વોશિંગ્ટનઃ અમેરિકી રાષ્ટ્રપતિ ડોનાલ્ડ ટ્રમ્પે ફરી ટેરિફ ટેરર શરૂ કર્યો છે. હવે તેમના નિશાના પર વિદેશી ફિલ્મો આવી છે. અમેરિકન ફિલ્મજગતને ફરી બેઠું કરવાના બહાના હેઠળ ટ્રમ્પે અમેરિકા બહાર બનતી તમામ ફિલ્મો પર 100 ટકા ટેરિફની જાહેરાત કરી છે.
તેમણે આરોપ લગાવ્યો હતો કે વિદેશોમાં બનેલી ફિલ્મો અમેરિકામાં પ્રોપેગેન્ડા ફેલાવી શકે છે. યુએસ રાષ્ટ્રપતિ ડોનાલ્ડ ટ્રમ્પે રવિવારે જાહેરાત કરી કે તેમણે વાણિજ્ય વિભાગ અને યુએસ ટ્રેડ રિપ્રેઝન્ટેટિવ (USTR) ને યુએસની બહાર બનેલી બધી ફિલ્મો પર 100 ટકા ટેરિફ લાદવાની પ્રક્રિયા શરૂ કરવા જણાવ્યું છે. ટ્રમ્પે સોશિયલ મિડિયા પોસ્ટમાં એ દેશોની ટીકા પણ કરી હતી જેઓ અમેરિકી સ્ટુડિયો અને અમેરિકન નિર્માતાઓને તેમના દેશમાં શૂટિંગ કરવા આકર્ષક ઓફરો આપે છે. તેમણે આ પ્રકારની નીતિને અમેરિકા માટે આર્થિક ખતરો ગણાવ્યો હતો. તેણે પોસ્ટમાં લખ્યું હતું કે અમેરિકામાં ફિલ્મઉદ્યોગ ખતમ થઈ રહ્યો છે, જેના માટે અન્ય દેશો દ્વારા કરવામાં આવતા પ્રયાસો જવાબદાર છે.
આ પ્રયાસ રાષ્ટ્રીય અને આર્થિક સુરક્ષા માટે ખતરાસમાન છે. આ સાથે આ એક પ્રોપોગેંડા છે. આથી મારી સરકાર ઈચ્છે છે કે ફિલ્મો ફરી અમેરિકાની ધરતી પર જ બને. રવિવારે, ટ્રમ્પે સાન ફ્રાન્સિસ્કો ખાડીમાં અલ્કાટ્રાઝ જેલ ફરીથી ખોલવાની યોજનાનું પણ અનાવરણ કર્યું હતું. અહીં દેશના કેટલાંક કુખ્યાત ગુનેગારોને રાખવામાં આવ્યા હતા. તેમણે ન્યાય વિભાગ, એફબીઆઈ અને હોમલેન્ડ સિક્યુરિટી સાથે સંકલનમાં, બ્યુરો ઓફ પ્રિઝન્સને સુવિધાજનક બનાવવા કહ્યું હતું.
અમેરિકામાં ફિલ્મોના પ્રોડક્શનમાં સતત ઘટાડો થઈ રહ્યો છે. અમેરિકામાં 2021 સુધી ફિલ્મ પ્રોડક્શનમાં 26 ટકાનો ઘટાડો આવ્યો છે.
