નવી દિલ્હીઃ ઇન્ડિયન પ્રીમિયર લીગ (IPL) 2023થી BCCIને બમ્પર કમાણી થઈ છે. BCCIને IPLથી રૂ. 5120 કરોડની કમાણી થઈ છે, જે IPL 2022ની તુલનાએ 116 ટકા વધુ છે. BCCIને 2022માં રૂ. 2367 કરોડની કમાણી કરી હતી. BCCIની IPL 2023ની કુલ આવક રૂ. 11,769 કરોડ થઈ હતી, જે વાર્ષિક ધોરણે 78 ટકા સુધી વધી છે. જોકે BCCIના ખર્ચમાં પણ નોંધપાત્ર વધારો થયો છે.
IPL 2022-23ના વાર્ષિક રિપોર્ટ અનુસાર ખર્ચમાં 66 ટકા વધારો થયો છે, જેમાં રૂ. 6648 કરોડ આયોજનમાં લાગ્યા છે. BCCIને IPLના નવા મિડિયા રાઇટ્સથી સૌથી વધુ પૈસા મળ્યા છે. આ સિવાય સ્પોન્સરશિપથી પણ બોર્ડને વધુ રકમ મળી છે. નવા મિડિયા રાઇટ્સ 2023-27 માટે રૂ 48,390 કરોડના છે. IPL TV અધિકાર 2021માં ડિઝની સ્ટારે રૂ. 23,575 કરોડમાં હાંસલ કર્યા હતા, જ્યારે ડિજિટલ રાઇટ્સ જિયો સિનેમાને રૂ. 23,758 કરોડ મળ્યા હતા. IPL ટાઇટલ સ્પોન્સર રાઇટ્સ ટાટા સન્સને રૂ. 2500 કરોડમાં વેચવામાં આવ્યા હતા. આટલું જ નહીં, બોર્ડે એન્જલ વન, સિયેટ, માયસર્કલ11 અને રૂપેને એસોસિયેટ સ્પોન્સરશિપ વેચીને રૂ. 1485 કરોડની કમાણી કરી હતી.
BCCI વિશ્વમાં સૌથી વધુ કમાણી કરતું બોર્ડ છે. નાણાકીય વર્ષ 2023માં બોર્ડનું બેન્ક બેલેન્સ રૂ. 16,493.2 કરોડ થઈ ચૂક્યું છે, જે ગયા વર્ષે રૂ. 10,991 કરોડ હતું. IPL સીઝન દરમ્યાન બોર્ડે સેન્ટ્રલ પૂલથી ફ્રેન્ચાઇઝીને ગયા વર્ષે2205 કરોડની તુલનામાં આશરે બમણી રકમ રૂ. 4670 કરોડ વહેંચ્યા છે.
આ સાથે બોર્ડે મહિલા પ્રીમિયર લીગ (WPL)થી પણ રૂ. 377 કરોડનું સરપ્લસ હાંસલ કર્યું છે, જેને 2023માં લોન્ચ કરવામાં આવ્યું હતું. બોર્ડે ફ્રેન્ચાઇઝ ફીસ અને ટુર્નામેન્ટ થકી WPLથી રૂ.36 કરોડની કમાણી કરી હતી. જેનાથી લીગનો કુલ ખર્ચ રૂ. 259 કરોડ સુધી પહોંચ્યો હતો.
![](https://chitralekha.com/chitralemag/wp-content/themes/Newspaper/images/whatsapp-channel-follow.png)