ચાર મહાનગરમાં માસ્ક ફરજિયાતઃ નહીં તો કાં દંડ, કાં જેલ

અમદાવાદઃ કોરોના વાયરસ સામે લડવા માટે તમામ જરૂરી કડક પગલાં લેનાર અમદાવાદ મ્યુનિસિપલ કોર્પોરેશન તરફથી આજે એક મોટું પગલું ભરવામાં આવ્યું છે. અમદાવાદ મ્યુનિસિપલ કમિશનર વિજય નેહરાએ જાહેરાત કરી છે કે આવતીકાલ સવાર 6 વાગ્યાથી તમામ વ્યક્તિઓ માટે જાહેર જગ્યા પર માસ્ક ફરજિયાત કરી દેવામાં આવ્યા છે. જો વ્યક્તિ માસ્ક નહીં પહેરે તો તેને 5000 રૂપિયા દંડ થઈ શકે છે અને દંડ ન ભરવાની સ્થિતિમાં ત્રણ વર્ષની સજાની જોગવાઈ છે. અમદાવાદ બાદ બાદ હવે રાજકોટ, વડોદરા અને સુરતમાં પણ માસ્ક ફરજિયાત કરવામાં આવ્યું છે. જો માસ્ક નહીં પહેર્યું હોય તો પાંચ હજાર રૂપિયાનો દંડ થશે. રાજકોટ મનપાના કમિશનર ઉદિત અગ્રવાલે પ્રેસ કોન્ફરન્સને સંબોધન કરતાં જણાવ્યું હતું કે, રાજકોટમાં પણ માસ્ક ફરજીયાત કરવામાં આવ્યું છે. પહેલીવાર માસ્ક વગર પકડાશે તો 1 હજારનો દંડ અને બીજી વગર પકડાશે તે વ્યક્તિને 5 હજારનો દંડ ફટકારવામાં આવશે. રાજકોટમાં કોઇ પણ વ્યક્તિ માસ્ક વગર નહીં નીકળે, મોઢુ અને નાક ઢાંકવું ફરજીયાત છે. તમામ લોકો સખ્ત અમલ કરે. જરૂર પડ્યે ગુનો પણ નોંધાશે. શાકભાજીવાળા અને તમામ ધંધાર્થીઓને માસ્ક પહેરવા ફરજીયાત છે.

ગુજરાતમાં કોરોના વાયરસનો વ્યાપ દિવસેને દિવસે વધી રહ્યો છે. રાજ્યમાં આજે નવા 25 કેસ સામે આવ્યા છે. જેમાંથી 23 કેસ તો માત્ર અમદાવાદમાં નોંધાયા છે. આ સાથે કુલ સંક્રમિતોની સંખ્યા ગુજરાતમાં 493 પર પહોંચી ગઈ છે. વધુ એક વ્યક્તિનું મોત પણ થયું છે. તો અમદાવાદમાં કોરોના વાયરસના પીડિતોની સંખ્યા 266 પર પહોંચી ગઈ છે.

છેલ્લા ત્રણ-ચાર દિવસથી ગુજરાતમાં કોરોના વાયરસના કેસોમાં સતત વધારો થયો છે. અમદાવાદમાં અત્યાર સુધી 266 કેસો નોંધાઈ ચુક્યા છે. જ્યારે બીજા સ્થાને વડોદરા છે. તો રાજ્યભરમાં કુલ કેસોનો આંકડો 493 પર પહોંચી ગયો છે. આ સાથે અત્યાર સુધી કોરોના વાયરસથી કુલ 23 લોકોના મોત થયા છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]