રાજધાની દિલ્હીમાં જંતર-મંતર ખાતે મોટા પ્રદર્શનનું આયોજન કરનાર ‘કોકરોચ જનતા પાર્ટી’ (CJP) ના મુખ્ય નેતાઓ અભિજીત દીપકે, સૌરવ દાસ અને આશુતોષ રાંકાને રવિવારે એક્ઝિક્યુટિવ મેજિસ્ટ્રેટ કોર્ટે જામીન પર મુક્ત કર્યા છે. વકીલ રત્ના સિંહે સોશિયલ મીડિયા દ્વારા આ અંગેની સત્તાવાર જાણકારી આપી હતી. કોર્ટે ત્રણેય નેતાઓને આગામી 1 year માટે શાંતિ અને કાયદો-વ્યવસ્થા જાળવી રાખવાની શરત પર જામીન આપ્યા છે.
આ ત્રણેય નેતાઓ મુખ્ય ચૂંટણી કમિશનર જ્ઞાનેશ કુમારના રાજીનામાની માગણી સાથે શનિવારે જંતર-મંતર ખાતે બહુચર્ચિત આંદોલન કરવાના હતા. જોકે, દિલ્હી પહોંચે તે પહેલાં જ પોલીસે તેમની પ્લેનમાંથી જ અટકાયત કરી લીધી હતી. નેતાઓની મુક્તિ બાદ CJP એ સોશિયલ મીડિયા પર ખુશી વ્યક્ત કરતા લખ્યું હતું કે, આખરે દિલ્હી પોલીસે અભિજીત દીપકે, આશુતોષ રાંકા અને સૌરવ દાસને મુક્ત કરવા પડ્યા. કોકરોચ ક્યારેય નથી મરતા.
યુટ્યુબર ધ્રુવ રાઠીને પણ કરાયા મુક્ત
CJP ના પ્રદર્શનમાં સામેલ થવા માટે આવેલા પ્રખ્યાત યુટ્યુબર ધ્રુવ રાઠીને પણ શનિવારે ગુરુગ્રામના સેક્ટર-56 સ્થિત તેમના નિવાસસ્થાનેથી દિલ્હી પોલીસે અટકાયતમાં લીધા હતા. રવિવારે તેમને પણ મુક્ત કરવામાં આવ્યા છે. જોકે પોલીસ સૂત્રોના જણાવ્યા અનુસાર, જો ધ્રુવ રાઠી જાહેર નિષેધાજ્ઞા (Section 144/BNSS 163) નો ભંગ કરીને ફરી જંતર-મંતર તરફ જવાનો પ્રયાસ કરશે તો તેમની ફરીથી અટકાયત કરવામાં આવી શકે છે.
દિલ્હીમાં 30,000 થી વધુ જવાનો તૈનાત, 7,000 થી વધુ પ્રદર્શનકારીઓની અટકાયત
શનિવારે જંતર-મંતર ખાતે આયોજિત આ મોટો વિરોધ પ્રદર્શન રોકવા માટે સમગ્ર દિલ્હીમાં અત્યંત કડક સુરક્ષા વ્યવસ્થા ગોઠવવામાં આવી હતી. દિલ્હી પોલીસ અને અર્ધસૈનિક દળોના 30,000 થી વધુ જવાનોને રસ્તાઓ પર તૈનાત કરી દેવાયા હતા. પ્રદર્શનકારીઓની ભીડને એકઠી થતી રોકવા માટે દિલ્હીના 45 મેટ્રો સ્ટેશનોના એન્ટ્રી અને એક્ઝિટ ગેટ બંધ કરી દેવાયા હતા. આ આખા ઘટનાક્રમ દરમિયાન દિલ્હીના વિવિધ વિસ્તારોમાંથી 7,000 થી વધુ પ્રદર્શનકારીઓની અટકાયત કરવામાં આવી હતી.
