પહલગામમાં પાકિસ્તાની આતંકવાદીઓ દ્વારા કરાયેલા નિર્દય હુમલા બાદ ભારત-પાકિસ્તાન વચ્ચે તણાવ વધ્યો છે. આ પરિસ્થિતિમાં ભારતીય નૌકાદળ પોતાની તાકાત વધારવા માટે આજે ફ્રાન્સ સાથે મહત્વનો સંરક્ષણ સોદો કરશે. નવી દિલ્હીમાં ફ્રેન્ચ કંપની ડસો એવિએશન, બંને દેશોના સંરક્ષણ અધિકારીઓ અને સુરક્ષા સચિવની હાજરીમાં 63,887 કરોડ રૂપિયાની રાફેલ ફાઇટર જેટ ડીલ પર હસ્તાક્ષર થશે. આ સોદો ભારતનો અત્યાર સુધીનો સૌથી મોટો વિદેશી સંરક્ષણ કરાર છે. આ ડીલમાં 22 સિંગલ-સીટ અને 4 ટ્વીન-સીટ રાફેલ-એમ જેટ સહિત કુલ 26 વિમાનો મળશે, જેની ડિલિવરી 2029થી શરૂ થશે અને 2031 સુધીમાં પૂર્ણ થશે.
આ સોદામાં શસ્ત્રો, સિમ્યુલેટર, ક્રૂ તાલીમ, વિમાનોની જાળવણી અને પાંચ વર્ષ માટે લોજિસ્ટિક્સ સપોર્ટનો સમાવેશ છે. હાલ ભારતીય વાયુસેના 36 રાફેલ જેટનો ઉપયોગ કરે છે, અને આ નવા વિમાનો INS વિક્રમાદિત્ય અને INS વિક્રાંત જેવા વિમાનવાહક જહાજો પરથી સંચાલિત થશે. રાફેલની મલ્ટિ-રોલ ક્ષમતા તેને એર-ટુ-એર, એર-ટુ-લેન્ડ અને દરિયાઇ હુમલાઓ માટે અસરકારક બનાવે છે. તે 1,912 કિ.મી./કલાકની ઝડપે ઉડે છે, 18,000 મીટર ઊંચાઈ એક મિનિટમાં મેળવે છે, અને 3,700 કિ.મી.ની ફેરી રેન્જ ધરાવે છે. અદ્યતન એવિઓનિક્સ, હવામાં ઇંધણ ભરવાની સુવિધા અને સાંકડી જગ્યામાં ઉતરાણની ક્ષમતા તેને વિશિષ્ટ બનાવે છે.
આ ડીલ ફ્રાન્સના સંરક્ષણ પ્રધાન સેબેસ્ટિયન લેકોર્નુની 27 એપ્રિલની મુલાકાત દરમિયાન થવાની હતી, પરંતુ હુમલાને કારણે તે મુલતવી રાખવામાં આવી. હવે 28 એપ્રિલે વીડિયો કોન્ફરન્સિંગ દ્વારા બંને દેશોના સંરક્ષણ મંત્રીઓની હાજરીમાં સોદો થશે. આ રાફેલ જેટ ભારતીય નૌકાદળની શક્તિમાં નોંધપાત્ર વધારો કરશે, ખાસ કરીને ઇન્ડો-પેસિફિક ક્ષેત્રમાં ચીનની વધતી પ્રભુતા અને પાકિસ્તાનના આતંકવાદી ખતરાઓ સામે. ચીન અને પાકિસ્તાન પાસે આવા અદ્યતન ફાઇટર જેટ નથી, જે ભારતને વ્યૂહાત્મક લાભ આપશે.
