US: ન્યૂ યર સેલિબ્રેશનમાં ફાયરિંગ, 10ના મોત, 16 ઘાયલ

અમેરિકાના કેલિફોર્નિયાના મોન્ટેરી પાર્કમાં ચંદ્ર નવા વર્ષની ઉજવણી દરમિયાન ઓછામાં ઓછા 16 લોકોને ગોળી વાગી હતી. અહેવાલો અનુસાર, કેલિફોર્નિયાના મોન્ટેરી પાર્કમાં સામૂહિક ગોળીબારની ઘટનામાં ઓછામાં ઓછા 10 લોકોના મોત થયા છે. અમેરિકન મીડિયામાં આવી રહેલા સમાચારોમાં કહેવામાં આવ્યું છે કે લોસ એન્જલસ નજીક મોન્ટેરી પાર્કમાં જોરદાર ગોળીબાર થયો છે. ચંદ્ર નવા વર્ષ નિમિત્તે હજારો લોકો ત્યાં એકઠા થયા હતા. ત્યારે જ આ ભીષણ ગોળીબારની ઘટના શરૂ થઈ હતી.

સમાચારમાં કહેવામાં આવ્યું છે કે આ ભીષણ ફાયરિંગની ઘટનામાં ઓછામાં ઓછા 10 લોકોના મોત થયા છે અને 16 લોકો ઘાયલ થયા છે. પોલીસના એક સૂત્રએ મીડિયાને જણાવ્યું કે સ્થાનિક સમય અનુસાર શનિવારે રાત્રે મોન્ટેરી પાર્ક ગોળીબારની ઘટનાના સ્થળે પોલીસ પહોંચી અને જવાબી કાર્યવાહી કરી. જો કે હજુ સુધી નક્કર માહિતી મળી નથી કે કેટલા લોકોને ગોળીઓ વાગી છે. જણાવવામાં આવી રહ્યું છે કે આ ગોળીબાર રાત્રે 10 વાગ્યા પછી થયો હતો. તે સમયે, ચાઇનીઝ ચંદ્ર નવા વર્ષની ઉજવણી માટે મોટી સંખ્યામાં લોકો સ્થળની આસપાસ એકઠા થયા હતા.

બે દિવસીય મોન્ટેરી પાર્ક લુનાર ન્યૂ યર ફેસ્ટિવલ માટે શનિવારે બપોરે હજારો લોકો એકઠા થયા હતા. જે આ વિસ્તારની સૌથી મોટી ઉજવણી માનવામાં આવે છે. પહેલા દિવસે, ભીડ ખુશનુમા વાતાવરણનો આનંદ માણી રહી હતી અને ચાઈનીઝ ફૂડ અને જ્વેલરીની ખરીદી કરી રહી હતી. આ વિસ્તારના એક રહેવાસીએ જણાવ્યું હતું કે તેઓ માને છે કે ગોળીબારની ઘટના તહેવાર પૂરો થયા પછી બની હતી. જ્યારે સોશિયલ મીડિયા પરના વીડિયોમાં પોલીસ અને ફાયર બ્રિગેડના એકમો ગારવે એવન્યુ વિસ્તારમાં ઘાયલોને બચાવીને નજીકની હોસ્પિટલોમાં લઈ જતા દેખાઈ રહ્યા છે. કોઈ શંકાસ્પદને કસ્ટડીમાં લેવામાં આવ્યા છે કે કેમ તે તરત જ સ્પષ્ટ થયું નથી.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]