વર્લ્ડ કપ માટે ગૌતમ ગંભીરનો માસ્ટરપ્લાન: ODI ટીમમાં આ વિસ્ફોટક ઓલરાઉન્ડરની થઈ શકે છે એન્ટ્રી, શ્રેયસ અય્યર પર વધશે દબાણ
આગામી વનડે વર્લ્ડ કપ માટે ભારતીય ક્રિકેટ ટીમ મેનેજમેન્ટે અત્યારથી જ અત્યંત મજબૂત અને દૂરંદેશી પ્લાનિંગ પર કામ કરવાનું શરૂ કરી દીધું છે. મુખ્ય કોચ ગૌતમ ગંભીર અને સુકાની શુભમન ગિલ ટીમના મિડલ ઓર્ડરને વધુ મજબૂત કરવા માટે બેકઅપ વિકલ્પોની શોધમાં છે. આ ક્રમમાં જમણેરી બેટ્સમેન શ્રેયસ અય્યરના મજબૂત વિકલ્પ તરીકે ડાબોડી ધુરંધર બેટ્સમેન તિલક વર્માનું નામ સૌથી આગળ ચાલી રહ્યું છે.
દક્ષિણ આફ્રિકાના ખંડમાં રમાનારા આગામી વર્લ્ડ કપમાં પેસ અને બાઉન્સ ધરાવતી પિચો પર ભારતીય બેટિંગ લાઈનઅપને સંતુલિત કરવાનો આ પ્રમુખ પ્રયાસ છે. ભારતીય ટોપ-ઓર્ડરમાં મોટાભાગે જમણેરી બેટ્સમેનો હોવાથી તિલક વર્મા જેવા આક્રમક ડાબોડી બેટ્સમેનની મિડલ ઓર્ડરમાં હાજરી વિરોધી ટીમ માટે મુશ્કેલી ઊભી કરી શકે છે. તદુપરાંત, શ્રેયસ અય્યરની શોર્ટ પિચ બોલ સામેની નબળાઈઓ અને હાર્દિક પંડ્યા તેમજ નીતિશ કુમાર રેડ્ડીની ફિટનેસની અસ્થિરતાને ધ્યાનમાં રાખીને પસંદગીકારો તિલક વર્માને બોલિંગ ઓપ્શન તરીકે પણ વિકસાવવા માંગે છે.
ટીમ મેનેજમેન્ટનું માનવું છે કે તિલક વર્મા માત્ર ટોપ-6 માં બેટિંગ જ નહીં, પરંતુ પોતાની પાર્ટ-ટાઈમ ઓફ-સ્પિન બોલિંગથી 4 થી 5 ઓવર પણ કાઢી આપે તે રીતે તેને તૈયાર કરવો જોઈએ. આ નિર્ણયથી અક્ષર પટેલ કે વોશિંગ્ટન સુંદરને ક્રમમાં ઉપર પ્રમોટ કરવાની ફરજ નહીં પડે.
ઓક્ટોબરમાં ન્યુઝીલેન્ડ પ્રવાસ દરમિયાન વર્લ્ડ કપની તૈયારીઓ વધુ સ્પષ્ટ આકાર લેશે. તે પહેલાં સપ્ટેમ્બરના અંતમાં વેસ્ટ ઈન્ડિઝ સામે શરૂ થનારી વનડે સિરીઝમાં યુવા અને બેકઅપ ખેલાડીઓને અજમાવવામાં આવી શકે છે, કારણ કે એશિયન ગેમ્સને કારણે કેટલાક મુખ્ય ખેલાડીઓ ઉપલબ્ધ રહેશે નહીં. આ સ્થિતિમાં તિલક વર્મા માટે વનડે ટીમમાં પોતાનું સ્થાન કાયમ કરવાની સુવર્ણ તક ઊભી થઈ છે.
