ગુજરાત વિધાનસભા ચૂંટણી 2022: જાણો ગુજરાત વિધાનસભાની ચૂંટણીમાં કયા ઉમેદવારો સૌથી ધનિક છે. રાજ્યની ચૂંટણીમાં દરેક ઉમેદવારોની સંપત્તિ જાહેર કરવામાં આવે છે. જેમાં કેટલાક ઉમેદવારો એવા છે કે તે જેમની સંપત્તિ જાણીને આંચકો લાગે છે. તો આવો કરોડપતિ ઉમેદવારો પર એક નજર કરીએ…
જાણો કોની પાસે કેટલી સંપત્તિ છે?
જયંતિ પટેલ ( રૂ.661.29 કરોડની સંપત્તિ)
ગુજરાતની ચૂંટણીમાં ભાજપે માણસા બેઠક પરથી જયંતિ પટેલને મેદાનમાં ઉતાર્યા છે. ભાજપના ઉમેદવાર જયંતિ પટેલ ગુજરાતમાં સૌથી ધનિક ઉમેદવાર છે. તેમણે ચૂંટણી એફિડેવિટમાં 661.29 કરોડ રૂપિયાની સંપત્તિ જાહેર કરી છે. તેમની અધિકૃત સંપત્તિ ઘોષણા દર્શાવે છે કે તેમની વ્યક્તિગત વાર્ષિક આવક રૂ. 44.22 લાખ છે. તેમની પત્ની આનંદીની વાર્ષિક આવક 62.7 લાખ રૂપિયા છે. તેમની પાસે 92.4 લાખ રૂપિયાની જ્વેલરી છે જ્યારે તેમની પત્ની પાસે 1.2 કરોડ રૂપિયાની જ્વેલરી છે. તેમના પરિવારની જંગમ સંપત્તિ 147.04 કરોડ રૂપિયા અને સ્થાવર સંપત્તિ 514 કરોડ રૂપિયા છે. તેમની કુલ જવાબદારી રૂ. 233.8 કરોડ છે.
બળવંતસિંહ રાજપૂત (રૂ. 447 કરોડની સંપત્તિ)
સિદ્ધપુરથી ભાજપની ટિકિટ પર ચૂંટણી લડી રહેલા બળવંતસિંહ રાજપૂત રૂ. 447 કરોડની સંપત્તિ સાથે બીજા નંબરના સૌથી ધનિક ઉમેદવાર છે. ત્યારબાદ દ્વારકાના ભાજપના ઉમેદવાર પ્રભુ બા માણેકની સંપત્તિ રૂ. 178.58 કરોડ છે. બળવંત સિંહ રાજપૂતે 266 કરોડની સંપતિમાં કૃષિ અને બિન-કૃષિ જમીન, આસામના ગુવાહાટીમાં એક કોમર્શિયલ બિલ્ડિંગ છે, જેની કિંમત હાલમાં આશરે 13.81 કરોડ રૂપિયા છે, તેમજ ગુજરાતની અન્ય કોમર્શિયલ અને રેસિડેન્શિયલ બિલ્ડિગો અને પ્લોટનો સમાવેશ થાય છે. તેમણે અન્ય 101 કરોડ રૂપિયાની સ્થાવર મિલકત જાહેર કરી છે.
ઈન્દ્રનીલ રાજગુરુ (રૂ.159.84 કરોડની સંપત્તિ)
રાજકોટ પૂર્વના કોંગ્રેસના ઉમેદવાર ઈન્દ્રનીલ રાજગુરુ, જેમણે કુલ રૂ. 159.84 કરોડની સંપત્તિ દર્શાવી છે, તેઓ ચોથા ક્રમે છે. કોંગ્રેસના 56 વર્ષીય ઇન્દ્રનીલ રાજગુરુએ 66.85 કરોડ રૂપિયાની જંગમ સંપત્તિ અને 92.99 કરોડ રૂપિયાની સ્થાવર સંપત્તિ જાહેર કરી છે, જેની કુલ કિંમત લગભગ 160 કરોડ રૂપિયા છે. તેમની અને તેમની પત્નીની જંગમ સંપત્તિમાં 16 વાહનોનો સમાવેશ થાય છે, જેમાં એક બીએમડબલ્યુ કાર અને બીએમડબલ્યુ બાઇક, એક ઓડી કાર, એક જેનરિક જીપ, ટ્રેક્ટર, લેન્ડ રોવર અને એક ફોક્સવેગન બીટલનો સમાવેશ થાય છે.
રઘુનાથ દેસાઈ (રૂ.140 કરોડની સંપત્તિ)
કોંગ્રેસના રઘુનાથ દેસાઈ પાસે 140 કરોડ રૂપિયાની સંપત્તિ છે. તેમના સોગંદનામા મુજબ તેમની પાસે જંગમ સંપત્તિ રૂ.6.16 કરોડ અને સ્થાવર મિલકતો રૂ.134.44 કરોડની છે, જેમાં ગાંધીનગર, પાટણ, મહેસાણા અને અમદાવાદમાં ખેતીની જમીન,ગાંધીનગર અને અમદાવાદમાં બિનખેતીની જમીન, અમદાવાદમાં કોમર્શિયલ પ્લોટ અને અમદાવાદ અને પાટણમાં રહેણાંક જગ્યાઓ અને એપાર્ટમેન્ટનો સમાવેશ થાય છે. તેમણે 3.25 કરોડ રૂપિયાની જવાબદારીઓ પણ જાહેર કરી છે.
રમેશ ટિલાળા (રૂ.124.86 કરોડની સંપત્તિ)
આ પછી રમેશ ટિલાળા પાસે 124.86 કરોડ રૂપિયાની સંપત્તિ છે. તેઓ લેઉવા પટેલ જ્ઞાતિના શ્રી ખોડલધામ ટ્રસ્ટના ટ્રસ્ટી પણ છે. અને તેમણે 16.35 કરોડની જંગમ મિલકતો જાહેર કરી છે, જેમાં તેમની પત્નીની અને એચયુએફ હેઠળની મિલકતો છે. તેમણે 156.42 કરોડની સ્થાવર મિલકત પણ જાહેર કરી છે, જેના કારણે કુલ સંપત્તિ આશરે 172 કરોડ રૂપિયા છે. તેમની સ્થાવર મિલકતમાં સુરત અને રાજકોટમાં ખેતીની જમીન, રાજકોટમાં બિનખેતીની જમીનનો સમાવેશ થાય છે.
પબુભા માણેક (રૂ.115 કરોડની સંપત્તિ)
ભાજપના દ્વારકાના ઉમેદવાર પબુભા માણેકે કુલ રૂ.115 કરોડની સંપત્તિ જાહેર કરી છે, જે તેમણે 2017માં જાહેર કરેલી રૂ.88.42 કરોડની સરખામણીએ 30 ટકાનો વધારો દર્શાવે છે. 2012માં તેમણે 31.66 કરોડ રૂપિયાની સંપત્તિ જાહેર કરી હતી.
ધર્મેન્દ્રસિંહ વાઘેલા (રૂ. 111.97 કરોડની સંપત્તિ)
વાઘોડિયા બેઠક પરથી અપક્ષ ઉમેદવાર ધર્મેન્દ્રસિંહ વાઘેલાએ રૂ. 111.97 કરોડની સંપત્તિ જાહેર કરી છે, જેનાથી તેઓ છઠ્ઠા સૌથી ધનિક ઉમેદવાર બન્યા છે.
જવાહર ચાવડા (રૂ.104.66 કરોડની સંપત્તિ)
જૂનાગઢની માણાવદર બેઠકના 58 વર્ષીય ભાજપના ઉમેદવાર જવાહર ચાવડાએ 25.49 કરોડ રૂપિયાની જંગમ સંપત્તિ અને 104.66 કરોડની સ્થાવર મિલકત મળીને કુલ 130 કરોડ રૂપિયાની સંપત્તિ જાહેર કરી છે. તેમની જંગમ સંપત્તિમાં પાંચ ટ્રેક્ટર અને 85,000 રૂપિયાની રાડો ઘડિયાળનો સમાવેશ થાય છે, જ્યારે સ્થાવર મિલકતોમાં ખેતીની જમીન, કોમર્શિયલ અને રહેણાંક જગ્યાઓનો સમાવેશ થાય છે
ઉલ્લેખનિય છે કે ગુજરાતમાં 1 અને 5મી ડિસેમ્બરે મતદાન થશે. ગુજરાતમાં વિધાનસભા ચૂંટણીના પરિણામો 8 ડિસેમ્બરે જાહેર થશે. હાલમાં તમામ પાર્ટીઓ દ્વારા પ્રચાર કરવામાં આવી રહ્યો છે. ચૂંટણી જીતવા માટે એડીચોટીનું જોર લગાવી રહ્યા છે.
