વડાપ્રધાન નરેન્દ્ર મોદી રશિયાની બે દિવસીય મુલાકાતે છે. આ દરમિયાન વડાપ્રધાન નરેન્દ્ર મોદીને રશિયાના સર્વોચ્ચ નાગરિક સન્માન ‘ઓર્ડર ઓફ સેન્ટ એન્ડ્ર્યુ ધ એપોસ્ટલ’થી નવાજવામાં આવ્યા છે. રશિયાના રાષ્ટ્રપતિ વ્લાદિમીર પુતિને પીએમ મોદીને આ સન્માન આપ્યું છે. પીએમ મોદીએ આ સન્માનને ભારતના 140 કરોડ લોકોનું સન્માન ગણાવ્યું છે. ભારત અને રશિયા વચ્ચેની ભાગીદારી અને મિત્રતાને વધુ મજબૂત કરવાના તેમના પ્રયાસોને કારણે વડાપ્રધાન મોદીને આ સન્માન આપવામાં આવ્યું છે. સેન્ટ એન્ડ્રુને ઈસુના પ્રથમ પ્રેરિત અને રશિયાના આશ્રયદાતા સંત માનવામાં આવે છે. તેમના માનમાં, આ એવોર્ડ પીટર ધ ગ્રેટ દ્વારા વર્ષ 1698 માં શરૂ કરવામાં આવ્યો હતો. આ સન્માન સૌથી ઉત્કૃષ્ટ નાગરિક અથવા લશ્કરી યોગ્યતા માટે આપવામાં આવે છે.
Honoured to receive the Order of St. Andrew the Apostle. I dedicate it to the people of India. https://t.co/62BXBsg1Ii
— Narendra Modi (@narendramodi) July 9, 2024
રશિયાના રાષ્ટ્રપતિ પુતિને સેન્ટ એન્ડ્ર્યુના ગ્રાન્ડ હોલ ઓફ ધ ઓર્ડરમાં આયોજિત ભવ્ય સમારોહ દરમિયાન પીએમ મોદીને આ સન્માનથી નવાજ્યા હતા. આ હોલનો ઉપયોગ સદીઓથી રશિયામાં માત્ર વિશેષ કાર્યો માટે જ થતો આવ્યો છે. વડાપ્રધાન મોદીને એવોર્ડ એનાયત કર્યા બાદ રાષ્ટ્રપતિ પુતિને કહ્યું કે તેમને આ સન્માન આપીને તેઓ ખૂબ જ ખુશ છે.
સન્માનિત થયા બાદ PM મોદીએ શું કહ્યું?
રશિયાના સર્વોચ્ચ નાગરિક સન્માનથી સન્માનિત થયા બાદ પીએમ મોદીએ કહ્યું, ‘રશિયાના સર્વોચ્ચ પુરસ્કારથી સન્માનિત થવા બદલ હું તમારો આભાર માનું છું. આ માત્ર મારું જ નહીં પરંતુ 140 કરોડ ભારતીયોનું સન્માન છે. આ ભારત અને રશિયા વચ્ચે વર્ષો જૂની મિત્રતાને શ્રદ્ધાંજલિ છે. છેલ્લા અઢી દાયકાથી તમારા નેતૃત્વમાં ભારત અને રશિયા વચ્ચેના સંબંધો દરેક દિશામાં મજબૂત થયા છે અને દરેક વખતે નવી ઊંચાઈએ પહોંચી રહ્યા છે. બંને દેશો વચ્ચે તમે જે વ્યૂહાત્મક સંબંધો બાંધ્યા હતા તે સમયની સાથે વધુ મજબૂત બન્યા છે.
