અમદાવાદ: જનગણના 2027 માટે ‘માસ્ટર ટ્રેનરો’ની તાલીમના કાર્યક્રમની ત્રીજી અને અંતિમ બેચનો આજે અમદાવાદમાં સરદાર પટેલ ઇન્સ્ટિટ્યૂટ ઓફ પબ્લિક એડમિનિસ્ટ્રેશન (SPIPA) ખાતે પ્રારંભ થયો છે. આ એ વ્યાપક તાલીમ પહેલનો અંતિમ તબક્કો છે, જેનો ઉદ્દેશ્ય ગુજરાત રાજ્ય અને દાદરા અને નગર હવેલી તથા દમણ અને દીવ (DNH&DD) સંઘ પ્રદેશના કુલ 92 ‘માસ્ટર ટ્રેનરો’ને જનગણના 2027ના બીજા તબક્કા માટે સજ્જ કરવાનો છે.
સમગ્ર તાલીમ કાર્યક્રમને ત્રણ બેચમાં વહેંચવામાં આવ્યો હતો, જેથી ઉચ્ચ ગુણવત્તાયુક્ત અને કેન્દ્રિત તાલીમ સુનિશ્ચિત કરી શકાય. 27 થી 30 ઓક્ટોબર 2026 દરમિયાન યોજાયેલ પ્રથમ બે બેચની સફળ સમાપ્તિ બાદ, હવે અંતિમ બેચ માટે 2 થી 5 નવેમ્બર 2026 દરમિયાન સઘન તાલીમનું આયોજન કરવામાં આવ્યું છે.
આ અગાઉ, જનગણના કાર્ય નિર્દેશાલય, ગુજરાતના નિયામક (Director of Census Operations) સુજલ જે. મયાત્રા એ 4 દિવસીય તાલીમ મોડ્યુલનું અધિકૃત ઉદ્ઘાટન કર્યું હતું. પોતાના સંબોધનમાં, નિયામકએ તાલીમ પ્રક્રિયામાં ‘માસ્ટર ટ્રેનરો’ની મહત્વપૂર્ણ ભૂમિકા પર પ્રકાશ પાડ્યો હતો અને ભારપૂર્વક જણાવ્યું હતું કે તેમનું નેતૃત્વ ફિલ્ડ ડેટા (ક્ષેત્રીય માહિતી)ની ગુણવત્તા પર સીધી અસર કરે છે. વસ્તીની ગણતરીના તબક્કા દરમિયાન 40 પ્રશ્નો પૂછવાના હોવાથી, તેમણે ખાસ ભાર મૂક્યો હતો કે ‘સ્વ-ગણતરી’ (self-enumeration)માં જાહેર જનતાની મહત્તમ ભાગીદારી સુનિશ્ચિત કરવી એ ફિલ્ડ એન્યુમરેટર્સ (ગણતરીદારો) પરનો કાર્યભાર ઘટાડવા અને ડેટાની ચોકસાઈમાં નોંધપાત્ર સુધારો કરવા માટેની ચાવી છે. તેમણે તમામ માસ્ટર ટ્રેનરોને પણ અનુરોધ કર્યો કે તેઓ સ્વ-ગણતરી (self-enumeration)ના દરમાં વધારો કરવા માટે વ્યૂહાત્મક પ્રતિસાદ અને અમલમાં મૂકી શકાય તેવા વિચારોનું યોગદાન આપે.
તમામ બેચમાં તાલીમ સત્રો જનગણના કાર્ય નિર્દેશાલય, ગુજરાતના પાંચ ‘નેશનલ ટ્રેનરો’ના પેનલ દ્વારા આપવામાં આવી રહી છે. આ પેનલમાં સંયુક્ત નિયામક ભારતી ઠાકરે, સંયુક્ત નિયામક ડૉ. સંચિતા સરકાર, નાયબ નિયામક મનોજ ભગોરા, નાયબ નિયામક અશોક રાણા અને નાયબ નિયામક નીલિમા ચૌરસિયાનો સમાવેશ થાય છે.
આ અંતિમ બેચ સાથે, જનગણના 2027ની પ્રક્રિયાઓનું એકસમાન અને વ્યવસ્થિત અમલીકરણ સુનિશ્ચિત કરવા માટે જરૂરી તાલીમ કાર્ય પૂર્ણ થાય છે. આ માસ્ટર ટ્રેનરો હવે સમગ્ર પ્રદેશમાં ફિલ્ડ કર્મચારીઓને તાલીમ આપશે, જેનાથી જનગણનાની પ્રક્રિયા સુચારુ અને પ્રમાણિત રીતે હાથ ધરવા માટેનો પાયો તૈયાર થશે.
