અંબાજી ભાદરવી પૂનમના મહામેળા પ્રસંગે મા અંબાના દર્શનાર્થે પગપાળા જઈ રહેલા માઈભક્તો માટે હિંમતનગર-ઈડર સ્ટેટ હાઈવે પર કાળ ત્રાટક્યો છે. હિંમતનગર નજીક આવેલા દોલગઢ અને તેજપુરા પાટિયા પાસે એક બેફામ ઝડપે આવી રહેલી સ્કોર્પિયો કારે પદયાત્રીઓના સંઘને જોરદાર ટક્કર મારી અડફેટે લીધો હતો. આ હૃદયકંપાવનાર ઘટનામાં 12 જેટલા પદયાત્રીઓ ગંભીર રીતે ઈજાગ્રસ્ત થયા હતા, જેમાંથી સારવાર દરમિયાન એક પદયાત્રીનું કમકમાટીભર્યું મોત નિપજ્યું હોવાના અહેવાલ પ્રાપ્ત થયા છે.
અકસ્માત સર્જી ભાગતા કારચાલકને ઘેરી લેવાયો
પ્રત્યક્ષદર્શીઓના જણાવ્યા અનુસાર, પદયાત્રીઓ ‘જય અંબે’ના નાદ સાથે અંબાજી તરફ આગળ વધી રહ્યા હતા ત્યારે અચાનક પૂરઝડપે આવેલી સ્કોર્પિયો કારે તેમને પાછળથી ઠોકર મારી હતી. અકસ્માત સર્જાયા બાદ ચાલકે ઈજાગ્રસ્તોને રસ્તા પર લોહીલુહાણ હાલતમાં છોડીને વાહન સાથે ઘટનાસ્થળેથી ભાગી છૂટવાનો પ્રયાસ કર્યો હતો. જોકે, ચીસાચીસ સાંભળીને આસપાસના સ્થાનિકો અને અન્ય સંઘના પદયાત્રીઓ તાત્કાલિક દોડી આવ્યા હતા અને કારચાલકને ભાગતા અટકાવી ઘેરી લીધો હતો.
આક્રોશમાં આવેલી ભીડે કારને આગી ચાંપી દીધી
બેફામ ડ્રાઇવિંગ અને અકસ્માતને પગલે હાઈવે પર ભારે જનઆક્રોશ ફાટી નીકળ્યો હતો. ગુસ્સે ભરાયેલા લોકોના ટોળાએ અકસ્માત સર્જનાર સ્કોર્પિયો કારને રોકીને તેને આક્રોશમાં સળગાવી દીધી હતી. જોતજોતામાં કાર ભડકે બળીને ખાખ થઈ ગઈ હતી, જેને કારણે સ્ટેટ હાઈવે પર થોડા સમય માટે વાહનવ્યવહાર પૂરેપૂરો ખોરવાઈ ગયો હતો અને ભારે અફરાતફરી સર્જાઈ હતી.
તંત્રના જાહેરનામાના ધજાગરા: બેફામ વાહનો પદયાત્રીઓ માટે કાળ
ઉલ્લેખનીય છે કે, ભાદરવી મેળા દરમિયાન પદયાત્રીઓની સુરક્ષા અને સલામતી સુનિશ્ચિત કરવા માટે તંત્ર દ્વારા હાઈવે પર સ્પીડ લિમિટ અને ભારે વાહનો અંગે વિશેષ જાહેરનામું બહાર પાડવામાં આવ્યું હોય છે. તેમ છતાં, માર્ગો પર નિયમોનું ખુલ્લેઆમ ઉલ્લંઘન કરીને દોડતા વાહનચાલકોના કારણે લાખો પદયાત્રીઓ સતત ભયના ઓછાયા હેઠળ ચાલવા મજબૂર બન્યા છે.
પોલીસ તંત્ર દોડતું થયું, ઈજાગ્રસ્તો સિવિલ હોસ્પિટલ ખસેડાયા
ઘટનાની ગંભીરતાને ધ્યાને લઈને સાબરકાંઠા જિલ્લા પોલીસ પ્રશાસન તુરંત હરકતમાં આવ્યું હતું. જિલ્લા પોલીસ વડા (SP) સહિત ગ્રામ્ય પોલીસનો મોટો કાફલો ઘટનાસ્થળે પહોંચી ગયો હતો અને ટોળાને વિખેરી પરિસ્થિતિ કાબૂમાં લીધી હતી. બીજી તરફ, ઈજાગ્રસ્ત પદયાત્રીઓને ઈમરજન્સી 108 એમ્બ્યુલન્સ મારફતે હિંમતનગર સિવિલ હોસ્પિટલ ખસેડવામાં આવ્યા છે, જ્યાં ‘એ’ ડિવિઝન પોલીસની ટીમે પહોંચીને સારવાર અને આગળની કાયદાકીય તપાસ હાથ ધરી છે.
