નવી દિલ્હીઃ બ્રિટિશ ઊર્જા કંપની BPએ તેની લુબ્રિકન્ટ બિઝનેસ કેસ્ટ્રોલ (Castrol) વેચવાની યોજના બનાવી રહી છે. BPએ કેસ્ટ્રોલના વેચાણ માટે પ્રક્રિયા શરૂ કરી દીધી છે. કેસ્ટ્રોલ ઉદ્યોગ અને ઓટોમોટિવ લુબ્રિકન્ટ બનાવે છે. ઘણા મોટા કોર્પોરેટ ગ્રુપ્સ અને રોકાણ કંપનીઓ આ બિઝનેસમાં રસ દાખવી રહી છે. ભારતના સૌથી મોટા ઉદ્યોગપતિ મુકેશ અંબાણીની કંપની રિલાયન્સ આ વેચાણમાં રસ ધરાવે છે. આ સિવાય એપોલો ગ્લોબલ મેનેજમેન્ટ અને લોન સ્ટાર ફંડ્સ જેવી બાયઆઉટ ફર્મોનો સમાવેશ થાય છે. આ ડીલ આઠ બિલિયન ડોલરથી લઈને 10 બિલિયન ડોલર સુધીની થવાની શક્યતા છે.
BP શા માટે વેચી રહી છે?
કંપની તેનું દેવું ઘટાડવા માટે આ પગલું લઈ રહી છે. આ વર્ષ ફેબ્રુઆરીમાં કંપનીએ જણાવ્યું હતું કે તે 2027 સુધીમાં 20 અબજ ડોલર એકઠા કરવા માટે કેટલીક મિલકતો વેચવાની યોજના બનાવી રહી છે. કેસ્ટ્રોલનું વેચાણ આ યોજનાનો હિસ્સો છે. BPએ અન્ય સંભવિત ખરીદદારોને પણ પ્રાથમિક માહિતી મોકલી છે, જેમાં બ્રુકફીલ્ડ એસેટ મેનેજમેન્ટ અને સ્ટોનપીક પાર્ટનર્સ જેવી કંપનીઓનો સમાવેશ થાય છે. આ ડીલમાંથી BPને અંદાજે 8થી 10 અબજ ડોલર મળી શકે છે.
આ પ્રક્રિયા હજી શરૂઆતની તબક્કામાં છે. BP આશા રાખી રહી છે કે થોડાં સપ્તાહમાં પ્રાથમિક બોલીઓ આવશે, તેથી હજી કિંમતો અને સોદાનું પરિણામ સ્પષ્ટ નથી. આ વેચાણમાં સાઉદી અરામ્કો પણ પોતાની બોલી લગાવે એવી છે.
કેસ્ટ્રોલ બિઝનેસમાં શું ખાસ છે?
કેસ્ટ્રોલ કંપની ઓટોમોબાઇલ અને ઉદ્યોગો માટે લુબ્રિકન્ટ બનાવે છે. એ સાથે-સાથે કંપની લાંબા સમયથી આર્ટિફિશિયલ ઇન્ટેલિજન્સ (AI) ડેટા સેન્ટર્સ માટે લિક્વિડ કુલિંગ ટેક્નોલોજી પણ વિકસાવી રહી છે.
