મુંબઈ: ઉત્તર પ્રદેશના પ્રયાગરાજમાં ચાલી રહેલા મહાકુંભ હવે તેના અંતિમ તબક્કામાં છે. આવી સ્થિતિમાં લાખો લોકોની ભીડની સાથે જાણીતા સેલેબ્સ પણ સંગમ પહોંચી રહ્યા છે. અક્ષય કુમાર ઘાટ પર પહોંચ્યા હતા અને શ્રદ્ધાની ડૂબકી લગાવી. ત્યારે હવે વિકી કૌશલની પત્ની અને બોલિવૂડ અભિનેત્રી કેટરિના કૈફ પણ મહાકુંભમાં પહોંચી છે. તેની સાસુ એટલે કે વિકી કૌશલના પણ તેની સાથે જોવા મળ્યા હતા. એ વાત જાણીતી છે કે થોડા દિવસો પહેલા જ વિકી કૌશલે પણ સંગમમાં ડૂબકી લગાવી હતી.
મહાકુંભ દરમિયાન પરમાર્થ નિકેતન શિબિરમાં કેટરિના કૈફે સ્વામી ચિદાનંદ સરસ્વતી અને સાધ્વી ભગવતી સરસ્વતીના આશીર્વાદ લીધા. કેટરિના અને તેની સાસુના કપાળ પર તિલક લગાવ્યા બાદ તેમનું ફૂલો અને માળાથી સ્વાગત કરવામાં આવ્યું હતું. તેમણે શિબિરમાં એક પ્રવચન પણ સાંભળ્યું. તેની તસવીરો સામે આવી છે અને વાયરલ થઈ રહી છે.
કેટરિના પહેલા, અક્ષય કુમાર સંગમ પહોંચ્યા અને પવિત્ર ડૂબકી લગાવી. તેમની એક ઝલક જોવા માટે લોકોની ભીડ એકઠી થઈ ગઈ હતી. અત્યાર સુધીમાં વિકી કૌશલ, ગાયક કૈલાશ ખેર, અનુપમ ખેર, હેમા માલિની, સોનાલી બેન્દ્રે, રાજકુમાર રાવ અને એકતા કપૂર સહિત ઘણા ટીવી અને બોલિવૂડ સેલેબ્સ મહાકુંભ સંગમમાં ડૂબકી લગાવી ચૂક્યા છે.
