મુંબઈ: બોલિવૂડ સ્ટાર કપલ અદિતિ રાવ હૈદરી અને સિદ્ધાર્થે લગ્ન કરી લીધા છે. તેણે લગ્નની તસવીરો સોશિયલ મીડિયા પર શેર કરી, જેના પછી ચાહકોને આ ખુશખબર મળી. સિદ્ધાર્થ સાથેના લગ્નની જાહેરાત કરતી વખતે અદિતિએ કૅપ્શનમાં લખ્યું, ‘તમે મારો સૂર્ય છો, હું તમારો ચંદ્ર અને મારા બધા તારા… અનંતકાળ માટે પિક્સી સોલમેટ બની રહેજો… હસવા માટે, ક્યારેય મોટા ન થવા માટે, પ્રેમ માટે, પ્રકાશ અને જાદુ માટે… મિસેજ અને મિ. અદુ-સિદ્ધુ.
અદિતિ રાવ હૈદરી અને સિદ્ધાર્થે ઈન્સ્ટાગ્રામ પર ઘણી બધી તસવીરો શેર કરી છે. તે મંદિરની બહાર દેખાય છે. અદિતિએ ભૂરા રગંની સાડી પહેરી છે. સરળ ગજરાની હેરસ્ટાઈલ સાથે દુલ્હનના રૂપમાં અભિનેત્રી ખુબ જ સુંદર દેખાય છે. જ્યારે કે સિદ્ધાર્થે સફેદ રંગની ધોતી અને કુર્તા પહેર્યા છે, જેમ કે દક્ષિણ ભારતીય સંસ્કૃતિમાં પહેરવામાં આવે છે. એવું કહેવામાં આવી રહ્યું છે કે બંનેએ તેલંગાણાના વાનપર્થી સ્થિત 400 વર્ષ જૂના શ્રીરંગપુર મંદિરમાં લગ્ન કર્યા હતા અને કોઈએ તેના વિશે સાંભળ્યું પણ ન હતું.
અદિતિ અને સિદ્ધાર્થની આ તસવીરોમાંથી એકમાં તેઓ મંડપમાં બેઠેલા જોવા મળે છે અને પૂજારી તેમના લગ્ન કરાવી રહ્યા છે. બંનેના ગળામાં માળા છે અને હાથ જોડીને બેઠા છે.
અન્ય એક તસવીરમાં ઘરની મહિલાઓ અદિતિ અને સિદ્ધાર્થને આશીર્વાદ આપી રહી છે.
કેટલીક તસવીરમાં બંને એકબીજાને ગળે લગાવી રહ્યાં છે. આ તસવીરો પોસ્ટ થતાની સાથે જ તે સોશિયલ મીડિયા પર વાયરલ થઈ ગઈ હતી. ચાહકો તેમને અભિનંદન પાઠવી રહ્યાં છે. સોનાક્ષી સિન્હા, અનન્યા પાંડે, દુલકર સલમાન, આથિયા શેટ્ટી, દિયા મિર્ઝા સહિત ઘણા સ્ટાર્સે પણ અભિનંદન પાઠવ્યા છે.
