સ્વિટ્ઝરલેન્ડના બાઝલમાં વર્લ્ડ બેડમિન્ટન ચેમ્પિયનશિપમાં 25 ઓગસ્ટ, રવિવારે રમાયેલી મહિલાઓની સિંગલ્સનો ગોલ્ડ મેડલ જીતવામાં ભારતની પી.વી. સિંધુ સફળ થઈ હતી. એણે એકતરફી બનેલી ફાઈનલમાં મેચમાં જાપાનની નોઝોમી ઓકુહારાને 21-7, 21-7થી પરાજય આપ્યો હતો. સિંધુ આ સતત ત્રીજી વાર વિશ્વ સ્પર્ધાની ફાઈનલમાં પહોંચી હતી, પણ આ પહેલાંની બે ફાઈનલમાં હારી જતાં એને રજત ચંદ્રકથી સંતોષ માનવો પડ્યો હતો, પરંતુ આજે એણે સમગ્ર મેચમાં શરૂઆતથી જ ઓકુહારા પર વર્ચસ્વ જમાવ્યું હતું. આ સિદ્ધિ હાંસલ કરનાર સિંધુ પહેલી જ ભારતીય ખેલાડી બની છે. સિંધુએ 2013માં આ સ્પર્ધામાં કાંસ્ય, 2014માં પણ કાંસ્ય, 2017માં રજત અને 2018માં પણ રજત ચંદ્રક જીત્યો હતો.
