એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO) ના કર્મચારીઓ માટે રાહતના સમાચાર છે, જેઓ એમ્પ્લોઈઝ પેન્શન સ્કીમ (EPS) હેઠળ વધુ પેન્શન મેળવે છે. સરકારે EPS હેઠળ ઉચ્ચ પેન્શન માટે અરજી કરવાની અંતિમ તારીખ 11 જુલાઈ સુધી લંબાવી છે. એટલે કે હવે લાયક સભ્યો 11મી જુલાઈ સુધી ઉચ્ચ પેન્શન માટે અરજી કરી શકશે. તમને જણાવી દઈએ કે આ પહેલા અરજીની છેલ્લી તારીખ બે વખત લંબાવવામાં આવી છે. જો કે, આ વખતે પણ એવું અનુમાન લગાવવામાં આવી રહ્યું હતું કે EPFO ત્રીજી વખત સમયમર્યાદા લંબાવી શકે છે તેમજ ઉચ્ચ પેન્શન માટે અરજી કરવામાં આવતી મુશ્કેલીઓને ધ્યાનમાં રાખીને મહત્વનો નિર્ણય લઈ શકે છે.
સુપ્રીમ કોર્ટે આદેશ કર્યો હતો
નવેમ્બર 2022માં સુપ્રીમ કોર્ટે આદેશ આપ્યો હતો. આ આદેશ અનુસાર EPFOના તમામ સભ્યો કે જેઓ કર્મચારી પેન્શન યોજના (EPS)ના સભ્ય છે તેઓ હવે શરતો સાથે ઉચ્ચ પેન્શન માટે યોગદાન આપી શકશે. જો સરળ ભાષામાં સમજીએ તો EPS સભ્યોને નિવૃત્તિ પછી વધુ પેન્શન જોઈએ છે તો આ માટે કેટલીક શરતોનું પાલન કરવું પડશે અને પછી તેઓ વધુ પેન્શન મેળવી શકશે. જણાવી દઈએ કે નવેમ્બર 2022 ના સુપ્રીમ કોર્ટના આદેશ પછી ઉચ્ચ પેન્શન માટે અરજી કરવાની અંતિમ તારીખ 4 મહિના આપવામાં આવી હતી. ત્યારબાદ સમયમર્યાદા 3 મે, 2023 સુધી અને ફરીથી 26 જૂન, 2023 સુધી લંબાવવામાં આવી.
કોણ અરજી કરી શકશે ?
જે કર્મચારીઓ 1 સપ્ટેમ્બર, 2014 ના રોજ અથવા તે પછી EPS માં જોડાયા છે, જો તેમનો મૂળ પગાર દર મહિને રૂ. 15,000 થી વધુ હોય તો તેઓ EPS માટે પાત્ર રહેશે નહીં. હાલમાં મહત્તમ પેન્શનપાત્ર પગાર હજુ પણ 15,000 રૂપિયા પ્રતિ માસ છે. હાલમાં જો મૂળ પગાર 15,000 રૂપિયાથી વધુ છે, તો પેન્શનમાં એમ્પ્લોયરના યોગદાનની ગણતરી 15,000 રૂપિયાના મૂળ પગાર પર ચાલુ રહેશે. જો સાદી ભાષામાં સમજીએ તો તમારો મૂળ પગાર 25 હજાર રૂપિયા થઈ જાય તો પણ વધુ પેન્શનની ગણતરી 15 હજાર રૂપિયાના મૂળ પગાર પર થાય છે.
કેવી રીતે અરજી કરવી
EPFO એ ઉચ્ચ EPS પેન્શન માટે અરજી કરવા પાત્ર કર્મચારીઓ માટે મેમ્બર સર્વિસીસ પોર્ટલ પર એક ઓનલાઈન લિંક બહાર પાડી છે. જે સભ્ય પાત્રતાના માપદંડોને પૂર્ણ કરે છે તે અરજી કરવા માટે પોર્ટલની મુલાકાત લઈ શકે છે, પછી ભલે તે EPF ખાતું ખાનગી ટ્રસ્ટ અથવા EPFO પાસે હોય.
EPS શું છે
વર્ષ 1995 માં EPFO હેઠળ કર્મચારી પેન્શન યોજના (EPS) અસ્તિત્વમાં આવી હતી. તેનો હેતુ કર્મચારીઓના સુરક્ષિત ભવિષ્ય માટે કંપનીઓ દ્વારા યોગદાન આપવાનો હતો. કંપની આ પેન્શન ફંડમાં પાત્ર કર્મચારીઓના મૂળ પગારના 8.33 ટકા જમા કરે છે.
