સુરત: સુરતના ફિલ્મ અને સંગીત ક્ષેત્રે સંકળાયેલા કલાકારો દ્વારા લોકડાઉનમાં લોકોને ઘરે જ સુરક્ષિત રહેવાની અપીલ કરવા માટે એક અનોખું સોંગ બનાવવામાં આવ્યું છે. ‘ઘરમાં રહો’ નામના આ મનોરંજક વિડીઓ સોંગમાં સુરતના પદ્મશ્રી સન્માનિત યઝદી કરંઝીયા, બોલિવુડ અભિનેતા ગૌરવ પાસવાલા, પ્રખ્યાત ગાયક જગદીશ ઇટાલિયા અને અજીતા ઇટાલિયા તથા અન્ય કલાકારોની મદદથી આ લોકડાઉન સોંગનું નિર્માણ થયું છે. લોકડાઉનમાં લોકો સરકારના આદેશોનું પાલન કરે, ઘર બહાર નીકળવાનું જોખમ ન ખેડે અને કોરોના સામેના જંગમાં લોકો સુધી હકારાત્મક સંદેશ પહોંચે એ આશયથી સુરતના લેખક અને દિગ્દર્શક ભાવિન પાટીલ અને સંદીપ રાજપૂત દ્વારા આ સોંગનું નિર્માણ કરાયું છે. ગીતને ગાયક દર્શિત નાયકે સ્વર આપ્યો છે.
સરકારના લોકડાઉનના સખત અમલીકરણ પછી પણ કેટલાક લોકો કારણ વગર ઘરની બહાર નીકળી કાયદાનો ભંગ કરવાની સાથે સાથે પોતાનો જીવ જોખમમાં મૂકે છે. હાલ રાજ્ય અને કેન્દ્ર સરકાર કોરોનાના ફેલાતો અટકાવવા રાતદિવસ જોયા વિના મહેનત કરી રહ્યા છે. આવા સંજોગોમાં સરકારને સાથ સહકાર આપવો એ આપણી નૈતિક ફરજ છે. લોકો ઘરની બહાર નીકળશે તો લોકલ ટ્રાન્સમિશનનો ભય રહે છે. જેથી હવે જ પૂરતી કાળજી અને ગંભીરતા રાખવાનો સમય આવ્યો છે. જેથી લોકડાઉન પૂરૂ ન થાય ત્યાં સુધી લોકો ઘરમાં જ રહી પરિવાર સાથે સમય વિતાવે એવો સંદેશ આપવાના આશયથી સુરતના નામી-અનામી કલાકારોની મદદથી આ સોંગ બનાવાયું છે.
સોંગમાં યોગ્ય રીતે હાથ ધોવા, સેનિટાઈઝર, સોશ્યલ ડિસ્ટન્સ, ડોક્ટર્સ, પોલિસ અને સરકારી તંત્રને સહકાર જેવા પાસાઓને આવરી લેવામાં આવ્યા છે. લોકડાઉન દરમિયાન દરેક કલાકારો ઘરમાં જ હોવાથી સમયનો સદુપયોગ કરી સૌ કલાકારોએ સમાજને મનોરંજક રીતે ઉપયોગી સંદેશ આપવાનો સરાહનીય પ્રયાસ કર્યો છે.
(ફયસલ બકીલી-સુરત)
