મુંબઈઃ મહારાષ્ટ્રના ચેરિટી કમિશનરે સર દોરાબજી ટાટા ટ્રસ્ટને બે ટ્રસ્ટીઓની ફરિયાદોનો જવાબ આપવા માટે એક સપ્તાહનો વધારાનો સમય આપ્યો છે. સૂત્રોના જણાવ્યાનુસાર ટ્રસ્ટે અગાઉ 12 ઓક્ટોબર સુધીમાં જવાબ આપવાનો હતો, પરંતુ તેણે વધુ સમય માગ્યો હતો. આ ફરિયાદો ટ્રસ્ટના સંચાલન અને નિર્ણય લેવાની પદ્ધતિ સાથે સંબંધિત છે.
સર દોરાબજી ટાટા ટ્રસ્ટ, ટાટા ટ્રસ્ટ્સની બે મુખ્ય સંસ્થાઓમાંની એક છે. 17 સપ્ટેમ્બરે ટાટા સન્સના બોર્ડની બેઠકમાં થયેલા વિવાદ બાદ ટ્રસ્ટની કામગીરી સામે સવાલો ઊભા થયા છે. બીજી મુખ્ય સંસ્થા સર રતન ટાટા ટ્રસ્ટ સામે પણ નિયમોના કથિત ઉલ્લંઘનને લઈને ચેરિટી કમિશનરે આ વર્ષની શરૂઆતમાં પ્રતિબંધાત્મક કાર્યવાહી કરી હતી.
શું છે આરોપો?
ટાટા ટ્રસ્ટ્સના ઉપાધ્યક્ષ વેણુ શ્રીનિવાસન અને વિજય સિંહે ટ્રસ્ટના સંચાલનમાં ખામીઓ હોવાનો આરોપ લગાવ્યો છે. બંને સર દોરાબજી ટાટા ટ્રસ્ટના ટ્રસ્ટી પણ છે. તેમણે ટ્રસ્ટના વહીવટ અને કામગીરીની તપાસ કરવાની માગ કરી છે. ફરિયાદોમાં આરોપ લગાવવામાં આવ્યો છે કે સર દોરાબજી ટાટા ટ્રસ્ટ પરોપકારના પોતાના મુખ્ય ઉદ્દેશ પર ધ્યાન કેન્દ્રિત કરવાને બદલે ટાટા સન્સની વ્યાવસાયિક બાબતોમાં હસ્તક્ષેપ કરી રહ્યું છે. આ ઉપરાંત, ટાટા ટ્રસ્ટ્સના ચેરમેન નોએલ ટાટા આજીવન ટ્રસ્ટી તરીકે ચાલુ રહેવાને મુદ્દે પણ સવાલો ઉઠાવવામાં આવ્યા છે. ટાટા ટ્રસ્ટ્સે આ મામલે કોઈ ટિપ્પણી કરી નથી.
વિવાદનું મૂળ શું છે?
17 સપ્ટેમ્બરે યોજાયેલી બોર્ડની બેઠકમાં બે મહત્ત્વના મુદ્દાઓ સામે આવ્યા હતા.
પ્રથમ મુદ્દો ટાટા સન્સના ચેરમેન એન. ચંદ્રશેખરનને ત્રીજો કાર્યકાળ આપવાનો હતો. તેમનો વર્તમાન કાર્યકાળ ફેબ્રુઆરી, 2027માં પૂર્ણ થવાનો છે.
બીજો મુદ્દો ભારતીય રિઝર્વ બેંકના નિર્દેશ અનુસાર ટાટા સન્સને શેરબજારમાં લિસ્ટેડ કરવાનો હતો.
વેણુ શ્રીનિવાસન ટાટા ટ્રસ્ટ્સ તરફથી ટાટા સન્સના બોર્ડમાં નિયુક્ત ડિરેક્ટર પણ છે. તેમણે ચંદ્રશેખરનને વધુ એક કાર્યકાળ આપવાનું અને કંપનીને શેરબજારમાં લિસ્ટેડ કરવાનું સમર્થન કર્યું હતું.
જોકે નોએલ ટાટાએ બંને પ્રસ્તાવોનો વિરોધ કર્યો હતો. તેઓ પણ ટાટા સન્સના બોર્ડમાં નિયુક્ત ડિરેક્ટર છે. તેમણે ચંદ્રશેખરનને ત્રીજો કાર્યકાળ આપતા રોકવા માટે પોતાના વિટો અધિકારનો ઉપયોગ કર્યો હતો. જોકે, કંપનીને શેરબજારમાં લિસ્ટેડ કરવાના મુદ્દે મતદાન થયું નહોતું.
