મંગળવારે રાત્રે દક્ષિણ કોરિયાના ગિમ્હે આંતરરાષ્ટ્રીય વિમાનમથક પર એક મોટી દુર્ઘટના ટળી ગઈ. દક્ષિણ કોરિયાના ગિમ્હે આંતરરાષ્ટ્રીય વિમાનમથક પર મંગળવારે રાત્રે એક પેસેન્જર વિમાનના પાછળના ભાગમાં આગ લાગી ગઈ. વિમાન ઉડાન ભરવાની તૈયારી કરી રહ્યું હતું ત્યારે આ આગ લાગી હતી. સૂત્રોની જાણકારી પ્રમાણે વિમાનમાં 176 મુસાફરો સવાર હતા. બધા લોકોને સુરક્ષિત રીતે બહાર કાઢવામાં આવ્યા.
એર બુસાન વિમાન A321 દક્ષિણ-પૂર્વીય શહેર બુસાનથી હોંગકોંગ જવા માટે ઉડાન ભરવાની તૈયારી કરી રહ્યું હતું તે પહેલાં જ આગ લાગી હોવાની જાણ થઈ. આ પછી, 45 ફાયર એન્જિન તાત્કાલિક ઘટનાસ્થળે પહોંચી ગયા. આ ઘટના રાત્રે લગભગ 10:30 વાગ્યે બની હતી અને તેનો વીડિયો પણ સામે આવ્યો છે, જેમાં જોઈ શકાય છે કે વિમાનના પાછળના ભાગમાંથી ધુમાડો નીકળી રહ્યો છે અને ફાયર બ્રિગેડના વાહનો પણ છે અને વિમાનની આસપાસ ઘણા લોકો હાજર છે. ઉલ્લેખનીય છે કે આ અકસ્માતમાં ત્રણ લોકો ઘાયલ થયા હોવાનું જણાવવામાં આવી રહ્યું છે જેમને હોસ્પિટલમાં દાખલ કરવામાં આવ્યા છે. જોકે તેમની હાલત ગંભીર નથી. ફાયર બ્રિગેડે આગ પર સંપૂર્ણ કાબુ મેળવી લીધો છે. હાલમાં આગની ઘટનાની તપાસ ચાલી રહી છે.
એક મહિનામાં દક્ષિણ કોરિયામાં આ બીજી વિમાન દુર્ઘટના છે. ગયા વર્ષે 29 ડિસેમ્બરે દક્ષિણ કોરિયામાં પણ આવી જ એક દુર્ઘટના બની હતી. જેજુ એરનું બોઇંગ 737-800 વિમાન મુઆન આંતરરાષ્ટ્રીય એરપોર્ટ પર ક્રેશ થયું. આ અકસ્માતમાં 181 માંથી 179 લોકો મૃત્યુ પામ્યા હતા અને ફક્ત બે જ લોકો બચી શક્યા હતા. વિમાનના લેન્ડિંગ ગિયરે કામ કર્યું નહીં, જેના કારણે વિમાન રનવે પરથી લપસી ગયું, કોંક્રિટના માળખા સાથે અથડાયું અને આગ લાગી ગઈ.
