વડોદરાઃ ઓનલાઇન ઠગાઇ કરતા ઠગો દ્વારા મુંબઇ ક્રાઇમ બ્રાન્ચ, CBI અને સાયબર ક્રાઇમ સેલને નામે દસ્તાવેજો બનાવી મોકલવામાં આવતા હોય છે, જેથી સામેવાળી વ્યક્તિ આસાનીથી ફસાઈ જાય છે. મુંબઇ ક્રાઇમ બ્રાન્ચને નામે વડોદરાની સિનિયર સિટિઝન મહિલાને સાત મહિના સુધી ડિજિટલ એરેસ્ટ કરી સાયબર માફિયાઓએ ટુકડે-ટુકડે રૂ. ૧.૮૯ કરોડ પડાવી લીધા હોવાનો વધુ એક કિસ્સો બનતાં સાયબર સેલે ગુનો નોંધ્યો છે.
જોકે પોલીસે મહિલા વિશે કોઈ પણ માહિતી આપવાનો ઇનકાર કરતાં કહ્યું હતું કે આ મહિલા જૂના પાદરા રોડ વિસ્તારના મકાનમાં નિવૃત્ત જીવન ગાળી રહી છે. ઓગષ્ટ-૨૪માં મુંબઇ ક્રાઇમ બ્રાન્ચના PI વિક્રમ સિંહને નામે મહિલાને ફોન આવ્યો હતો અને તેમના આધાર કાર્ડ તેમ જ મોબાઇલ નંબરનો ઉપયોગ હ્યુમન ટ્રાફિકિંગ, ડ્રગ્સ, મની લોન્ડરિંગ, આઇડેન્ટિટી થેપ્ટ અને ચાઇલ્ડ પોર્નોગ્રાફી જેવા ગુનાઓમાં ઉપયોગ થયો હોવાથી તેમની ધરપકડ કરવાની વાત કરી હતી.
મહિલાએ ઘણો બચાવ કર્યો હતો.પરંતુ ઠગોએ અમારા માણસો ત્યાં આવીને ધરપકડ કરશે તેમ કહી તપાસમાં સહકાર આપવા દબાણ કર્યું હતું. તેમણે વિડિયો કોલ કટ નહિ કરવા અને સતત સંપર્કમાં રહેવા વારંવાર ધમકી આપી હતી.આ ઉપરાંત બેન્ક એકાઉન્ટની રકમ સરકાર પાસે રહેશે અને જેવી ક્લીનચિટ મળતાં જ પરત કરી દેવામાં આવશે, તેમ તેમણે કહ્યું હતું.
આ કેસમાં ગભરાઈ ગયેલી મહિલાએ કાયદાને માન આપવા તૈયાર થઇ ગઇ હતી. તેને વારંવાર ટોર્ચર કરી બરોડા બેન્ક,સ્ટેટ બેન્ક અને એચડીએફસી બેન્ક જેવા એકાઉન્ટમાં ટ્રાન્સફર કરાવી હતી.મ હિલાએ સાત મહિનામાં રૂ. ૧.૮૯ કરોડ જેટલી રકમ ટ્રાન્સફર કરી હતી, પરંતુ આ રકમ પરત નહિં મળતાં આખરે તેણે સાયબર સેલમાં ફરિયાદ કરી હતી.
ડિજિટલ એરેસ્ટના કિસ્સામાં પોલીસે મહિલાની ઓળખ જાહેર કરી નથી. અધિકારીનું કહેવું છે કે મહિલાએ આ શરતે જ ફરિયાદ કરી છે.જો કે,પોલીસ નામ જાહેર ના કરે તે સમજી શકાય, પરંતુ ઠગોએ આટલા મહિના સુધી કઇ રીતે ટોર્ચર કરી હશે તેના કરતૂતોનો વિગતવાર ભાંડો ફોડવો જોઇતો હતો, જેથી કોઇ વ્યક્તિ ચેતી શકે.
