કેલિફોર્નિયા: સેક્રામેન્ટો શહેરમાં મહિનાઓ સુધી સ્ટૉકિંગ (પીછો કરવા) અને હેરાનગતિ કર્યા બાદ ૨૨ વર્ષીય યુવકે ૩૮ વર્ષીય ભારતીય મૂળની મહિલા શાલિની ઠાકુરની રેસ્ટોરન્ટ બહાર ગોળી મારીને હત્યા કરી દીધી છે. આ ઘટના બાદ પોલીસે પીછો કરતા આરોપીએ વ્યસ્ત હાઇવે-૫૦ પર ગોળી મારીને આત્મહત્યા કરી લીધી હતી.
ઘટનાની વિગતો
-
ગોળીબારની ઘટના: મંગળવારે બપોરે અંદાજે ૩ વાગ્યે સેક્રામેન્ટોના આર્ડેન આર્કેડ વિસ્તારમાં હાઉ એવેન્યુ નજીકના શોપિંગ પ્લાઝા બહાર શાલિની ઠાકુર પહોંચ્યા ત્યારે આરોપી રોહિતે તેનો સામનો કર્યો હતો. શાલિનીએ ભાગવાનો પ્રયાસ કર્યો પરંતુ રોહિતે તેનો પીછો કરીને અનેક ગોળીઓ મારી હતી અને જમીન પર પાડી દીધા બાદ નજીકથી માથામાં ગોળી મારી હતી.
-
પોલીસ કાર્યવાહી અને આરોપીનો અંત: ઘટનાસ્થળેથી મળેલી કારની વિગતોના આધારે પોલીસે લાયસન્સ પ્લેટ રીડર સિસ્ટમથી કાર ટ્રેક કરી હતી. હાઇવે-૫૦ પર પોલીસે કાર રોકવાનો પ્રયાસ કરતા આરોપીએ કાર ઊભી રાખી દીધી હતી. જ્યારે પોલીસે વાહનની તપાસ કરી ત્યારે રોહિત કારની અંદર ડ્રાઇવર સીટ પર મૃત હાલતમાં મળી આવ્યો હતો. તેણે પોતાની જાતે જ ગોળી મારીને આત્મહત્યા કરી લીધી હોવાનું સામે આવ્યું છે.
મહિનાઓથી કરતો હતો હેરાનગતિ
-
તપાસ અધિકારીઓ અને કોર્ટના દસ્તાવેજો અનુસાર, સપ્ટેમ્બર ૨૦૨૫થી આ હેરાનગતિ શરૂ થઈ હતી. આરોપી DoorDash પિકઅપ દરમિયાન શાલિનીના સંપર્કમાં આવ્યો હતો.
-
આરોપી શાલિનીના ઘર બહાર કલાકો સુધી બેસી રહેતો, તેના વાહનના ટાયરોની હવા કાઢી નાખતો અને તેની મૂવમેન્ટ પર નજર રાખવા માટે ગાડી નીચે Apple AirTag પણ લગાવી દીધું હતું.
-
તેણે શાલિનીના ઘરની ચાવીની ડુપ્લિકેટ બનાવીને તે ઊંઘતી હતી ત્યારે ઘરમાં ઘૂસી જવાનો પણ પ્રયાસ કર્યો હતો.
-
શાલિનીએ તેની સામે રેસ્ટ્રેનિંગ ઓર્ડર (મનાઈ હુકમ) પણ મેળવ્યો હતો, પરંતુ આરોપીએ તેનો ભંગ કરીને હેરાનગતિ ચાલુ રાખી હતી.
અધિકારીઓ હાલમાં આ કેસ અંગે વધુ તપાસ ચલાવી રહ્યા છે.
