રાજકોટ: ગુજરાતમાં કોરોના વાયરસે ફરી દસ્તક દીધી છે, જેમાં રાજકોટ શહેરમાં ગઈકાલે એક નવો કેસ નોંધાયો છે. રાજ્યમાં હાલ કોરોનાના કુલ 13 એક્ટિવ કેસ છે, જેમાંથી અમદાવાદના સાત કેસનો સમાવેશ થાય છે. રાજકોટ સિવિલ હોસ્પિટલમાં કોરોનાને પહોંચી વળવા ખાસ આઈસોલેશન વોર્ડ કાર્યરત કરવામાં આવ્યો છે, જ્યાં ટેસ્ટિંગ કિટ, દવાઓ અને ઓક્સિજન સિલિન્ડરની વ્યવસ્થા પૂર્ણ કરાઈ છે. આરોગ્ય વિભાગે લોકોને કોરોનાના લક્ષણો જણાય તો તાત્કાલિક સંપર્ક કરવા અપીલ કરી છે. રાજકોટના આરોગ્ય તંત્રે સંપૂર્ણ તૈયારીઓ કરી લીધી છે, જેમાં PPE કિટ અને લેબ સુવિધાઓનો પણ સમાવેશ થાય છે.
અમદાવાદમાં પણ કોરોનાના સાત નવા કેસ નોંધાતાં આરોગ્ય વિભાગ એલર્ટ મોડમાં આવી ગયું છે. શહેરના વટવા, નારોલ, દાણીલીમડા, બહેરામપુરા, ગોતા, નવરંગપુરા અને બોપલ વિસ્તારોમાં એક-એક કેસ નોંધાયા છે, જેમાં ચાર પુરુષ અને ત્રણ મહિલાઓનો સમાવેશ થાય છે. હાલ તમામ દર્દીઓને હોમ આઈસોલેશનમાં રાખવામાં આવ્યા છે. એકસાથે સાત કેસ નોંધાતાં અમદાવાદ મ્યુનિસિપલ કોર્પોરેશન અને આરોગ્ય વિભાગે સંપર્ક શોધ (કોન્ટેક્ટ ટ્રેસિંગ) અને ટેસ્ટિંગની કામગીરી તેજ કરી દીધી છે. શહેરમાં 1200 બેડની હોસ્પિટલ અને 20,000 લિટરની બે ઓક્સિજન ટેન્ક તૈયાર કરવામાં આવી છે, જેથી કોઈપણ કટોકટીની સ્થિતિમાં તાત્કાલિક સારવાર આપી શકાય.
દેશભરમાં કોરોનાના કેસોમાં વધારો જોવા મળી રહ્યો છે, જેમાં 19 મે સુધીમાં 257 એક્ટિવ કેસ નોંધાયા છે. કેરળમાં સૌથી વધુ 69 કેસ નોંધાયા છે, જ્યારે મહારાષ્ટ્ર અને તમિલનાડુમાં પણ નોંધપાત્ર કેસો સામે આવ્યા છે. આંતરરાષ્ટ્રીય સ્તરે, ખાસ કરીને એશિયામાં સિંગાપોર અને હોંગકોંગ જેવા દેશોમાં JN.1 વેરિઅન્ટના કેસોમાં વધારો નોંધાયો છે. જોકે, હાલનું વાયરસનું સ્વરૂપ ગંભીર નથી, પરંતુ આરોગ્ય નિષ્ણાતો સતર્ક રહેવાની સલાહ આપે છે. બ્રિટનમાં મૃત્યુઆંકમાં વધારો અને એશિયામાં વધતા કેસોને જોતાં ભારતમાં પણ માસ્કનો ઉપયોગ, નિયમિત હાથ ધોવા અને ભીડવાળી જગ્યાઓ ટાળવાની સૂચના આપવામાં આવી છે. ગુજરાત આરોગ્ય વિભાગે લોકોને સંપર્ક માટે હેલ્પલાઈન નંબર 104નો ઉપયોગ કરવા અપીલ કરી છે, જેથી ઝડપી નિદાન અને સારવાર શક્ય બને.
