દિવાળી-2023 સમાપ્ત થઈ ગઈ છે, પણ ભારતના ભૂતપૂર્વ કેપ્ટન અને સ્ટાર બેટર વિરાટ કોહલીએ ODI વર્લ્ડ કપ-2023માં તેની આગવી શૈલીમાં ધમાકેદાર બેટિંગ કરવાનું ચાલુ જ રાખ્યું છે. 15 નવેમ્બર, બુધવારે, મુંબઈના વાનખેડે સ્ટેડિયમમાં ન્યૂઝીલેન્ડ સામેની સેમી ફાઈનલ મેચમાં એણે 117 રન કરીને હજારો દર્શકોને મનોરંજન પૂરું પાડવા સાથે એક મોટો વર્લ્ડ રેકોર્ડ તોડ્યો હતો. તેણે પોતાની ODI કારકિર્દીની 50મી સદી ફટકારી હતી અને આ સાથે તેણે 49 સદીના સચીન તેંડુલકરના વિશ્વવિક્રમને તોડી નાખ્યો છે. દર્શકોને રોમાંચિત કરી દેનારી સદી પૂરી કરીને એણે સ્ટેડિયમમાં હાજર માસ્ટર બ્લાસ્ટર તેંડુલકર તરફ જોઈને નીચા નમીને પોતાની નમ્રતા દર્શાવી હતી તેમજ બીસીસીઆઈ સેક્રેટરી જય શાહ, પોતાની પત્ની અનુષ્કા શર્મા તથા હજારો દર્શકોનું અભિવાદન સ્વીકાર્યું હતું. 291મી વન-ડે રમતો કોહલી આખરે 113 બોલનો દાવ રમીને આઉટ થયો હતો, જેમાં એણે 9 ચોગ્ગા અને બે છગ્ગા ફટકાર્યા હતા. (તસવીરકારઃ દીપક ધુરી)
