નવી દિલ્હીઃ ક્રૂડ ઓઇલ માટે ભારત બીજા દેશો પર આધારિત છે. ભારત પોતાની જરૂરિયાત માટે આશરે 85 ટકા ક્રૂડ ઓઇલની આયાત કરે છે. વિશ્વમાં ભારત ત્રીજો સૌથી મોટો ઓઇલ આયાત કરતો દેશ છે. પ્રથમ ક્રમે અમેરિકા અને બીજા ક્રમે ચીન આવે છે. આ વચ્ચે કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ એક મોટો દાવો કર્યો છે.
મિડિયા સાથેની વાતચીતમાં હરદીપ સિંહ પુરીએ કહ્યું હતું કે ભારત આંદામાનમાં એક પરિવર્તનકારી ઓઇલ ભંડારની શોધમાં છે. તેમણે તેની સરખામણી ગુયાનામાં હેસ કોર્પોરેશન અને CNOOC દ્વારા કરવામાં આવેલી મોટી શોધ સાથે કરી હતી. ઓઇલ ભંડારને મામલે ગુયાના વિશ્વમાં 17મા ક્રમ પર છે, જ્યાં અંદાજિત 11.6 બિલિયન બેરલ ઓઇલ અને ગેસ છે. તેમણે આગળ કહ્યું હતું કે જો ભારત આંદામાનમાં ગુયાનાની સમકક્ષ તેલ ભંડાર શોધી લે તો તે એક મોટી સફળતા રહેશે. અને ભારતનો અન્ય દેશો પરની નિર્ભરતા ઘટી જશે.
કેન્દ્રીય મંત્રી કહે છે કે મને લાગે છે કે આંદામાન સાગરમાં ગયાના જેવો મોટો ક્રૂડ ઓઇલનો ભંડાર મળી જવો માત્ર સમયની વાત છે, અને અમારી શોધ ચાલુ છે. તેમણે આગળ જણાવ્યું હતું કે નાની શોધો સિવાય જો ભારત આંદામાન વિસ્તારમાં ગયાનાની જેમ મોટા પાયે તેલ ભંડાર શોધવામાં સફળ થઈ જાય છે તો દેશ 3.7 ટ્રિલિયન ડોલરની અર્થતંત્રમાંથી 20 ટ્રિલિયન ડોલરનું અર્થતંત્ર બની શકે છે.
ભારત વિશ્વમાં ત્રીજો સૌથી મોટો ક્રૂડ ઓઇલ આયાત કરતો દેશ છે. કેટલીક અહેવાલો અનુસાર પોતાની સ્થાનિક જરૂરિયાતોને પૂર્ણ કરવા માટે ભારત લગભગ 85-88 ટકા ક્રૂડ ઓઇલ વિદેશમાંથી આયાત કરે છે. ભારતના મુખ્ય ક્રૂડ ઓઇલ પુરવઠાકાર દેશોમાં ઈરાક, સાઉદી આરબ, રશિયા અને સંયુક્ત આરબ અમીરાતનો સમાવેશ થાય છે.
