂપિયા 73 લાખની લૂંટ ચલાવવામાં આવી હતી. આ લૂંટની ઘટના બાદ આસપાસમાં ભયનો માહોલ સર્જાયો હતો. લૂંટારુઓના CCTV ફુટેજ પણ સામે આવ્યા હતા. લૂંટ કરવા લૂંટારુ હેલ્મેટ પહેરીને આવ્યો હતો. ત્યારબાદ પોલીસે અલગ અલગ ટીમ બનાવીને આરોપીની ઓળખ માટે કાર્યવાહી હાથ ધરી છે.

આ પહેલાં કેશોદમાં દિવસના અજવાળે આંબાવાડી વિસ્તારમાં ઘરફોડ ચોરીનો બનાવ બનતાં પોલીસે તપાસના ચક્રો ગતિમાન કર્યા હતાં. નિમેશ કાનાબારની ફરિયાદ અનુસાર આ ચોરીમાં અંદાજિત 15થી 20 લાખની રોકડ અને 10 તોલા જેટલા સોનાના દાગીનાની ચોરી થઈ હતી.

 

આમિરે તેના પુત્રને આપ્યું વચન, લવયાપા હિટ થશે તો છોડી દેશે આ ખરાબ આદત

મુંબઈ: બોલિવૂડ સુપરસ્ટાર આમિર ખાને કથિત રીતે કહ્યું છે કે જો તેના પુત્રની બીજી ફિલ્મ ‘લવયાપા’ બોક્સ ઓફિસ પર સફળ થશે તો ધૂમ્રપાન છોડી દેશે. લવયાપા એક રોમેન્ટિક કોમેડી ફિલ્મ છે, જેમાં જુનૈદ ખાન અભિનેત્રી ખુશી કપૂર સાથે સ્ક્રીન શેર કરતો જોવા મળશે.

વિશ્વાસ છે કે ફિલ્મ હિટ થશે
અહેવાલો અનુસાર, આમિરે શપથ લીધા છે કે જો ‘લવયાપા’ થિયેટરોમાં સારું પ્રદર્શન કરશે, તો તે સંપૂર્ણપણે ધૂમ્રપાન છોડી દેશે. જો કે અભિનેતાએ પોતે આ વાતની પુષ્ટિ કરી નથી, પરંતુ તેના શપથ બતાવે છે કે તે ફિલ્મ બોક્સ ઓફિસ પર અજાયબી કરશે તેવો વિશ્વાસ છે.

ખુશીમાં જોવા મળી શ્રીદેવીની ઝલક

આ પહેલા આમિરે ANIને કહ્યું હતું કે તે આ ફિલ્મ જોઈ ચૂક્યો છે અને તેણે ખુશીમાં શ્રીદેવીની ઝલક જોઈ. તેણે કહ્યું હતું કે,’મને આ ફિલ્મ ગમી છે. તે ખૂબ જ રસપ્રદ છે. મોબાઈલ ફોનના કારણે આજકાલ આપણું જીવન કેવી રીતે બદલાઈ ગયું છે અને ટેક્નોલોજીના કારણે આપણા જીવનમાં શું રસપ્રદ ઘટનાઓ બને છે, આ બધું ફિલ્મમાં બતાવવામાં આવ્યું છે. તમામ કલાકારોએ સારું કામ કર્યું છે.’

આ ફિલ્મ આ દિવસે રિલીઝ થશે

તેણે આગળ કહ્યું, ‘જ્યારે મેં ફિલ્મ જોઈ અને ખુશીને જોઈ ત્યારે મને લાગ્યું કે હું શ્રીદેવીને જોઈ રહ્યો છું. તેની ઊર્જા ત્યાં હતી, હું તેને જોઈ શકતો હતો. હું શ્રીદેવીનો મોટો ફેન છું. અદ્વૈત ચંદન દ્વારા દિગ્દર્શિત લવાયાપા 7 ફેબ્રુઆરીએ વેલેન્ટાઈન વીકની શરૂઆતમાં સિનેમાઘરોમાં રિલીઝ થવાની છે. ‘લવયાપા’ જુનૈદ અને ખુશી બંનેની પહેલી ફિલ્મ છે, જે સિનેમાઘરોમાં રિલીઝ થશે.

સેમ અલ્ટમેન પર બહેને લગાવ્યાં જાતિય શોષણનો આરોપ

અમેરિકા: ChatGPTના પ્રણેતા અને OpenAIના CEO સેમ અલ્ટમેનની બહેને જ તેના પર જાતિય શોષણનો આરોપ મૂક્યો છે. અમેરિકાની મિસૌરી ડિસ્ટ્રિક્ટ કોર્ટમાં સેમ અલ્ટમેનની બહેન એની અલ્ટમેને પોતાના જ ભાઈ પર શારીરિક-માનસિક સતામણી કરતો હોવાની ફરિયાદ સાથે કેસ કર્યો છે. તેણે ફરિયાદમાં જણાવ્યું છે કે, સેમ અલ્ટમેન 1997થી 2006 સુધી મારા પર જાતિય શોષણ કરતો હતો. તે સમયે હું ત્રણ વર્ષની હતી અને સેમ 12 વર્ષનો. મિસૌરીમાં ક્લેટોન સ્થિત અમારા ઘરમાં જ તે વિવિધ રીતે મને શારીરિક અને માનસિક ત્રાસ આપતો હતો.

એની અલ્ટમેને આરોપમાં જણાવ્યું હતું કે, ‘અઠવાડિયામાં અનેક વખત સેમ મારા પર દુષ્કર્મ કરતો હતો. સેમના આવા વ્યવહારના કારણે મારું માનસિક સ્વાસ્થ્ય બગડ્યું હતું. તેમજ હું ડિપ્રેશન સહિત વિવિધ માનસિક તણાવોનો સામનો કરી રહી હતી. આ ઘટનાઓના લીધે હું સામાન્ય જીવન જીવી શકતી નથી.’ એનીએ જ્યુરી ટ્રાયલ સહિત પોતાના નુકસાનના કારણે 75 હજાર ડોલરની માગ કરી છે.

એની અલ્ટમેનના તમામ આરોપોને સેમ અલ્ટમેન અને તેમના પોતાના જ પરિવારે વખોડ્યા હતા. સેમ અલ્ટમેને ટ્વિટર પર પોતાના પરિવારનો પત્ર રજૂ કરતાં તમામ આરોપોને પાયા વિહોણા ગણાવ્યા છે. જેમાં તેમની માતા કોની અને ભાઈ જેક તથા મેક્સના હસ્તાક્ષર પણ છે. આ પત્રમાં લખ્યું છે કે, ‘એની (એન)એ અમારા પરિવારને ખૂબ દુઃખ પહોંચાડ્યું છે. આ તદ્દન ખોટાં દાવાઓ છે. અમે એનીની ગોપનીયતા અને માનને ધ્યાનમાં રાખી ક્યારેય જાહેરમાં તેના આવા વ્યવહારનો જવાબ આપવા માગતા ન હતા. પરંતુ તેણે કેસ કરતાં હવે અમારે મૌન તોડવુ પડ્યું છે.’

 એનીનું માનસિક સ્વાસ્થ્ય ખરાબ

સેમ અલ્ટમેનના પત્રમાં એનીનું માનસિક સ્વાસ્થ્ય ખરાબ હોવાનો ઉલ્લેખ કર્યો છે. તેમાં લખ્યું છે કે, ‘અમારો પરિવાર એનીને ખૂબ પ્રેમ કરે છે. અને હંમેશા તેનુ હિત જ ઈચ્છે છે. તે ઘણા વર્ષોથી માનસિક રીતે અસ્વસ્થ છે. અમે સતત તેને સાજી કરવાના પ્રયાસો કર્યા છે. તેને હંમેશા આર્થિક અને માનસિક રીતે મદદ કરી છે. પરંતુ તેનું માનસિક સ્વાસ્થ્ય સારૂ ન હોવાથી તે અવાર-નવાર અમારા ઉપર ખોટાં આરોપો મૂકે છે. અમે તેના તમામ ખર્ચાઓ પૂરા કરતાં હોવા છતાં તે સતત પૈસાની માગ કરતી રહે છે અને જો પૈસા ન મળે તો ખોટાં આરોપો મૂકી બદનામ કરે છે.’એનીએ અગાઉ પણ કરી હતી ફરિયાદ

એન અલ્ટમેને નવેમ્બર, 2021માં ટ્વિટર પર જાહેરમાં પોતાના જ ભાઈઓ પર શોષણના આરોપો મૂક્યા હતા. તેણે પોસ્ટ કરી હતી કે, તેના જ સગા ભાઈઓ ખાસ કરીને સેમ અને જેક અલ્ટમેને તેનું જાતિય, શારીરિક, માનસિક, મૌખિક, આર્થિક અને ટેક્નોલોજિકલ શોષણ કર્યું છે.

અમદાવાદ શહેરમાંથી 3 PSI અને 19 પોલીસકર્મીઓને કે કંપનીમાં બદલી

અમદાવાદ: બાપુનગર વિસ્તારમાં બનેલી ઘટના બાદ તેના પડઘા સમગ્ર રાજ્યમાં પડ્યા હતા અને કાયદો અને વ્યવસ્થાની જવાબદારી નિભાવવામાં જે લોકો નિષ્ફળ નીવડ્યા તેઓને ‘કે કંપની’માં મોકલી દીધા છે. અમદાવાદ શહેરમાં આજે પોલીસ કમિશનર દ્વારા 3 PSI અને 19 જેટલા પોલીસ કર્મચારીઓને એકસાથે ‘કે કંપની’માં મોકલી દેવામાં આવ્યા છે. તદુપરાંત 19 જેટલા પોલીસ કર્મચારીઓ કે, જે ગુનેગારો માટે કુણું વલણ રાખે છે તેમની સામે આજે કડક કાર્યવાહીની શરૂઆત કરવામાં આવી છે.

અમદાવાદ શહેર પોલીસ કમિશનર જી.એસ. મલિકે આજે કડક વલણ અપનાવ્યું છે. તેમાં પણ ખાસ કરીને બાપુનગર વિસ્તારમાં બનેલી જે ઘટના હતી તેમાં પોલીસને શર્મશાર બનવું પડ્યું હતું. આ કારણોસર રાજ્યવ્યાપી અમદાવાદ પોલીસની ઈમેજને નુકસાન થયું હતું. આ વિસ્તારમાં કાયદો અને વ્યવસ્થાની જવાબદારી જે લોકો પાસે હતી, તે નબળા સાબિત થયા અને તમામ વિગતો જાણી બાપુનગર વિસ્તારના બે PSI અને ચાંદખેડાના એક PSIની તાત્કાલિક કે કંપનીમાં બદલી કરી દેવામાં આવી છે. આ ઉપરાંત PCB દ્વારા અલગ-અલગ વિસ્તારમાં રેડ કરીને કાર્યવાહી કરતા તે વિસ્તારના પોલીસ કર્મચારીઓ સામે પણ એક્શન લેવામાં આવ્યા છે. શહેરના અલગ-અલગ પોલીસ સ્ટેશનના 19 જેટલા પોલીસ કર્મચારીઓની પણ ‘કે કંપની’માં બદલી કરી નાખવાનો ઓર્ડર કરવામાં આવ્યો છે.

હમાસને બંધકો તત્કાળ છોડી મૂકવા ટ્રમ્પની છેલ્લી ચેતવણી

નવી દિલ્હીઃ અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે ગાઝામાં હમાસ આતંકવાદી જૂથને છેલ્લી ચેતવણી આપી હતી કે તે 20 જાન્યુઆરીએ તેમના શપથગ્રહણથી પહેલાં બધા બંધકોને છોડી મૂકે. અન્યથા બધું ખતમ થઈ જશે. જો હમાસ બંધકોને તેમના શપથ ગ્રહણ સુધીમાં છોડી નહીં મૂકે તો પશ્ચિમ એશિયા પર કાળો કેર વર્તાશે. તેમણે કહ્યું હતું કે જો 20 જાન્યુઆરી પહેલાં ઇઝરાયલમાંથી અપહરણ કરાયેલા બંધકોને છોડવામાં નહીં આવે તો તે હમાસ માટે સારું નહીં હોય. સાચુ કહું તો તે કોઈના માટે સારું નહીં હોય. ડોનાલ્ડ ટ્રમ્પ 20 જાન્યુઆરીએ અમેરિકાના 47મા રાષ્ટ્રપતિપદના શપથ લેશે.

તેમણે વધુમાં કહ્યું હતું કે બંધકોને ઘણા સમય પહેલાં મુક્ત કરી દેવા જોઈતા હતા. 7 ઓક્ટોબરનો હુમલો થવો જોઈતો નહોતો. લોકો તેને ભૂલી જાય છે, પરંતુ તે થયો અને અનેક લોકોનાં મોત થયાં. મને ઇઝરાયલ અને અન્ય જગ્યાએ બંધકોના પરિવારો તરફથી ફોન આવી રહ્યા છે.

લોકો મને તેમના પ્રિયજનોને હમાસની કેદમાંથી મુક્ત કરાવવા માટે અપીલ કરી રહ્યા છે. હમાસે કેટલાક અમેરિકનોને પણ કેદ કર્યા છે. લોકો રડતાં-રડતાં મારી પાસે આવે છે અને કહે છે, શું હું તેમના બાળકોના મૃતદેહ પરત લાવી શકું? તેમણે એક 19-20 વર્ષની છોકરીને કારમાંથી એવી રીતે ફેંકી કે જાણે તે બટાકાની બોરી હોય.હાલમાં જ ટ્રમ્પના સ્પેશિયલ દૂત સ્ટીવન ચાર્લ્સ વિટકોફ મિડલ ઈસ્ટથી પરત ફર્યા છે. તેમણે પત્રકારોને કહ્યું હતું કે બંધકોની મુક્તિમાં વિલંબ કયા કારણોસર થયો તે અંગે હું વાત કરવા માગતો નથી. નેગેટિવ હોવાનો કોઈ અર્થ નથી. હું વધારે કંઈ કહેવા માગતો નથી, કારણ કે મને લાગે છે કે કતારમાં સારું કામ થઈ રહ્યું છે.

બીજી બાજુ, કતારમાં ગયા શુક્રવારથી હમાસ અને ઇઝરાયલ વચ્ચે બંધકોને મુક્ત કરવાને લઈને વાતચીત ચાલી રહી છે. રવિવારે હમાસે કહ્યું હતું કે તે એક્સચેન્જ ડીલના ફર્સ્ટ ફેઝમાં 34 બંધકોને મુક્ત કરશે. જેમાં તમામ મહિલાઓ, બાળકો, વૃદ્ધો અને બીમાર કેદીઓનો સામેલ છે. ભલે તેઓ જીવિત હોય કે મૃત હોય.

 

WPL 2025: ટૂર્નામેન્ટની મેચો રમાશે આ મેદાનો પર, ફાઈનલ મેચ વડોદરામાં રમાશે?

વિમેન્સ પ્રીમિયર લીગની ત્રીજી સીઝનની તૈયારીઓ પૂરજોશમાં ચાલી રહી છે. આ ટૂર્નામેન્ટની ત્રીજી સીઝન 6 ફેબ્રુઆરીથી 7 ફેબ્રુઆરી સુધી શરૂ થઈ શકે છે. દરમિયાન ટુર્નામેન્ટના સ્થળ અંગે અંતિમ નિર્ણય લેવામાં આવ્યો છે.

સુત્રોના જણાવ્યા અનુસાર, મહિલા પ્રીમિયર લીગ 2025ની મેચો લખનૌ અને વડોદરામાં રમાશે. વડોદરાને ફાઇનલ મેચની યજમાની મળી શકે છે. જો કે, હજુ સુધી તારીખ અને મેદાનને લઈને કોઈ સત્તાવાર માહિતી બહાર આવી નથી, પરંતુ એવું માનવામાં આવે છે કે ટૂંક સમયમાં અંતિમ મંજૂરી આપવામાં આવશે.

આ મેદાનો પર રમાશે મેચો…

મીડિયા રિપોર્ટ્સ અનુસાર, BCCIના અધિકારીઓએ બરોડા ક્રિકેટ એસોસિએશન અને ઉત્તર પ્રદેશ ક્રિકેટ એસોસિએશન સાથે વાતચીત કરી છે. આ વાતચીત બાદ ટૂંક સમયમાં સત્તાવાર જાહેરાત શક્ય છે. વાસ્તવમાં, બરોડાના કૌટંબી સ્ટેડિયમે એની સુવિધાઓ વર્લ્ડ ક્લાસ બનાવી છે. તાજેતરમાં આ મેદાન પર ભારત અને વેસ્ટ ઈન્ડિઝની મહિલા ટીમો સામસામે આવી હતી. આ ઉપરાંત આ મેદાન પર વિજય હજારે ટ્રોફીની મેચો રમાઈ રહી છે.

હરમનપ્રીત કૌર રમશે..?

આ પહેલા મુંબઈ ઈન્ડિયન્સ માટે કોઈ સારા સમાચાર નથી. મુંબઈ ઈન્ડિયન્સની કેપ્ટન હરમનપ્રીત કૌર ઈજા બાદ મેદાનમાં પરત ફરી નથી. તાજેતરમાં હરમનપ્રીત કૌર ભારત-વેસ્ટ ઈન્ડિઝ શ્રેણીમાં રમી ન હતી. હાલમાં મુંબઈ ઈન્ડિયન્સની કેપ્ટન હરમનપ્રીત કૌર બેંગ્લોરની નેશનલ ક્રિકેટ એકેડમીમાં છે, જ્યાં તે પોતાની ફિટનેસ પર કામ કરી રહી છે. જો કે, એવું માનવામાં આવે છે કે હરમનપ્રીત કૌર વુમન્સ પ્રીમિયર લીગની શરૂઆત પહેલા એની ઈજામાંથી સ્વસ્થ થઈ જશે, પરંતુ હજુ સુધી આ અંગે કોઈ સત્તાવાર માહિતી સામે આવી નથી.

શાહરુખ સાથે કામ કરવું પહેલા કરતાં વધારે મુશ્કેલ છે હવે: ફરાહ ખાન

પ્રખ્યાત કોરિયોગ્રાફર અને નિર્માતા-નિર્દેશક ફરાહ ખાને ફિલ્મ ઉદ્યોગના ટોચના કલાકારો સાથે કામ કર્યું છે. આ યાદીમાં બોલિવૂડના બાદશાહ શાહરૂખ ખાન પણ સામેલ છે. તાજેતરમાં ફરાહ ખાને શાહરૂખ સાથે કામ કરવાનો પોતાનો અનુભવ શેર કર્યો હતો. તેણે એ પણ ખુલાસો કર્યો કે SRK સાથે કામ કરવું તેના માટે હવે પહેલા કરતા વધુ મુશ્કેલ બની ગયું છે. આનું કારણ જાણો.

આ કારણે દબાણ વધે છે
ફરાહ ખાને કહ્યું કે જ્યારે પણ તેઓ નવા ગીત પર સાથે કામ કરે છે ત્યારે દબાણ બમણું થઈ જાય છે. ફરાહે કહ્યું કે સાથે કામ કરતી વખતે કેટલાક શાનદાર ટ્રેક બનાવવામાં આવ્યા હતા, જેના કારણે હવે જ્યારે પણ અમે સાથે કામ કરીએ છીએ ત્યારે પહેલા કરતા વધારે દબાણ વધી જાય છે. ફરાહ ખાને ETimes સાથે વાત કરતા આ વાતનો ખુલાસો કર્યો હતો. ફરાહ ખાને પણ તેની લાંબા સમયથી ચાલતી મિત્રતા માટે તેનો આભાર માન્યો હતો. તેણે જણાવ્યું કે કેટલાક સ્ટાર્સ સાથે તેની મિત્રતા સ્ટાર બનતા પહેલા હતી. ફરાહે જણાવ્યું કે શાહરૂખ ખાન સાથે તેની મિત્રતા ‘કભી હાં કભી ના’ અને ‘દીવાના’ની રિલીઝ પહેલા જ શરૂ થઈ ગઈ હતી.

આ કારણથી નિર્દેશનમાંથી લીધો બ્રેક લીધો
ફરાહ ખાને કહ્યું કે દાયકાઓ જૂની મિત્રતા હોવા છતાં શાહરૂખ ખાન સાથે કામ કરવું સમયની સાથે મુશ્કેલ બની રહ્યું છે. તેણે કહ્યું, ‘તે સમયે તેની સાથે કામ કરવું મુશ્કેલ નહોતું, હવે તે વધુ મુશ્કેલ છે. જ્યારે પણ અમે કોઈ ગીત પર કામ કરીએ છીએ ત્યારે દબાણ બમણું થઈ જાય છે કારણ કે અમે સાથે મળીને શાનદાર ગીતો બનાવ્યા છે. ફરાહે એ પણ કહ્યું કે ‘હેપ્પી ન્યૂ યર’ પછી તેણે રસપ્રદ પ્રોજેક્ટના અભાવે ડિરેક્શનમાંથી બ્રેક લીધો હવાનું જણાવ્યું.

નિર્દેશન તરફ પાછા ફરવાનો મજબૂત ઈરાદો, પણ…
ફરાહ ખાને કહ્યું કે બ્રેક પછી તેણે સંપૂર્ણ ધ્યાન તેના પરિવાર પર કેન્દ્રિત કર્યું. મારા બાળકો સાથે સમય વિતાવ્યો અને રજાઓ ઉજવી. તેણીએ એમ પણ કહ્યું હતું કે તે નિર્દેશનમાં પાછા ફરવા માંગે છે, પરંતુ જ્યારે સારી સ્ક્રિપ્ટ હશે અને યોગ્ય સમય હશે ત્યારે જ તે પુનરાગમન કરશે. તમને જણાવી દઈએ કે ફરાહ ખાને ફિલ્મ ‘મેં હૂં ના’ થી ડાયરેક્શનની દુનિયામાં ડેબ્યૂ કર્યું હતું. ફરાહે શાહરૂખ ખાનના ‘ચલેયા,’ દર્દ-એ-ડિસ્કો જેવા ગીતોની કોરિયોગ્રાફી કરી છે.

અમદાવાદના હિમાલયા મોલમાં આગ, સદનસીબે જાનહાનિ ટળી

અમદાવાદ: શેહરના મેમનગર વિસ્તારમાં આવેલા હિમાલયા મોલમાં ચોથા માળે આગ લાગવાની ઘટના પ્રકાશમાં આવી હતી. સૂત્રો પાસેથી મળતી પ્રાથમિક માહિતી પ્રમાણે ACમાં સોર્ટ સર્કિટ થવાથી આગ લાગી હોવાનું જાણવા મળી રહ્યું છે. આગની ઘટના બનતા જ મોલમાં અફરાતફરી મચી હતી. ઘટનાની જાણ થતાં તાત્કાલિક ફાયર વિભાગની 6 ટીમ ઘટનાસ્થળે પહોંચી હતી. હાલ, આગ પર સંપૂર્ણ કાબૂ મેળવી લેવાયો છે.

આગની ઘટનાને લઈને પોલીસ અને ફાયર વિભાગ દ્વારા તપાસ હાથ ધરવામાં આવી છે. હિમાલયા મોલમાં ચોથા માળે ACમાં અચાનક આગ લાગી હતી. આજે બુધવારે બપોરના સમયે મોલમાં આગ લાગી હતી. જેના પગલે ત્યાં હાજર લોકો વચ્ચે દોડધામ મચી ગઈ હતી. આગની માહિતી મોલમાં મળતા જ હાજર ગ્રાહકો અને કર્મચારીઓમાં અફરાતફરીનો માહોલ સર્જાયો હતો. સદનસીબે આગની ઘટનામાં કોઈ જાનહાનિ થઈ નથી.

રૂપિયો તૂટતાં દાળો અને ખાદ્યતેલ મોંઘાં થવાની વકી

નવી દિલ્હીઃ ડોલર સામે રૂપિયો રેકોર્ડ નીચલા સ્તરે પહોંચતાં કેન્દ્ર સરકાર અને રિઝર્વ બેન્કનું ટેન્શન વધી ગયું છે. અમેરિકી ડોલર સામે રૂપિયો 85.84ના સ્તરે પહોંચ્યો છે. જેને કારણે મોંઘવારીમાં વધારો થવાની શક્યતા છે, કેમ કે આયાતી ચીજવસ્તુઓ મોંઘી થશે.

દેશમાં રૂપિયાના ઘસારાને પગલે પેટ્રોલિયમ ઉત્પાદનોની આયાત મોંઘી થશે. રૂપિયો નબળો પડતાં પેટ્રોલ અને ડીઝલની કિંમત વધવાનું જોખમ છે. ડીઝલની કિંમતો વધવાને પગલે માલસામાનને ટ્રાન્સપોર્ટ કરવાનો ખર્ચ વધશે. જેથી મોંઘવારી વધશે.

પેટ્રોલ અને ડીઝલ સિવાય દેશમાં જરૂરી ચીજવસ્તુઓની કિંમતમાં વધારો થવાની વકી છે. ખાસ કરીને દાળો અને ખાદ્યતેલની કિંમતો વધવાની શક્યતા છે, કેમ કે ભારત મોટા પાયે ખાદ્ય તેલો અને દાળોની આયાત કરે છે. રૂપિયો નબળો પડતાં ઘરેલુ બજારમાં ખાદ્ય તેલો અને દાળોની કિંમત વધવાની ભીતિ છે. ડોલર સામે રૂપિયો નબળો પડતાં વિદેશી શિક્ષણ મોંઘું થઈ શકે છે, કેમ કે દરેક ડોલરે વધુ રૂપિયા ચૂકવવા પડશે. એની અસર હજ્જારે વિદ્યાર્થીઓ અને તેમના સ્પોન્સર્સ પર પડશે, જે વિદેશમાં અભ્યાસ કરી રહ્યા છે.

જોકે રૂપિયો  નબળો પડતો વિદેશી ટુરિઝમ સસ્તું થઈ શકે છે, જેનાથી પ્રવાસ કરવાવાળાઓને લાભ થશે. આ ઉપરાંત નિકાસકારોને વધુ નફો થશે, કેમ કે તેમના ઉત્પાદનો આંતરરાષ્ટ્રીય બજારોમાં વધુ હરીફાઈ કરશે.

રૂપિયાને વધુ ઘસાતો અટકાવવા રિઝર્વ બેન્ક શાં પગલાં લે છે એના પર સૌની નજર રહેશે. ડોલર સામે રૂપિયો ગગડતાં સરકારનો ખર્ચ વધશે. આમ RBI મોંઘવારી ઘટાડવા શાં પગલાં લે એ જોવું રહ્યું.

 

 

લગ્ન બાદ ફરી એક્શનમાં જોવા મળશે PV સિંધુ, આ ટૂર્નામેન્ટથી કરશે શરૂઆત ..

ભારતીય સ્ટાર બેડમિન્ટન ખેલાડી પીવી સિંધુ યોનેક્સ-સનરાઈઝ ઈન્ડિયા ઓપન સાથે એની 2025 સીઝનની શરૂઆત કરશે. ઈન્ડિયા ઓપન સુપર 750 ની ત્રીજી સીઝન 14 જાન્યુઆરીથી ઈન્દિરા ગાંધી સ્ટેડિયમના કેડી જાધવ હોલમાં શરૂ થશે, જ્યાં વિશ્વભરના ખેલાડીઓ ભાગ લેશે.

ગત વર્ષે લગ્ન કરનાર સિંધુ આ વખતે સુપર 750 ટૂર્નામેન્ટમાં મહિલા સિંગલ્સ રમતી જોવા મળી શકે છે. પીવી સિંધુએ છેલ્લે સૈયદ મોદી ઇન્ટરનેશનલ ચેમ્પિયનશિપ 2024માં ભાગ લીધો હતો, જ્યાં તેણે ચીનની લુઓ યુ વુને સીધા સેટમાં હરાવીને ગોલ્ડ મેડલ જીત્યો હતો.

બેડમિન્ટનની છે આ મુખ્ય સ્પર્ધા

સુપર 750 એ બેડમિન્ટન એસોસિએશન ઓફ ઈન્ડિયા દ્વારા આયોજિત મુખ્ય સ્પર્ધા રહી છે, ટૂર્નામેન્ટની આ સીઝનમાં, ઓલિમ્પિક ચેમ્પિયન વિક્ટર એક્સેલસન, એન સે યંગ અને વિશ્વના નંબર વન શી યુકી મેદાન પર ચાહકોમાં પોતાનો જાદુ ફેલાવતા જોવા મળશે. આ ટુર્નામેન્ટ એની શરૂઆતથી જ BWF વર્લ્ડ ટુરનો એક ભાગ છે, જ્યાં વિજેતાને US$9,50,000 અને 11,000 પોઈન્ટ્સની ઈનામી રકમ મળે છે. ટૂર્નામેન્ટની ત્રીજી સીઝનમાં યજમાન ભારતના 21 ખેલાડીઓ ભાગ લેશે. ભારત માટે, 3 ખેલાડીઓ મેન્સ સિંગલ્સમાં, 4 મહિલા સિંગલ્સમાં, 2 મેન્સ ડબલ્સમાં, 8 વિમેન્સ ડબલ્સમાં અને 4 મિક્સ્ડ ડબલ્સમાં પોતાનો દાવો રજૂ કરશે. છેલ્લી બે આવૃત્તિઓમાં ભારતમાંથી 14 ખેલાડીઓએ પ્રવેશ કર્યો હતો.

આ ખેલાડીઓ પર બધાની નજર..

આ સીઝનમાં, બધાની નજર મેન્સ ડબલ્સમાં એશિયન ગોલ્ડ મેડલ વિજેતા સાત્વિકસાઈરાજ રેન્કીરેડ્ડી, ચિરાગ શેટ્ટી, એશિયન ગેમ્સના બ્રોન્ઝ મેડલ વિજેતા એચએસ પ્રણય પર રહેશે. સાત્વિક અને ચિરાગની જોડીએ છેલ્લી વખત ટૂર્નામેન્ટની ફાઇનલમાં જગ્યા બનાવી હતી, જ્યારે પ્રણોયની સફર છેલ્લી ચારમાં સમાપ્ત થઈ હતી. આ સાથે, 2022 ઈન્ડિયા ઓપન સુપર 750 મેન્સ સિંગલ્સ ચેમ્પિયન અને બે વખતની ઓલિમ્પિક મેડલ વિજેતા પીવી સિંધુ ટાઈટલ માટે પોતાનો દાવો રજૂ કરશે.

ટુર્નામેન્ટમાં ભાગ લેનાર ભારતીય ખેલાડીઓ

  • પુરૂષ સિંગલ્સ- લક્ષ્ય સેન, એચએસ પ્રણય, પ્રિયાંશુ રાજાવત
  • મહિલા સિંગલ્સ- પીવી સિંધુ, માલવિકા બંસોડ, અનુપમા ઉપાધ્યાય, અક્ષર્શી કશ્યપ
  • મેન્સ ડબલ્સ- ચિરાગ શેટ્ટી/સાત્વિકસાઈરાજ રેન્કીરેડ્ડી, કે સાઈ પ્રતિક/પૃથ્વી કે રોય
  • મહિલા ડબલ્સ- ત્રિસા જોલી/ગાયત્રી ગોપીચંદ, અશ્વિની પોનપ્પા/તનિષા ક્રેસ્ટો, રુતુપર્ણા પાંડા/શ્વેતાપર્ણા પાંડા, માનસી રાવત/ગાયત્રી રાવત, અશ્વિની ભટ/શિખા ગૌતમ, સાક્ષી ગેહલાવત/અપૂર્વા ગેહલાવત, સાનિયા સિકન્દેર/અપૂર્વ ગહેલાવત, સાનિયા સિકન્દર, સાનિયા, એમ.આર.
  • મિક્સ્ડ ડબલ્સ- ધ્રુવ કપિલા/તનિષા ક્રેસ્ટો, કે સતીશ કુમાર/આદ્યા વરિયાથ, રોહન કપૂર/જી રૂત્વિકા શિવાની, આસિથ સૂર્યા/અમૃતા પ્રમુતેશ.
1...567...4,004Page 6 of 4,004

For Advertising

For Technical Queries

Follow Us On

Subscriber Now

© Chitralekha 2024 . All rights reserved.
Created by #Liveblack