મુંબઈઃ વોટ્સએપ સર્વિસ યૂઝર્સને એક જ મોબાઈલ ફોનમાં બે એકાઉન્ટ રાખવાની પરવાનગી આપશે. માર્ક ઝુકરબર્ગે તાજેતરમાં જાહેરાત કરી હતી કે આ ફીચર આગામી અઠવાડિયા કે મહિનાઓમાં એન્ડ્રોઈડ યૂઝર્સ માટે રિલીઝ કરવામાં આવશે. યૂઝર્સ એમની સુવિધા મુજબ બે અલગ એકાઉન્ટ રાખી શકશે. દાખલા તરીકે એક ઓફિસને લગતા કામકાજ માટે અને બીજો અંગત. દર વખતે લોગ આઉટ કરવાની કે બે ફોન રાખવાની પણ જરૂર નહીં પડે.
વોટ્સએપમાં બીજો એકાઉન્ટ સેટ અપ કરવા માટે તમારે બીજા ફોન નંબર અને સીમ કાર્ડની જરૂર રહેશે. અથવા એવો ફોન હોવો જોઈએ જે મલ્ટી-સીમ અથવા ઈ-સીમ એક્સેપ્ટ કરતા હોય. યૂઝરે વોટ્સએપ સેટિંગ્સમાં જવાનું રહેશે, ત્યાં તમારા નામની બાજુમાં રહેલા એરો પર ક્લિક કરવાનું અને Add account પર ક્લિક કરવાનું. ત્યાં તમને એક જ એપની અંદર બે અલગ અલગ એકાઉન્ટ મેનેજ કરવા મળશે.
