મુંબઈઃ જાસૂસી અને વિમાન અપહરણની ઘટનાઓ પર બનાવાયેલી અને ગયા અઠવાડિયે જ રિલીઝ થયેલી હિન્દી ફિલ્મ ‘બેલબોટમ’ની રિલીઝ પર ત્રણ દેશોએ પ્રતિબંધ મૂક્યો છે. આ દેશો છે – સાઉદી અરેબિયા, કતર અને કુવૈત.
અક્ષયકુમાર, વાણી કપૂર, લારા દત્તા, હુમા કુરેશી અભિનીત આ ફિલ્મને ભારતમાં દર્શકો તથા ફિલ્મ સમીક્ષકો તરફથી સારો પ્રતિસાદ મળ્યો છે. આ ફિલ્મને કોરોનાવાઈરસના નિયંત્રણો વચ્ચે દુનિયાભરમાં થિયેટરોમાં રિલીઝ કરવામાં આવી છે. પરંતુ અખાતના ત્રણ દેશોએ આ ફિલ્મની રિલીઝ પર પ્રતિબંધ મૂક્યો છે. આ ફિલ્મ ઐતિહાસિક તથ્યો સાથે છેડછાડ કરે છે એવો આરોપ મૂકીને સાઉદી અરેબિયા, કતર અને કુવૈતના સત્તાવાળાઓએ આ ફિલ્મને રિલીઝ કરવાનો ઈનકાર કર્યો છે. આ ફિલ્મ 1980ના દાયકામાં ભારતમાં વિમાન અપહરણની અનેક ઘટનાઓ પર આધારિત જાસૂસી થ્રિલર ફિલ્મ છે.
