બાંગ્લાદેશ: પ્રથમ પરમાણુ ઊર્જા પ્લાન્ટ ‘રૂપપુર ન્યુક્લિયર પાવર પ્લાન્ટ’ (Rooppur Nuclear Power Plant) માટે રશિયાથી યુરેનિયમ (ન્યુક્લિયર ફ્યુઅલ) લઈને આવી રહેલા એક વિમાનને પાકિસ્તાને પોતાના એરસ્પેસ (હવાઈ ક્ષેત્ર) માંથી પસાર થવાની મંજૂરી આપવાનો ઇનકાર કરી દીધો છે. પાકિસ્તાનના આ પગલાને કારણે બાંગ્લાદેશમાં ન્યુક્લિયર ફ્યુઅલ પહોંચવામાં વિલંબ થયો છે અને વિમાનનું શેડ્યૂલ ખોરવાઈ ગયું છે.
૨૪ સપ્ટેમ્બરે પહોંચવાનું હતું યુરેનિયમ
બાંગ્લાદેશના વિજ્ઞાન અને ટેકનોલોજી મંત્રાલયના જણાવ્યા અનુસાર, રશિયાની સ્ટેટ એટોમિક એનર્જી કોર્પોરેશન ‘રોસાટોમ’ (Rosatom) ની મદદથી ચાલતા આ પ્રોજેક્ટના બીજા યુનિટ માટે ૨૪ સપ્ટેમ્બરે ન્યુક્લિયર ફ્યુઅલની પ્રથમ ખેપ ઢાકા પહોંચવાની હતી. પરંતુ પાકિસ્તાન તરફથી એરસ્પેસ ક્લિયરન્સ ન મળવાને કારણે રશિયન કાર્ગો પ્લેન ઉડાન ભરી શક્યું ન હતું.
અમેરિકાના દબાણની આશંકા
પાકિસ્તાને એરસ્પેસ ન આપવા પાછળ “ટેકનિકલ અને પ્રક્રિયાગત કારણો” રજૂ કર્યા છે. જોકે, રાજકીય વિશ્લેષકોનું માનવું છે કે રશિયા પર અમેરિકાના વધતા દબાણ અને પશ્ચિમી દેશોના પ્રતિબંધોને કારણે પાકિસ્તાને આ પગલું ભર્યું હોઈ શકે છે.
બાંગ્લાદેશ માટે મોટો ફટકો
બાંગ્લાદેશ હાલમાં પોતાના ઇતિહાસના સૌથી ભયાનક વીજ સંકટનો સામનો કરી રહ્યું છે. રૂપપુર પ્લાન્ટ ચાલુ થવાથી દેશને ૨,૪૦૦ મેગાવોટ વીજળી મળવાની આશા છે. આ સંજોગોમાં પાકિસ્તાન દ્વારા કરવામાં આવેલી આ અટકાયતથી બાંગ્લાદેશ અને પાકિસ્તાન વચ્ચે તાજેતરમાં સુધરી રહેલા સંબંધો પર ફરીથી પ્રશ્નાર્થ ચિહ્ન મુકાઈ ગયું છે. હવે રશિયન એજન્સી રોસાટોમ દ્વારા અન્ય વૈકલ્પિક રૂટ અને ઓક્ટોબરના પ્રથમ સપ્તાહ માટે નવું શેડ્યૂલ નક્કી કરવામાં આવી રહ્યું છે.
