કોકરોચ જનતા પાર્ટી એટલે કે સીજેપી (CJP) ના સ્થાપક અભિજીત દિપકેને અદાલતે સશર્ત જામીન મંજૂર કર્યા છે. દિલ્હી પોલીસ તરફથી મળેલી સત્તાવાર માહિતી મુજબ, 50 હજાર રૂપિયાના અંગત મુચલકા અને એક ‘પીસ બોન્ડ’ એટલે કે શાંતિ કરાર પર હસ્તાક્ષર કર્યા બાદ તેમને મુક્ત કરવામાં આવશે. આ અગાઉ, સીજેપીના પ્રતિનિધિઓએ આક્ષેપ કર્યો હતો કે અભિજીત દિપકેને ભારતીય નાગરિક સુરક્ષા સંહિતા (BNSS) ની કલમ 163 હેઠળ નવી દિલ્હી સ્થિત તેમના નિવાસસ્થાનેથી અટકાયતમાં લેવામાં આવ્યા હતા. પક્ષના અગ્રણીઓએ એવો પણ દાવો કર્યો હતો કે દિપકેને કોઈ અજાણ્યા સ્થળે લઈ જવામાં આવ્યા હતા અને શરૂઆતમાં વકીલો સાથે મુલાકાત કરવાની તાત્કાલિક મંજૂરી આપવામાં આવી ન હતી. વાસ્તવમાં, કન્નોટ પ્લેસ ખાતે યોજાનારા પ્રસ્તાવિત ‘લહેરા દો તિરંગા’ માર્ચ અગાઉ શાંતિ ભંગ થવાની આશંકાને ધ્યાનમાં રાખીને તકેદારીના ભાગરૂપે દિપકેને ભારતીય નાગરિક સુરક્ષા સંહિતા (BNSS) ની કલમ 126 અને 170 હેઠળ અટકાયતમાં લેવામાં આવ્યા હતા. ત્યારબાદ શનિવારે તેમને વિશેષ કાર્યકારી મેજિસ્ટ્રેટ (SEM) ની અદાલતમાં રજૂ કરવામાં આવ્યા હતા, જ્યાંથી અદાલતે તેમને જામીન મંજૂર કર્યા હતા.
નેહા બોરાને અગાઉ જ કરવામાં આવ્યા હતા મુક્ત
ઓલ ઇન્ડિયા સ્ટુડન્ટ્સ એસોસિએશન (AISA) ના અધ્યક્ષ નેહા બોરાને શનિવારે સવારે જ પોલીસ મુક્ત કરી ચૂકી હતી. જેલમુક્ત થયા બાદ નેહા બોરાએ પોલીસ પ્રશાસન અને કેન્દ્ર સરકાર પર આકરા પ્રહારો કરતા પોતાની અટકાયતની આ કાર્યવાહીને સંપૂર્ણપણે ‘ગેરકાયદેસર’ ગણાવી હતી. નેહા બોરાએ જણાવ્યું હતું કે, મને મંડી હાઉસ પરથી અટકાયતમાં લેવામાં આવી હતી અને સવારે પાંચ વાગ્યા સુધી પોલીસ મથકમાં રાખવામાં આવી હતી. ગેરકાયદેસર રીતે અટકાયતમાં શા માટે લેવામાં આવી રહ્યા છે? દેશમાં આ સ્થિતિ લાંબા સમયથી ચાલી રહી છે અને આ આંદોલને સ્પષ્ટ કરી દીધું છે કે આવી અટકાયતો કરવામાં આવી રહી છે. આ ઘટનાએ આખી પરિસ્થિતિને ખુલ્લી પાડી દીધી છે. પોલીસ કાયદો અને વ્યવસ્થા જાળવવાનો તથા નિયમોનુસાર કામ કરવાનો દાવો કરે છે, પરંતુ વાસ્તવિકતામાં એવું કંઈ જ થઈ રહ્યું નથી.
નેહા બોરાએ કરી હતી દિપકેને મુક્ત કરવાની માંગ
આઈસા અધ્યક્ષે અભિજીત દિપકે સહિત અટકાયતમાં લેવાયેલા કે ધરપકડ કરાયેલા તમામ આંદોલનકારીઓને તાત્કાલિક મુક્ત કરવાની જોરદાર માંગ કરી હતી. તેમણે ઉમેર્યું હતું કે, આ આંદોલન દરમિયાન પોલીસ સાંજ પડે ગેરકાયદેસર રીતે લોકોની અટકાયત કરે છે અને બીજા દિવસે સવારે કે સાંજે છોડી દે છે. કયો કાયદો આ પ્રકારની અટકાયતની મંજૂરી આપે છે તે સમજવા અમે અસમર્થ છીએ. મધ્ય દિલ્હીમાં સર્જાયેલા કરફ્યુ જેવા વાતાવરણનો વહેલી તકે અંત આવવો જોઈએ.
